မီးဖိုချောင်သုံးဂတ်စ်(LPG)တွေဟာဈေးနှုန်းအပြောင်းအလဲမရှိသေးပေမယ့် ဖြန့်ချီရေးကုမ္ပဏီတွေကလိုအပ်သလောက်ရောင်းချပေးနိုင်မှုမရှိဘူးလို့ဂတ်စ်ရောင်းချသူတွေကပြောပါတယ်။
လက်ရှိမှာလျှပ်စစ်မီးပြတ်တောက်မှုများနေပြီးဂတ်စ်သုံးစွဲနှုန်းပြန်လည်မြင့်တက်လာတယ်လို့တစ်နိုင်တပိုင်အရောင်းဆိုင်တွေကသိရပါတယ်။
"ဈေးကတော့ဒီကနေ့ထိမပြောင်းသေးဘူး။ဒါပေမယ့်မှာသလောက်မရဘူး။အရင်ကဆိုလိုသလောက်ဝယ်လို့ရပေမယ့် အခုကသူတို့ချပေးသလောက်ပဲရတယ်။မီးတွေကပျက်တော့ဝယ်သူကများပြီးဂတ်စ်မရှိလို့ဆိုင်ပိတ်ထားရတယ်။သိရသလောက်တော့ဂတ်စ်မရှိတာမဟုတ်ဘူး။ထုတ်ပေးတဲ့နေရာကခွဲတမ်းနဲ့ကန့်သတ်လိုက်တာလို့တော့ကြားတာပဲ"လို့ဂတ်စ်လုပ်ငန်းလုပ်ကိုင်သူတစ်ဦးကပြောပါတယ်။
ဇန်နဝါရီလ(၇)ရက်ထိ 48 kg ဂတ်စ်အိုးတစ်အိုးကို ကျပ်နှစ်သိန်းနှစ်သောင်းနဲ့ကုမ္ပဏီတွေကရောင်းချပေးနေတာဖြစ်ပါတယ်။
ဒီဈေးနှုန်းပေါ်မူတည်ပြီးလက်လီဈေးကွက်တွင်းမှာတော့ နေရာအပေါ်မူတည်ပြီးဂတ်စ်တစ်ဘူးကိုကျပ်(၁၅၀၀) ၊ဂတ်စ်တစ်ပိဿာကို (၉၀၀၀)ကျပ်နှုန်း ပြန်လည်ရောင်းချကြတာပဲဖြစ်ပါတယ်။
"ဈေးကစားချင်လို့ဈေးကွက်ထိန်းတယ်လို့မြင်တာပဲ။မီးတွေကအရမ်းပျက်တော့ဝယ်လိုအားကများတယ်။ပစ္စည်းကပျက်တာမဟုတ်ပါဘူး။တမင်ကိုမထုတ်တာ"လို့ဂတ်စ်ရောင်းချသူတစ်ဦးကပြောပါတယ်။
လက်ရှိမှာလျှပ်စစ်မီးပြတ်တောက်မှုဟာပိုမိုဆိုးရွားလာပြီးတစ်ရက်တာအတွက်မီးလာချိန်ဟာ(၈)နာရီတောင်မပြည့်တဲ့ အခြေအနေဖြစ်နေပါတယ်။
