DA MEI Myanmar Co.,Ltd အထည်ချုပ် စက်ရုံက ရန်ကုန်မြို့၊ လှိုင်သာယာမြို့နယ်၊ စက်မှူဇုန် ၅ စံပယ်လမ်းမှာ ဖွင့်လှစ်ထားပြီး အလုပ်သမား ၁၀၀၀ ဝန်းကျင် လုပ်ကိုင်နေတယ်လို့ ပြောပါတယ်။

 

“စက်ရုံက ကြီးကြပ်ရေးမှူးတွေက အလုပ်သမားတွေ မချုပ်နိုင် အထည် စံချိန်တွေ တောင်းတယ်။ အလုပ်သမား ၄၀ ဝန်းကျင်ကို တစ်နာရီ အထည် ၁၅၀ အနည်းဆုံး တောင်းတယ်။ အသက်မပြည့်တဲ့ ကလေးတွေလည်း လူကြီး အလုပ်သမားတွေနဲ့ အတူ တန်းတူလုပ်ရတယ်။ စံချိန်ပြည့်အောင်ချုပ်ပေးဖို့ ထမင်းစားချိန်ကိုတောင် အပြည့်အဝ မနားရဘူး ။” လို့ အလုပ်သမားကပြောပါတယ်။

 

တောင်းခံတဲ့ အထည်အရေအတွက် များပြားတာကြောင့် ထမင်းစားနားချိန် နာရီဝက်ကိုပဲ အပြည့်အဝ အနား မရဘဲချုပ်လုပ်ပေးရသလို ရက်ပျက်လို့ဆိုပြီး ကြီးကြပ်သူတွေရဲ့ ဆဲဆိုမှုတွေကိုပါ ခံစားနေရတယ်လို့ အလုပ်သမားတွေက ပြောပါတယ်။

 

“အလုပ်ပျက်လို့ကတော့ စူပါတွေ လီတာတွေက ဆဲဆိုပြီး အလုပ် က မထွက် ထွက်အောင် ဖိအားပေးပြီး ဆဲဆိုနေတာ။ ဆဲလွန်းလို့ အလုပ်ထွက်သော အလုပ်သမားများလည်း အများကြီး ရှိတယ်။ HR က စူပါများ လီတာတွေ ခိုင်းတဲ့အတိုင်း လုပ်ပေးနေရတာ ၊ စူပါက အလုပ်ထုတ်ပေးဆို ထုတ်လိုက်တာပဲ။” လို့ ပြောပါတယ်။

 

ဆေးခွင့်၊ ရှောင်တခင်ခွင့်ရက်နဲ့ ခွင့်ခံစားခွင့်တွေ မရဘဲ ၊ ဖူလုံရေးဆေးခန်းက ဆေးခွင့်ပေးတာကို စက်ရုံက ပယ်ဖျက်ပြီး ခွင့်မဲ့အဖြစ် သတ်မှတ်ပြီး ဒေးကြေး ကျပ် ၁၁၀၀၀နဲ့ ရက်မှန်ကြေး ကျပ်၂၅၀၀၀ ဖြတ်တောက်တယ်ရတယ်လို့ အလုပ်သမားတွေက ပြောပါတယ်။

 

“လုပ်ငန်းခွင်မှာ အလုပ်သမား ၁၀၀ လောက်က အသက်၁၄၊ ၁၅၊ ၁၆ အရွယ်တွေ။ အဲ့ကလေးတွေကို အလုပ်ခန့်တော ဆရာဝန်ထောက်ခံစာချက်မပါဘူး။ ပြီးတော့ လူကြီးအလုပ်သမားတွေနဲ့ တန်းတူခိုင်း တာ။ တခြား နေ့စားအလုပ်သမားတွေကိုဆို လုပ်သက် ၃လ ပြည့်လည်း အတည်ခန့်တာမရှိဘူး။ ခွင့်ရက်တွေ၊ ဆေးခွင့်နဲ့ ကုသဖို့ အခွင့်အရေး ရှုံးနေကြတာပေါ့၊ တခြားအလုပ်သမားတွေနဲ့ တန်းတူလုပ်ရပြီး အခွင့်အရေးတော့ အတူမရဘူး” လို့ ပြော ပါတယ်။

 

စက်ရုံကို စစ်ကောင်စီတပ်က အရာရှိနဲ့ အရာရှိကတော်တွေ တစ်လ တစ်ကြိမ် လစဉ် လာရောက်ကြလို့ အလုပ်သမားမှာ လုံခြုံရေးအရ တိုင်တန်းဖို့ ခက်ခဲနေတာလို့ ပြောပါတယ်။

 

လုပ်ငန်းခွင် ဆေးခန်းမှာ အခြေခံ ဆေးဝါး လုံလောက်စွာ မထားဘဲ ဆေးကုသမှု ခံယူဖို့ကို တစ်နာရီဝန်းကျင် စောင့်ဆိုင်းရလို့ အလုပ်သမားတွေမှာ ကျန်းမာရေးအရ အခက်အခဲ ကြုံတွေ့ရတယ်လို့ ပြောဆိုကြပါတယ်။

တရုတ်နိုင်ငံသားပိုင် စက်ရုံဖြစ်ပြီး Amisu တံဆိပ် အထည်တွေ ချုပ်နေတယ်လို့ သိရပါတယ်။