“ဒီလ ၁၈ရက်က မှတ်ပုံတင်အတု နဲ့ အလုပ်ဝင်ထားသူတွေ၊ အသက် မပြည့်လို့ အလုပ်ထုတ်မဲ့ အလုပ်သမား တွေနဲ့ ဆို စုစုပေါင်း ၇၀ ကျော်တယ်။ ဒီလကုန် ၃၀ရက်နေ့မှာ နောက်ဆုံးလုပ်။ ပြီးရင် မှတ်ပုံတင် ပြန်လုပ်ပေါ့ ။ အဲ့အတွက် ခွင့်လည်း မပေးဘူး။ လုပ်ပြီးရင် လုပ်သက်တစ် နှစ်ကျော် နှစ်နှစ်သမားတွေကို လူသစ်အနေနဲ့ အလုပ်ခန့်မယ်။ အလုပ်ပြန်ခန့်မှာ လူဟောင်းလို မဟုတ်တော့ဘူး။ လုပ်သက်တွေ နစ်နာတယ်။” လို့ အလုပ်သမားက ပြောပါတယ်။

 

အသက်မပြည့်လို့ အလုပ်ထုတ်မဲ့ အလုပ်သမားတွေမှာ လုပ်သက်ရင့် နှစ်ကြီးအလုပ်သမားတွေ ဖြစ်ပြီး EC စာချုပ် ချုပ်ဆိုထားတဲ့ အလုပ်သမားတွေ ဖြစ်တယ်လို့ အလုပ်သမားတွေက ပြောပါတယ်။

လုပ်ငန်းခွင်အတွင်း ဖိအားပေး အထည်စံချိန်တောင်းပြီး စိတ်ပိုင်းဆိုင်ရင် ထိခိုက်တဲ့ အထိ ဆဲဆို ပြောဆိုတယ်လို့လည်း သိရပါတယ်။

 

"အလုပ်သမား ၂၅ ယောက်ကို တနာရီ လိုင်းပေါက်အထည် ၁၅၀ကျော် ပေးရတယ်။ အထည်စံချိန်မပြည့်တာနဲ့ အောစူပါနဲ့ စူပါတွေ က ဆဲတော့တာပဲ။ ဆဲတဲ့ စကားလုံးတွေအပြင် ထမင်းစား ကြီးတာလား -ျီးစားတာလား ပြောခံရတယ်၊ နောက် နိုင်ငံခြားသားတရုတ်တွေနဲ့ ပေးစားတဲ့စကား​တွေအ​ပြော ခံရပါတယ်။” လို့ အလုပ်သမားတွေက ပြောပါတယ်။

 

အလုပ်သမားတွေ ဥပဒေအရ ခံစားခွင့်ရှိတဲ့ ရှောင်တခင်ခွင့်၊ ဆေးခွင့် နဲ့ ခွင့်ခံစားခွင့် တွေ မရဘဲ့ အလုပ်တစ်ရက်ပျက်ပါက ၅၀၀၀၀ ကျော် အဖြတ်ခံရတယ်လို့လည်း ဆိုပါတယ်။

လုပ်ငန်းခွင်အတွင်း ‌သောက်ရေနဲ့ သန့်စင်ခန်းတွေက ကျန်းမာရေးနဲ့ ညီညွတ်မှု မရှိဘူးလို့လည်း အလုပ်သမားတွေက ပြောပါတယ်။

 

"ရက်ပျက်တာနဲ့ ဒေးကြေး ၁၁၅၀၀ ၊ ရက်မှန်ကြေး ၄၀၀၀၀ အကုန်ဖြတ်ပါတယ်။ သောက် ရေက အဆင်မပြေတဲ့ အပြင် ရေပြတ်တဲ့ နေ့တွေရှိတယ်။ အိမ်သာကနည်း အလုပ်သမားကများ၊ နောက် အိမ်သာတွေက မလုံဘူး။ ဆိုးတာက ယောက်ကျားလေးနဲ့ မိန်းကလေး တွေကို အိမ်သာ ပေါင်းထားပေးတယ်။” လို့ ပြောဆိုပါတယ်။

 

Myanmar Guotai Huasheng Glory Fashion Co.,Ltd အထည်ချုပ်စက်ရုံက မြစိမ်းရောင်စက်မှုဇုန်၊ ၆၁ဂိတ်အနား၊ လှိုင်သာယာမြို့နယ်မှာ ဖွင့်လှစ်ပြီး အလုပ်သမား ၁၀၀၀ကျော် လုပ်ကိုင်နေပါတယ်။ စက်ရုံကို တရုတ်နိုင်ငံသားပိုင်ဆိုင်ပြီး Lcw vision, Xside, အမှတ်တံဆိပ် အထည်တွေ ချုပ်လုပ်နေတယ်လို့ အလုပ်သမားတွေက ပြောဆိုထားပါတယ်။