NEWS

အလုပ်သမားသဘောဆန္ဒမပါဘဲ သီတင်းကျွတ်ကန်တော့ရန် ငွေကြေးဖြတ်တောက်တာတွေ မလုပ်ဖို့တောင်းဆို

CoverLogo
459 Views

လာမယ့်သီတင်းကျွတ်ကာလအတွက် အထက်လူကြီးများ ကန်တော့ရန်ဟုဆိုကာ အလုပ်သမားတွေရဲ့ သဘောဆန္ဒမပါဘဲ ငွေကြေးဖြတ်တောက်မှုတွေပြုလုပ်နေသလို လုပ်ငန်းခွင်အတွင်း အလုပ်သမားအခွင့်အရေးတွေ တန်းတူရရှိတာတွေမရှိလို့ ဖြေရှင်းပေးစေလိုတယ်လို့ LUCKY FORTUNE GARMENT အလုပ်သမားတွေကပြောပါတယ်။

ရန်ကုန်တိုင်း အင်းစိန်မြို့နယ် ရွှေပြည်သာစက်မှုဇုန် ၄ ဆရာဦးထွန်းလမ်း အမှတ် -- မှာဖွင့်လှစ်ထားတဲ့ အဆိုပါ စက်ရုံမှာ အလုပ်သမား ၉၀၀ ကျော်နဲ့ လုပ်ငန်း လည်ပတ်နေပြီး တရုတ်နိုင်ငံသားပိုင် ဖြစ်ကာ LCW VISION၊ ENCUENTRO၊ အမှတ်တံဆိပ်တွေချုပ်လုပ်နေတာလို့ သိရပါတယ်။ 

လုပ်ငန်းခွင်မှာ အလုပ်သမားးသမဂ္ဂဖွဲ့စည်းထားတာမရှိဘဲ WCC ဖွဲ့စည်းထားပေမယ့် အလုပ်သမားတွေဘက်က ရပ်တည်ရန်ကြိုးပမ်းတဲ့အလုပ်သမားကို ဖိအားပေးတာကြောင့် အလုပ်ကနေ ထွက်ခဲ့ရတယ်လို့ ပြောပါတယ်။

ဒါ့အပြင် အထည်စံချိန်အလွန်အကျွံတောင်းခံမှုရှိနေပြီး  စူပါ လီတာ အကူ စက်သား စတဲ့ အလုပ်သမား ၄၄ ဦးရှိတဲ့ စက်လိုင်းမှာ မိနစ် ၄၀ လျှင် အထည် ၄၀ ချုပ်လုပ်ဖို့ သတ်မှတ်ထားပြီး ဘောင်းဘီအထည်ဆိုလျှင် အထည် ၇၀ ထိ ချုပ်လုပ်ပေးရတာဖြစ်ကာ အဆိုပါ အထည်စံချိန်မပြည့်ပါက အောစူပါ စူပါတွေက ဆဲဆိုတာ ကြမ်းတမ်းရိုင်းစိုင်းစွာပြောကာ ဖိအားပေးခိုင်းစေနေတာလို့ လုပ်ငန်းခွင်ထဲက အမည်မဖော်လိုတဲ့ အလုပ်သမားကပြောပါတယ်။

"အလုပ်သမားတွေရပိုင်ခွင့်ရှိတဲ့ ခွင့်ရက်တွေဆိုလည်း အလုပ်သမားတိုင်းတန်းတူမရပါဘူး ရှောင်တခင်ခွင့်ဖြစ်စေ ဆေးခွင့်ဖြစ်စေ စူပါနဲ့ အမျိုးတော်တဲ့သူတွေပဲရတယ် စူပါကို တခုခုပြန်ပြောတဲ့အလုပ်သမားဆို ဘယ်ခွင့်မှမရဘူး ခွင့်တိုင်ပြီး အလုပ်တရက်ပျက်ရင် ပိုက်ဆံဖြတ်တယ် အလုပ်တရက်ပျက်ရင် ဒေးကြေး နဲ့ထောက်ပံ့ကြေး ၇၅၀၀ ကျပ် ရက်မှန်ကြေး ၄၀၀၀၀ ကျပ် ဖြတ်တောက်ခံရတယ် မတရားဘူး"လို့ အလုပ်သမားကပြောပါတယ်။

အဆိုပါ လုပ်ငန်းခွင်ထဲမှာ ထိခိုက်မှုတစုံတရာဖြစ်ပါကလည်း အလုပ်သမားက အိတ်စိုက်ကုသရတာ ဖြစ်သလို အလုပ်ရှင်ဘက်က တာဝန်ယူဆောင်ရွက်ပေးတာမရှိဘူးလို့ ပြောပါတယ်။ 

"အလုပ်သမားတွေရဲ့ သဘောဆန္ဒကိုမမေးမြန်းဘဲ သီတင်းကျွတ် ကန်တော့ဖို့ဆိုပြီး တစ်ဦးချင်းစီလစာထဲက ၁၈၀၀၀ ကျပ် ကောက်တယ်၊ အတင်းအကျပ်ကောက်တာပါ ၊ ဟိုတလောက ရေဘေးအတွက်ဆိုပြီး အလှူခံတုန်းကလည်း အလုပ်သမားတွေက တတ်နိုင်သလောက်ထည့်တာပဲ အဲ့တုန်းကလည်း သိန်း ၂၀ ကျော်ရတာ စာရင်းရှင်းမပေးဘူး ပစ္စည်းတွေလှူတာပဲတွေ့တယ် ငွေလှူတာမတွေ့ဘူး ဖြေရှင်းပေးပါ"လို့ အလုပ်သမားကပြောပါတယ်။

အခုလို လုပ်ငန်းခွင်ထဲမှာ အလုပ်သမားတွေရဲ့ သဘောဆန္ဒမပါဘဲ ငွေကြေးကောက်ခံတာတွေ ဥပဒေပါခံစားခွင့်တွေမပေးတာ၊ ရိုင်းစိုင်းစွာ ပြောဆိုခိုင်းစေတာတွေ ကျူးလွန်နေတဲ့အပေါ် အောက်ပါ အချက်တွေ ဖြေရှင်းပေးစေလိုတယ်လို့ အလုပ်သမားတွေကပြောဆိုထားပါတယ်။

တောင်းဆိုချက်တွေကတော့ 
၁။ အလုပ်သမားများခံစားခွင့်ရှိသော ခွင့်ရက်၊ဆေးခွင့်များကိုအလုပ်သမားများကို တန်းတူခံစားခွင့်ပေးရန်၊
၂။ စူပါများမှစံချိန်တောင်းခံရာတွင် ဆဲဆိုခြင်း၊အော်ဟစ်ပြီးရိုင်းစိုင်းစွာပြောဆိုခြင်းမပြုလုပ်ရန်။
၃။ အလုပ်သမားများ သဘောဆန္ဒမပါပဲ အလုပ်သမားများလစာထဲတွင် ကန်တော့ရန်အတွက် ပိုက်ဆံဖြတ် ထားခြင်းမပြုလုပ်ရန်။
၄။ ရေဘေးအတွက် ကောက်ခံသော အလှူငွေများကို အလုပ်သမားများကို ပြန်လည်းရှင်းပြရန်။
၅။ အလုပ်ရှင်ဘက်မှ အလုပ်သမားများ ချုပ်လုပ်နိုင်သောစံချိန်ကိုသာ တောင်းခံရန်စတာတွေဖြစ်တယ်လို့ သိရပါတယ်။ 


Related posts

Cover
စနေနေ့ကို အစားထိုးရုံးတက်ရက်ကြေညာမှု စက်ရုံ အလုပ်ရုံများလည်း အကျုံးဝင်
Dec 27, 2024
Cover
အသက်မပြည့်သေးတဲ့ အိမ်အကူမိန်းကလေးငယ် နံရိုးကျိုးသည့် အထိ ရိုက်နှက်နှိပ်စက်ခံထားရ
Dec 27, 2024
Cover
တလလျှင် တနင်္ဂနွေပိတ်ရက် (၂) ရက်သာ ပိတ်ပေးပြီး အလုပ်ဆင်းခိုင်းသော်လည်း အချိန်ပိုလုပ်ခလစာများကို အပြည့်အဝ မရှင်းဘဲ အကြွေးချန်နေလို့ အခက်အခဲဖြစ်
Dec 26, 2024
Cover
လှိုင်သာယာမြို့နယ် ရေဥက္ကံရပ်ကွက်အတွင်း ညစဉ် စစ်မှုထမ်းအတွက် လူဆွဲနေ
Dec 24, 2024
Cover
Golden Colour Fashion စက်ရုံပိုင်ရှင်မှ အလုပ်သမားကို လက်ရောက်ကျူးလွန်ပြီး မောင်းထုတ်
Dec 24, 2024
Cover
အချိန်ပိုအလွန်အကျွံခေါ်ယူမှုကြောင့် အလုပ်သမားများ ကျန်းမာ ရေး ထိခိုက်လာ
Dec 24, 2024