J-Land Myanmar စက်ရုံ အချိန်ပိုမဆင်းလို့ဆိုပြီး မန်နေဂျာက အများရှေ့မှာ ဆဲဆိုတယ်လို့ အလုပ်သမား တွေက ပြောပါတယ်။
တနင်္ဂနွေနေ့ အလုပ်မဆင်းတဲ့ စက်ရုံလုပ်သား အမျိုးသမီး အမျိုးသားတွေကို စက်လိုင်း မန်နေဂျာက ဆဲဆိုတာလို့ ပြောပါတယ်။
“တနင်္ဂနွေနေ့တွေ ဆင်းခိုင်းတယ်။ အကြောင်းကြောင့် အလုပ်သမားတချို့ မဆင်းနိုင်ကြဘူး။ အဲ့ဒါကို မန်နေဂျာ အမျိုးသမီးက လူတောထဲမှာ ခေါ်ဆဲတယ်။ သူတောင်းစားတွေ၊ အိမ်မှာသာ စားစရာမရှိတာ။ ေ-ာက်လုပ် လုပ်ဖို့တော့ ပျင်းကြတယ်။ အရေးကြီးလို့ ခေါ်ခိုင်းတာလို့ ပြောပြီး ဆဲ တယ်။ အပေါ်ပေါက်နဲ့ အောက် ပေါက်နဲ့ မှားမယ်။ ထမင်းစားတာလား၊ -ျီးစားတာလားတို့ ၊ အဲလိုတွေပြောတာပါ” လို့ အလုပ်သမားတဦးက ပြောပါတယ်။
တနင်္ဂနွေပိတ်ရက် အချိန်ပိုမဆင်းလို့ ဆဲဆိုခံရတဲ့ အပြင် အလုပ်နေရာ ပြောင်းရွှေ့တာတွေလည်း စက်ရုံ မန်နေဂျာက ပြုလုပ်တယ်လို့ သိရပါတယ်။
ပြီးခဲ့တဲ့လက တလလုံးနီးပါး ပိတ်ရက်မရှိ လုပ်ကိုင်ခဲ့ရပြီး အခု အောက်တိုဘာလထဲမှာတော့ တနင်္ဂနွေ တရက် လုပ်ကိုင်ခိုင်းထားတယ်လို့ အဲ့ဒီ အလုပ်သမားက ပြောပါတယ်။ နေ့စဉ် အချိန်ပိုလုပ်ကိုင်ခိုင်းတာကို အလုပ်သမားရုံးတင်ပြဖို့ ကြိုတင်လက်မှတ်ထိုးခိုင်းပေမဲ့ သတ်မှတ်အချိန်ထက် ကျော်လွန်ခိုင်းစေတာတွေ ရှိတယ်လို့ အလုပ်သမားတွေက ပြောပါတယ်။
“လက်မှတ်ထိုးခိုင်းတော့ ၆ နာရီအထိပဲ၊ နောက်မှ အရေးကြီးလို့ ဆိုပြီး ၇ နာရီအထိခိုင်းတာ။ အလုပ်သမား တွေကို ကြိုတင်ပြီး မပြောဘူး။ စက်ရုံက လက်ကိုင်ဖုန်းတွေ ယူခွင့်မပေးဘူး။ အိမ်ကို အကြောင်းကြား လို့ မရတော့ ၊ အိမ်က စိတ်ပူကြတာပေါ့။ ကျန်းမာရေးမကောင်းလို့ အိမ်ပြန်ခွင့်တောင်းတာလည်း စက်ရုံ ဆေးခန်းက သူနာပြုက ပြန်ခွင့်ပြုတာတောင် ၊ အဲဒီ မန်နေဂျာအမျိုးသမီးက ခွင့်မပြုလို့ မပြန်ရဘူး။ ခွင့်လည်း အဲလိုပဲ မရဘူး” လို့ အလုပ်သမားတဦးက ပြောပါတယ်။
ခွင့်အနေနဲ့ ကျန်းမာရေး(လူမှုဖူလုံရေးခွင့်) ခွင့်ကလွဲပြီး မည့်သည့် ခွင့်အမျိုးအစားမှ မပေးဘဲတဲ့အပြင် လုပ်သက်ခွင့် ငွေကြေးကို တနှစ်ခွဲကြာမှ ရရှိကြတယ်လို့ သိရပါတယ်။
“ခွင့်ဆိုတာ ဘာမှန်းတောင် မသိဘူး။ လူမှုဖူလုံရေးခွင့် စာရွက်သွားပေးတာတောင် မန်နေဂျာအမျိုးသမီးက ဆဲတယ်။ ကြားရက်မှာ ခွင့်မရလို့ ရက်ပျက်ရင် (ဘောပြုတ်) ရဖို့ ရှိတာ မရဘူး။ လေးသောင်းလောက် မရ တော့ဘူး။ အဲ့ဒီထဲမှာ ထောက်ပံကြေးတွေလည်း ပါတယ်။ လုပ်သက်နှစ်ကြေးဆိုရင် WCC အဖွဲ့ကို အကူအညီ တောင်းမှ ရတယ်။” လို့ အလုပ်သမား တဦးက ပြောပါတယ်။
စက်ရုံ အလုပ်သမားတွေရဲ့ အကူညီတောင်းမှုကို ဖြေရှင်း WCC အဖွဲ့ဝင်တွေကို အလေးအနက်မထားဖို့ စက်ရုံပိုင်ရှင်နဲ့ နိုင်ငံခြားသားကျွမ်းကျင်ပညာရှင်တွေက မန်နေဂျာကို ညွှန်ကြားထားတယ်လို့လည်း အလုပ်သမားတွေက ပြောပါတယ်။
“WCC အဖွဲ့ကို စက်ရုံပိုင်ရှင်ကိုယ်တိုင်က အသိအမှတ်မပြုဘူး။ ဒါကိုလည်း ထုတ်ပြောထားတယ်။ မန်နေဂျာက ရမ်းကားနေတာ။ အဖွဲ့ဝင်တွေကလည်း အလုပ်သမားတွေပဲ၊ မန်နေဂျာနဲ့ ထိပ်တိုက် တွေ့ ရတော့၊ အခက်အခဲတွေတိုင်း WCC က ဖြေရှင်းပေးဖို့ ခက်ကြတယ်”လို့ပြောပါတယ်။
စက်ရုံအတွင်း အသက်မပြည့်တဲ့ နေ့စားလုပ်သား ၁၀၀ ဝန်းကျင်ရှိပြီး တန်းတူ လုပ်ခလစာ မရဘူးလို့လည်း အလုပ်သမားတချို့က ပြောပါတယ်။ စစ်ဆေးရေးအဖွဲ့တွေ စက်ရုံကို လာရောက်စစ်ဆေးပါက အဲ့ဒီ နေ့စား အလုပ်သမားတွေကို ကြိုတင် အလုပ်နားခိုင်းတယ်လို့လည်း အလုပ်သမားတဦးက ပြောပါတယ်။
“နေ့စားကလေးတွေက ၁၂ နှစ် အငယ်ဆုံး ၊ ၁၇ နှစ်အရွယ်တွေလည်းပါတယ်။ စစ်ဆေးရေး ရှိပြီဆိုတာနဲ့ ၂ ရက်ကြိုတင် အလုပ်နားခိုင်းတယ်။ သူတို့ရဲ့ ဒေးကြေး ၅၂၀၀ ပဲရတယ်။ အိုတီပေးလည်း လုပ်ခကို အဲ့ပေါ်က တွက်တာပေါ့။ လခစား အလုပ်သမားတွေကတော့ ဒေကြေး အမြင့်ဆုံး ၇၅၀၀ ရပါတယ်။” လို့ ပြောပါတယ်။
J-Land Myanmar စက်ရုံကတော့ ကိုရီးယားနိုင်ငံသားပိုင်ဆိုင်ပြီး အလုပ်သမား ၈၀၀ ဝန်းကျင် လုပ်ကိုင် နေတယ်လို့ သိရပါတယ်။ စက်ရုံကတော့ ရန်ကုန်မြို့၊ ဝါးတရာစက်မှုဇုန် မှာရှိပြီး ကမ္ဘာကျော် အမှတ်တံဆိပ် GUESS ချုပ်လုပ်နေတဲ့ စက်ရုံ ဖြစ်တယ်လို့ ၂၀၂၃ ခုနှစ် Maynmar Labour News ရဲ့ မှတ်တမ်းတွေ အရ သိရပါတယ်။
