ထိုင်းနဲ့ မလေးရှားနိုင်ငံ ရောက်  အထောက်အထားမပြည့်စုံ တဲ့မြန်မာအလုပ်သမားတွေ အတင်းအကြပ် ဖမ်းဆီးပြီး ကို  နေရပ်ကို ပြန်ပို့ခြင်းမပြုဖို့ ယူကေ ရောက်မြန်မာတွေက ထိုင်းနဲ့မလေးရှား သံရုံး ရှေ့မှာ ဆန္ဒဖော်ထုတ်ပွဲ ကို မတ်လ ၄ရက် က ပြုလုပ်ခဲ့ပါတယ်။ 

၎င်း ဆန္ဒပြပွဲကို  SMFC အဖွဲ့က ဦးဆောင်ကျင်းပခဲ့တာ ဖြစ်ပြီး ထိုင်းနဲ့ မလေးရှားအာဏာပိုင်တို့ က မြန်မာရွှေ့ပြောင်းလုပ်သားတွေကို  အတင်းအကြပ် ဖမ်းဆီး နေရပ် ပြန်ပို့နေခြင်းအပေါ်  ကန့်ကွက်ကြောင်း လူအင်အား တစ်ရာနီးပါးခန့် လာရောက် ဆန္ဒထုတ်ဖော်ခဲ့ကြပါတယ်။ 

အခုလို အထောက်အထားမပြည့်စုံလို့ အဖမ်းခံရတဲ့ မြန်မာရွှေ့ပြောင်းအလုပ်သမားတွေကို ထိုင်းနဲ့မလေးရှားအာဏာ ပိုင်တွေက မြန်မာပြည်ဘက်ကို ပြန်ပို့နေတဲ့ကိစ္စဟာ အာဏာသိမ်းစစ်ကောင်စီအတွက် စစ်သားစုဆောင်းရန် ကူညီ လုပ်ဆောင် ပေးသလို ဖြစ်နေတယ်လို့ ဆန္ဒပြပွဲကို ဦးဆောင်တဲ့ SMFC အဖွဲ့က မဂျူလီခိုင်ကပြောပါတယ်။ 

ဒါကြောင့် ထိုင်းနဲ့ မလေးရှား တာဝန်ရှိသူ တွေ အနေနဲ့ လူ့အခွင့်ရေးစံနှုန်းတွေ ကို လိုက်နာပြီး မြန်မာအလုပ်သမားတွေရဲ့ ဂုဏ်သိက္ခာ နဲ့လုံခြုံရေး ချိုးဖောက်ခံနေရတာကို ကာကွယ်ပေးဖို့ ယူကေရောက်မြန်မာတွေက တောင်းဆိုခဲ့ကြပါတယ်။ 

ဆန္ဒပြသူတွေရဲ့ တောင်းဆိုချက် အိတ်ဖွင့်ပေးစာ ကို ထိုင်းနဲ့မလေးရှား သံရုံး တာဝန် ရှိသူတွေ ကို ပေးအပ်ခဲ့ပြီး မြန်မာ့အရေးအတွက် ကူညီလုပ်ဆောင်ပေးဖို့ တိုက်တွန်းခဲ့တယ်လို့ ဆိုပါတယ်။ 

ပြည်ပ မှာ အကြောင်းအမျိုးမျိုးနဲ့ ပြစ်ဒဏ်ကျခံပြီးတဲ့ မြန်မာရွှေ့ပြောင်း အလုပ်သမား တွေ ကို ထိုင်းနဲ့ မလေးရှား အာဏာပိုင်တွေက စစ်ကောင်စီထံ ပြန်လွှဲပေးခဲ့တာမှာ အများစုမှာ အဓမ္မစစ်မှုထမ်း ခိုင်းစေ ခံရတာတွေ ဖြစ်ပေါ်နေပါတယ်။ 

အမျိုးသားညီညွတ်ရေးအစိုးရ-NUGကလည်း အိမ်နီးချင်းနိုင်ငံများအနေ နဲ့ ၎င်းတို့နိုင်ငံတွင်း တရားမဝင် နေထိုင်အလုပ်လုပ်မှုဖြင့် ဖမ်းဆီး ထားတဲ့ မြန်မာနိုင်ငံသားတွေ ကို စစ်ကောင်စီထံသို့ ပို့ဆောင်နေတာဟာ  သေ တွင်းသို့ ပို့ဆောင်နေတဲ့ သဘောဖြစ်နေတဲ့ အတွက်   လူသားချင်းစာနာထောက်ထားစွာဖြင့်  ကူညီစောင့်ရှောက်ပေးဖို့ မေတ္တာရပ်ခံထားပါတယ်။