နိုင်ငံတော် သံဃာ့နာယကအဖွဲ့ဝင်၊ ပဲခူးမြို့ ဝင်းနိမ္မိတာရုံကျောင်းတိုက် ဆရာတော် အရှင်မုနိန္ဒာဘိဝံသ လိုက်ပါလာတဲ့ကား ကို တံတားဦးလေဆိပ်အထွက် မှာ ပစ်ခတ်ခံရ တဲ့ အတွက် ဆရာတော် ပျံလွန်တော်မူသွားတယ်လို့ ပဲခူးမြို့ခံသံဃာအသိုင်းအဝိုင်း ထံ မှ သိရပါတယ်။
ဇွန်လ ၁၉ မနက်ပိုင်း ၁၀ နာရီကျော်က အိမ်စီးကားတစ်စီးကို တံတားဦးလေဆိပ်အနီးစစ်ဆေးရေးဂိတ်ကပစ်ခတ်တာကြောင့် ကားပေါ်မှာပါလာတဲ့ ပဲခူးမြို့ ရဲ့ အထင်ကရ ဝင်းနိမ္မိတာရုံကျောင်းတိုက်ရဲ့ ဆရာတော်ကြီး
ဘဒ္ဒန္တမုနိန္ဒာဘိဝံသကိုသေနတ်ထိမှန်ခဲ့တာကြောင့် ဆရာတော်ကြီးပျံလွန်တော်မူသွားတယ်လို့ ဆိုပါတယ်။
"ကားပေါ်မှာ ဆရာတော် အပြင် ရန်ကုန်က ဆရာတော်တပါး လည်း ပါတယ် သူလည်း ကျဉ်ထိမှန် တယ် ကားသမားက လက်ပြတ်သွားတယ်လို့ ဘုန်းကြီးတို့ ကြားရပါတယ်"လို့ ဆရာတော်ကြီးရဲ့ တပည့်သံဃာတစ်ပါး က မိန့်ကြားပါတယ်။
လက်ရှိအချိန်မှာတော့ ဆရာတော်ရဲ့ ရုပ်ကလာပ်ကို ပဲခူးမြို့၊ ဝင်းနိမ္မိတာရုံကျောင်းကို ပြန်သယ်ယူဖို့လုပ်ဆောင်နေပြီး ဈာပနကျင်းပဖို့နဲ့ တပည့်သံဃာတွေပူဇော်ဖို့ လုပ်ဆောင်နေတယ်လို့ သိရပါတယ်။
"ဥူးဇင်းတို့လည်း သတင်း ကြားကြား ခြင်း ကျောင်းကို ရောက်နေတာ အခု ညနေ ၆နာရီခွဲ အထိကို တံတားဦးဆေးရုံကနေ ဆရာတော်ကြီးရဲ့ ရုပ်ကလပ် ကို မသယ်လာရသေးဘူး စစ်ဆေးနေတုန်းလို့ ပြောတယ် ပဲခူး ကျောင်းမှာတော့ ဈာပနအခမ်းအနား လုပ်ဖို့ပြင်ဆင်နေပါတယ်""လို့ ပဲခူးမြို့မှ ဆရာတော်ကြီးရဲ့ တပည့် သံဃာတပါးမှ မိန့်ကြားပါတယ်။
ဝင်းနိမ္မိတာရုံဆရာတော် အရှင်မုနိန္ဒာ ဘိဝံသဟာ ၁၉၄၇ ခုနှစ်မှာ ဖွားမြင်ခဲ့တာဖြစ်ပြီး ပျံလွန်တော်မူချိန်မှာ သက်တော် ၇၇ နှစ် သိက္ခာတော် ၅၇ ဝါရှိပြီလို့ သိရပါတယ်။