လူမှုဖူလုံရေး ဥပဒေအရ ဖူလုံရေးကြေး ထည့်ဝင်ပေးသွင်းထားတဲ့ လုပ်သားတွေအနေနဲ့ လုပ်ငန်းခွင်ထိခိုက်မှု ဖြစ်ပေါ်ပါက ဖူလုံရေးစရိတ်ကိုတောင်းခံနိုင်ပြီး အလုပ်သမားရဲ့ထိခိုက်မှုအခြေအနေနဲ့ တစ်လစာလုပ်ခ လစာအပေါ်မူတည်ပြီး လစာရဲ့၇၀ ရာခိုင်နှုန်းကို ထိခိုက်မှုအတွက် ကုသမှုမပြီးမချင်း ထုတ်ပေးလျှက်ရှိနေကြောင်း အသိပေးထားပေမဲ့ အမှန်တကယ်မှာတော့ သတ်မှတ်ချက်တွေကြောင့် အလုပ်သမားက ခံစားခွင့် မရရှိတာနဲ့ ရရှိတဲ့အခါမှာလည်း ကြန့်ကြာမှုတွေရှိနေတယ်လို့ အလုပ်သမားတွေထံက သိရပါတယ််။
အာမခံလုပ်သားတွေ လုပ်ငန်းခွင်ထိခိုက်မှုမှာ - ယာယီမသန်စွမ်းမှုအကျိုးခံစားခွင့် နဲ့ အမြဲတမ်းမသန်စွမ်းဖြစ်မှု ငွေကြေးအကျိုးခံစားခွင့်ဆိုပြီး အခြေအနေ ၂မျိုးရှိရာ ယင်းအခြေအနေ ၂မျိုးအတွက် ဖူလုံရေးခံစားခွင့်ကိုတောင်းခံရာမှာလည်း အခြေအနေတစ်ခု ချင်းအလိုက် အထောက်အထားများနဲ့တောင်းခံရမယ်လို့သိရပါတယ်။
လုပ်ငန်းခွင်ထိခိုက်မှု အရ ယာယီမသန်စွမ်းဖြစ်မှုအကျိုးခံစားခွင့်တောင်းရာတွင် လိုအပ်တဲ့အထောက်အထားတွေအနေနဲ့ (၁) အလုပ်တွင်ထိခိုက်မှုအစီရင်ခံစာ ပုံစံ (၃၆, ၃၇)ကို ထိခိုက်မှုဖြစ်ပြီး ၂၄နာရီအတွင်း တင်ပြရန် ၊ (၂) ယာယီမသန်စွမ်းမှုအကျိုးခံစားခွင့်တောင်ခံလွှာ( ပုံစံ ၃၉) ၊(၃) သက်ဆိုင်ရာ ဆရာဝန်မှ ဆေးကုသမှုပေးထားသည့် ယာယီမသန်စွမ်းမှု ဆေးလက်မှတ် နဲ့ ငွေထုတ်ယူချိန်မှာ လူမှုဖူလုံရေးအာမခံစီစစ်ရေးကတ်ပြားနဲ့ထုတ်ယူလိုသူရဲ့မှတ်ပုံတင်မူရင်း တို့ လိုအပ်ပါတယ်။
နောက်ထပ် လုပ်ငန်းခွင်ထိခိုက်မှု အခြေအနေတစ်မျိုးဖြစ်တဲ့ အမြဲတမ်းမသန်စွမ်းဖြစ်မှု အကျိုးခံစားခွင့်တောင်း ရာမှာ လိုအပ်တဲ့အထောက်အထားတွေကတော့ (၁) အမြဲတမ်းမသန်စွမ်းမှုအကျိုးခံစားခွင့်တောင်းဆိုလွှာပုံစံ-၄၀ ၊ (၂) ဆရာဝန် ရဲ့ နောက်ဆုံးဆေးခွင့်ပေးထားတဲ့ ဆေးစာ ၊(၃) လုပ်အားဆုံးရှုံးမှုရာခိုင်နှုန်း အတည်ပြု သတ်မှတ်အကြောင်းကြားစာ နဲ့နဲ့ ငွေထုတ်ယူချိန်မှာ လူမှုဖူလုံရေးအာမခံစီစစ်ရေးကတ်ပြားနဲ့ထုတ်ယူလိုသူရဲ့မှတ်ပုံတင်မူရင်း တို့ လိုအပ်ပါတယ်။
"လုပ်ငန်းခွင်ထိခိုက်မှုအတွက်က ထိခိုက်မှုဖြစ်ဖြစ်ချင်း ၂၄နာရီအတွင်းအကြောင်းကြားရမယ် ဆိုတာက နည်းနည်းတော့ အခက်ခဲရှိတယ်။ ထိခိုက်မှုဖြစ်တဲ့သူက ကုသမှုကိုအရင်လုပ်နေတော့ အကြောင်းကြားဖို့တော်ရုံဆိုမေ့တတ်ကြတယ်။ အဲ့ဒါလေးတော့ဖူလုံရေးဘက်ကစဉ်းစားပေးစေချင်တယ်။ ထိခိုက်မှုအတွက်က လုပ်ငန်းစဉ် မြန်ရင်မြန်သလို ၂ပတ်အတွင်းစရိတ်ကိုထုတ်နိုင် မယ်။ အချို့နှစ်တွေလတွေ အရမ်းကြာနေတာက တစ်ခုခုကြောင့် ကြန့်ကြာနေတာဖြစ်မယ်လို့ အာမခံလုပ်သားတွေ စရိတ်ပြန်ထုတ်သူတွေဆီကနေကြားနေရတာတွေရှိတယ်။ ပြည်တွင်းမှာ ဖူလုံရေးအာမခံထည့်ထားတဲ့လုပ်သားက ၂ သန်းကျော်ရှိတယ်ဆိုပေမယ့် တစ်ကယ့်စရိတ်ထုတ်ပြန်ထုတ်ပေးရတဲ့လုပ်သားက ၃ ထောင်ခန့်ပဲရှိတယ်လို့လည်းသိထားရတော့ လုပ်ငန်းခွင်ထိခိုက်မှုကိစ္စတွေမှာတော့ ဖူလုံရေးစရိတ်ကို အမြန်ဆုံး ရကြစေချင်တယ်လို့"ပုဂ္ဂလိက လုပ်ငန်းတစ်ခုမှ ဖူလုံရေးကြေးထည့်ဝင်ထားတဲ့ အာမခံလုပ်သားတစ်ဦးကပြောထားပါတယ်။
လုပ်ငန်းခွင်ထိခိုက်မှုအာမခံ စရိတ်ကို လူမှုဖူလုံရေးဌာနက ထုတ်ပေးရာမှာ ပြီးခဲ့တဲ့နှစ်အတွင်း လုပ်ငန်းခွင်ထိခိုက်မှုတွေအတွက် အမှု ၃၂၅မှုကျော်ကို ငွေကျပ်သန်းပေါင်း ၁၆၀၀ အထိ အာမခံအလုပ်သမားတွေအတွက်ခွင့်ပြုထုတ်ပေးထားတယ်လို့ လူမှုဖူလုံရေးဌာနက ထုတ်ပြန်ထားပါတယ်။
