ဇူလိုင် ၁၄၊ ၂၀၂၆
မလေးရှားနိုင်ငံ မာလက္ကာမြို့ တွင် အထောက်အထားမရှိတဲ့ ပြည်ပရွှေ့ပြောင်းလုပ်သားတွေကို ဖမ်းဆီးတဲ့ (အော်ပရာစီ)ဖမ်းဆီးနေစဉ် အတွင်း လွတ်မြောက်ရန် ထွက်ပြေး ဖို့ ကြိုးစားတဲ့ မြန်မာလုပ်သား အမျိုးသမီး တစ်ဦး မှာ အဆောက်အအုံပေါ်မှခြေချော် ပြုတ်ကျကာ သေဆုံးသွားတယ် လို့ မြန်မာလူမှုကူညီရေးအသင်း (မလေးရှား) က ထုတ်ပြန်ထားပါတယ်။
ဇူလိုင်လ ၆ ရက် နေ့က သေဆုံးသူ မြန်မာလုပ်သား မခက်ကေခိုင် နေထိုင်ရာ ရပ်ကွက်အတွင်း တရားမဝင်နေထိုင်သူတွေကို စစ်ဆေးဖမ်းဆီးမှုတွေ ပြုလုပ်နေချိန်မှာ လွတ်ရာလွတ်ကြောင်း အဖြစ် အခြားနေအိမ်တခုဆီ ကူးရန် သံချောင်းပေါ်မှ လမ်းလျှောက် သွားစဉ် ခြေချော်ကာ ပြုတ်ကျခဲ့ပြီး မာလက္ကာမြို့ ဆေးရုံကြီး သို့ တင်ခဲ့ပေမယ့်ပြုတ်ကျတဲ့ဒဏ်ရာများကြောင့် ဇူလိုင် ၆ ရက်မှာတင် သေဆုံးခဲ့တယ်လို့ သိရပါတယ်။
သေဆုံးသူဟာ အသက်၃၈နှစ်ရှိပြီး ရန်ကုန်တိုင်း၊ မှော်ဘီမြို့နယ်၊ လှည်းငုတ်ချောင်းကျေးရွာ ကနေ မလေးရှားနိုင်ငံ မလက္ကာမြို့သို့ လာရောက် အလုပ်လုပ်ကိုင်သူ ဖြစ်တယ်လို့ သိရပါတယ်။
ကျန်ရစ်တဲ့ ရုပ်အလောင်းကို မိသားစုရဲ့ သဘောဆန္ဒအရ ဇူလိုင် ၁၁ ရက်တွင် ဆလန်းကောပြည်နယ် ကာချမ်းမြို့ ta Took Funeral service တွင်မေတ္တာပို့သ အမျှဝေပွဲ ကျင်းပပေးပြီးနောက် ဇူလိုင်၁၂ရက် တွင် မြန်မာနိုင်ငံရှိ မိသားစုထံ ပြန်လည်ပို့ဆောင်ပေးခဲ့တယ်လို့ မြန်မာလူမှုကူညီရေးအသင်း (မလေးရှား) ထံမှ သိရပါတယ်။
မလေးရှားနိုင်ငံအတွင်း တရားမဝင် နေထိုင်တဲ့ နိုင်ငံခြားသားလုပ်သားတွေကို ဖမ်းဆီးမှုတွေ ဆက်တိုက်ပြုလုပ်နေတာကြောင့် အထောက်အထားမရှိတဲ့ မြန်မာလုပ်သားတွေလည်း အဖမ်းခံရတာတွေလည်းရှိသလို အချို့မှာ ဖမ်းဆီးမှု ပြုလုပ်နေချိန် မှာ ကြောက်လန့်တကြား တိမ်းရှောင် ထွက်ပြေးရင်း ထိခိုက်ဒဏ်ရာရတာမျိုးတွေ အမြင့်မှ ပြုတ်ကျသေဆုံးတာမျိုးတွေ မကြာခဏ ဖြစ်ပေါ်လျက်ရှိပါတယ်။
ဒါကြောင့် အော်အရာစီ အဖမ်းဆီးများကို သတိထားကြရန် နဲ့ အဖမ်းဆီးနဲ့ကြုံတွေ့လာပါက အန္တရာယ်ဖြစ်နိုင်မယ့် ထွက်ပြေးတာမျိုးတွေ မပြုလုပ်ကျဖို့ မြန်မာလုပ်သားအရေးကူညီသူတွေက သတိပေးလျက်ရှိကြောင်းသိရပါတယ်။
