ဆန်စျေးနှုန်းမြှင့်တင်ရောင်းချသည်ဟုဆိုကာ ဖမ်းဆီးခံရတဲ့ ဂျပန်နိုင်ငံသား ကာဆာမာဆုဟီရိုရှီကို ပြန်လည်လွှတ်ပေးလိုက်တယ်လို့ ဂျပန်သတင်းဌာနတွေရဲ့ဖေါ်ပြချက်အရသိရပါတယ်။
၎င်းဂျပန်နိုင်ငံသား ကို ဩဂုတ်လ ၁၂ရက်က ၂၀၁၂ခုနှစ် အရေးကြီး ကုန်စည်နှင့်ဝန်ဆောင်မှုဥပဒေ ပုဒ်မ-၅အရ ထောင်ဒဏ်တစ်နှစ်နဲ့ငွေဒဏ် ကျပ်ငါးသိန်း ချမှတ်ခံရပြီး နောက် နာရီပိုင်း အတွင်း ပြန်လည်လွှတ်ပေးခဲ့တယ်လို့ စစ်ကောင်စီရဲ့ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကပြည်တွင်းမီဒီယာတွေကိုဖြေကြားထားပါတယ်။
အသက်(၅၃) နှစ်ရှိပြီဖြစ်တဲ့ မစ္စတာကာဆာမာဆုဟီရိုရှီဟာ Aeon Orange စျေးဝယ်စင်တာရဲ့ ဒါရိုက်တာတစ်ဦး ဖြစ်ပြီး ဆန်ကိုသတ်မှတ်စျေးနှုန်းထက် ၅၁ ရာခိုင်နှုန်းမှ ၇၀ ရာခိုင်နှုန်းအထိဈေးတင် ရောင်းချခဲ့သည်ဟုဆိုကာ အရေးယူခံခဲ့ရတာဖြစ်ပါတယ်။
၎င်းနှင့်အတူ One Stop Mart ၊ Sein Gay Har Trading ၊ City Mart Holding က တာဝန်ရှိသူတွေနဲ့ ဆန်ကုန်သည်တွေအပါအဝင် စုစုပေါင်း ၁၁ဦး ကို ဆန်စျေးတင်ရောင်းသည်ဆိုကာ ဇွန်လ ၃၀ရက် က အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ ၅ ဖြင့် အရေးယူဆောင်ရွက်ခဲ့တာဖြစ်ပါတယ်။
လက်တလောမှာ အရေးယူခံရသူတွေထဲ မှ ဂျပန်နိုင်ငံသား ကာဆာမာဆုဟီရိုရှီ ပြန်လည်လွတ်မြောက်လာသောပေမယ့် အခြားသူတွေနဲ့ ပတ်သက်ပြီး စစ်ကောင်စီဘက်မှ တစ်စုံတရာထုတ်ပြန်ပြောဆိုတာမျိုး မရှိသေးကြောင်း သိရပါတယ်။
