လူမှုဖူလုံရေးအကျုံးဝင်အလုပ်သမားတွေအနေနဲ့ လစဉ် မိမိတို့ရဲ့ လုပ်အားခ လစာငွေများထဲက အလုပ်သမားထည့်ဝင်ကြေး ၅ ရာခိုင်နှုန်း ( အလုပ်ရှင်မှ ၃ ရာခိုင်နှုန်း အလုပ်သမားမှ ၂ ရာခိုင်နှုန်း) ကို လူမှုဖူလုံရေးကြေးထည့်ဝင်ထားကြရာ ၎င်းထည့်သွင်းငွေမှ အာမခံစနစ်နဲ့ အကျိုးခံစားခွင့်တွေအနက် အာမခံစနစ် ၂ မျိုးကို ရရှိနိုင်တယ်လို့ သိရပါတယ်။
လူမှုဖူလုံရေးထည့်ဝင်ငွေဟာ ဖူလုံရေးစနစ်အကျုံးဝင် တဲ့ အာမခံအမျိုးအစားတွေနဲ့ သတ်မှတ်ထားတဲ့အကျိုးခံစားခွင့်တွေရ ရှိဖို့ထည့်ဝင်ရတာဖြစ်ပြီး ၂၀၁၂ခုနှစ်မှာ ပြဋ္ဌာန်းထားတဲ့လူမှုဖူလုံရေးဥပဒေအရ အာမခံအမျိုးအစား ၆မျိုးရှိပြီး
အဲ့ဒီ့ထဲတွင် နံပါတ်(၁)အမျိုးအစား ကျန်းမာရေးနှင့်လူမှုရေးစောင့်ရှောက်မှုအာမခံစနစ် နဲ့ နံပါတ်(၃)အမျိုးအစား အလုပ်တွင်ထိခိုက်မှုအကျိုးခံစားခွင့်အာမခံစနစ် စတဲ့ အာမခံစနစ်အမျိုးအစား၂ခုကိုသာအကောင်အထည်ဖော်ဆောင်ရွက်နေတာဖြစ်ပြီး ကျန်တဲ့အာမခံစနစ်တွေကိုတော့ အကောင်အထည်ဖော်နိုင်ခြင်းမရှိသေးပါဘူး။
လူမှုဖူလုံရေး ဥပဒေပါ လက်ရှိကျင့်သုံးနေတဲ့ အာမခံစနစ် ၂မျိုးအရ အလုပ်သမားများခံစားခွင့်ရှိတဲ့ အကျိုးခံစားခွင့်တွေအနေနဲ့ (၁)ကျန်းမာရေးနဲ့လူမှုရေးစောင့်ရှောက်မှုအာမခံစနစ်အရ ခံစားခွင့်ပေးထားတဲ့ အခြေအနေ ၁၀ မျိုးရှိပါတယ်။ ၎င်းတို့မှာ
( ၁) ဆေးကုသမှုခံစားခွင့် ၊
(၂) မကျန်းမာမှုအကျိုးခံစားခွင့် ၊
(၃)မီးဖွားမှုအကျိုးခံစားခွင့် (မီးဖွားစရိတ်) ၊
(၄)ကိုယ်ဝန်ပျက်မှုအတွက်ငွေကြေးအကျိုးခံစားခွင့် ၊
(၅) ၁နှစ်အောက်ကလေးမွေးစားမှုအတွက်အကျိုးခံစားခွင့် ၊
(၆)ဖခင်ဘဝဖြစ်မှုအကျိုးခံစားခွင့်(ဖခင်ဘဝဖြစ်မှုအတွက် မီးဖွားစရိတ်) ၊
(၇)အာမခံအလုပ်သမားများရဲ့မွေးကင်းစကလေးအား၁နှစ်အထိဆေးကုသမှုခံယူခွင့် ၊
(၈)မည်သည့်အကြောင်းကြောင့်မဆိုသေဆုံးခြင်းအတွက် နာရေးစရိတ် ၊
(၉) ဆေးဖိုးခရီးစရိတ်များပြန်လည်ထုတ်ပေးခြင်း ၊
(၁၀) ၂၀၁၂ခုနှစ် လူမှုဖူလုံရေးဥပဒေအရ လပေါင်း ၁၈၀နဲ့အထက် ထည့်ဝင်ကြေးပေးသွင်းထားပြီသူများပင်စင်ယူသည့်အခါဆေးကုသမှု ဆက်လက်ခံယူခွင့် စတဲ့အခြေအနေ ၁၀ ခုဖြစ်ပါတယ်။
နောက်ထပ်အာမခံစနစ်ဖြစ်တဲ့ ( ၂)အလုပ်တွင်ထိခိုက်မှုအာမခံစနစ်အရ ခံစားခွင့်ပေးထားတဲ့ အခြေအနေတွေအနေဖြင့်လည်း ၃မျိုးရှိပါတယ်။၎င်းတို့မှာ
(၁)ဆေးကုသမှုခံစားခွင့် ၊
(၂)ယာယီမသန်စွမ်းဖြစ်မှု အမြဲတမ်းမသန်စွမ်းဖြစ်မှုတို့အတွက် ငွေကြေးအကျိုးခံစားခွင့် ၊
(၃) အလုပ်တွင်ထိခိုက်မှုကြောင့်သေဆုံးမှုအတွက်ကျန်ရစ်သူငွေကြေးအကျိုးခံစားခွင့် စတဲ့ အကျိုးခံစားခွင့်တွေကို ဖူလုံရေးအကျုံးဝင်အလုပ်သမားတွေအနေနဲ့ရရှိမှာလည်းဖြစ်ပါတယ်။
"လူမှုဖူလုံရေးက ဘာကြောင့် ထည့်ဝင်ရတယ်။ ဘာတွေ လုပ်နိုင်တယ်ဆိုတာ မသိတဲ့အလုပ်သမားတွေအများကြီးရှိနေတယ်။ အလုပ်သမားတွေအနေနဲ့ သေချာသိရှိဖို့ နဲ့ ဘယ်လိုအထောက်အပံ့တွေရှိလဲဆိုတာ ဖူလုံရေးဌာနနဲ့ ဖူလုံရေးကြေးဖြတ်တဲ့ လစာငွေပေးတဲ့ နေရာက ဝန်ထမ်းတွေကလည်း မိမိတို့ရုံးဌာနဖြစ်စေ ၊ ကုမ္ပဏီ ပိုင်းကဖြစ်စေ အလုပ်သမားတွေအားလုံးကို ပြောပြအသိပေးထားရင် တော့ ဖူလုံရေးနဲ့ပတ်သက်ပြီး အလုပ်သမားတွေ အကျိုးခံစားခွင့်အတော်များများရှိလာမှာပါ"လို့ အလုပ်သမားအရေးဆောင်ရွက်နေသူ တစ်ဦးကပြောပါတယ်။
လစာငွေမှလူမှုဖူလုံရေးကြေးထည့်ဝင်ထားတဲ့ အလုပ်သမားတွေအနေနဲ့နိုင်ငံတွင်းအကောင်အထည်ဖော်လုပ်ဆောင်နေတဲ့ လူမှုဖူလုံရေးအာမခံစနစ် ၂မျိုးအရ အလုပ်သမားတွေရဲ့ ခံစားခွင့်တွေက ကျန်းမာရေးအရဆေးကုသခွင့်တွေနဲ့ ဆေးကုသစရိတ် ၊ လျော်ကြေးစရိတ် ငွေကြေးတွေကို သတ်မှတ်ရာခိုင်နှုန်းအလိုက် ရရှိနိုင်တယ်လို့သိရပါတယ်။
