29 စိန်ရွှေရတနာဆိုင် အပါအဝင်ရွှေဆိုင်အများစု အလုပ်သမားအပေါ်ဥပဒေနဲ့မညီတဲ့စာချုပ်မျိုးတွေအသုံးပြုနေဟုဆို

အလုပ်ရှင်အလုပ်သမားအကြား အလုပ်သမား ခွင့်ရက်ရယူရာမှာ ဥပဒေနဲ့မညီတဲ့စာချုပ်မျိုးတွေကို 29 ရတနာရွှေဆိုင်သာမက ရွှေဆိုင်အများစုက အသုံးပြုနေတယ်လို့ အလုပ်သမားအရေး ဆောင်ရွက်သူတွေရဲ့ ထောက်ပြချက်အရ သိရပါတယ်။

လတ်တလော လူမှုကွန်ရက်စာမျက်နှာမှာ 29 စိန်ရွှေရတနာဆိုင်ရဲ့ အလုပ်ရှင်နဲ့အလုပ်သမားအကြား ချုပ်ဆိုရတဲ့ ခွင့်ရက်ရယူခြင်းဆိုင်ရာသဘောတူစာချုပ်ထွက်ပေါ်လာခဲ့တာပါ။

အဆိုပါစာချုပ်ဟာ ဥပဒေနဲ့မညီတဲ့စာချုပ်ဖြစ်လို့ အလုပ်သမားအရေး လုပ်ဆောင်သူတွေတင်မက လူမှုကွန်ယက်အသုံးပြုသူတွေကြား ဝေဖန်မှုတွေရှိခဲ့တာဖြစ်ပါတယ်။

" အ၊လ၊ရ ဘာလုပ်နေသလဲမေးရမယ် ဥပဒေနဲ့မညီတဲ့ စာချုပ်တွေ စည်းကမ်းချက်တွေက ရွှေဆိုင်တိုင်းလိုလိုဖြစ် လုပ်ဆောင်နေကြတာပါပဲ" လို့ အလုပ်သမားများကိုကူညီနေသူတစ်ဦးက မှတ်ချက်ပြုထားပါတယ်။

အဆိုပါစာချုပ်မှာ ထည့်သွင်းချုပ်ဆိုရတဲ့အချက်မှာ တွေ့ရှိရတာကတော့ " ခွင့်ရက်ပြည့်သည့်နေ့တွင် လုပ်ငန်းခွင်သို့ ချက်ချင်းပြန်လည်ဝင်ရောက်ရမည်ဟု ဝန်ခံကတိပြုပါသည်။ ပျက်ကွက်ပါက တစ်ရက်လျှင် ဒဏ်ကြေးငွေ........ကျပ်ကိုပေးဆောင်ရမည်ဖြစ်ပါသည်။ ကုမ္ပဏီနှင့်ဝန်ခံကတိပြုသူတို့ နှစ်ဦးသဘောတူကတိစာချုပ်များအရ ဝန်ခံကတိပြုသူက ကုမ္ပဏီသို့ပေးသွင်းရမည့်ငွေ.......ကျပ်ကျန်ရှိသည်မှာမှန်ကန်ကြောင်း ဝန်ခံကတိပြုပါသည်။ အဆိုပါငွေအား ခွင့်ရက်ပြည့်ပြီး လုပ်ငန်းခွင်သို့ပြန်လည်ဝင်ရောက်ရမည့်နေ့မှစ၍ ၁၅ရက်ထက်နောက်ကျပါက တစ်လုံးတစ်ခဲတည်းအပြည့်အဝပေးဆပ်ပါမည်ဟု ဝန်ခံကတိပြုပါသည်" လို့ ထည့်သွင်းချုပ်ဆိုထားတာတွေ့ရပါတယ်။

ဒါ့အပြင် အလုပ်သမားအခွင့်အရေးချိုးဖောက်မှုတွေရှိတယ်ဆိုတဲ့ကိစ္စရပ်နဲ့ပတ်သက်ပြီး နစ်နာခဲ့ရတဲ့ အလုပ်သမားအနေနဲ့ အကူအညီတောင်းခံပါက ကူညီဆောင်ရွက်ပေးမယ်လို့ အလုပ်သမားအရေး လုပ်ဆောင်တဲ့အဖွဲ့ အစည်းတွေက အသိပေးထားပါတယ်။

"တိုင်ကြားသူ မရှိသော်လည်း public တွင် တည်ဆဲအလုပ်သမားဥပဒေနှင့် မညီညွတ်သည့် ကိစ္စ ရပ်များကို ခေါင်းရှောင်ရန်မသင့်ပါ။နစ်နာသူ ဟု ယူဆသည့် အလုပ်သမား တဦးဦး မှ လာရောက်ဆက်သွယ် အကူအညီတောင်းခံခဲ့ပါက လိုက်ပါဆောင်ရွက်ပေးပါမည်" လို့လည်း STUM က ဆိုထားပါတယ်။

အဆိုပါခွင့်ရက်စာချုပ်နဲ့ပတ်သက်ပြီး အလုပ်ရှင်အလုပ်သမားအကြား အဲဒီလိုစာချုပ် ခွင့်မျိုး က ဥပဒေ နဲ့မညီညွှတ်တာကြောင့် သက်ဆိုင်ရာ အလရ ရုံးကဝင်ရောက်စစ်ဆေးရန် လိုအပ်နေတယ်လို့လည်း STUM ကထောက်ပြထားပါတယ်။

ဓါတ်ပုံ-လူမှုကွန်ယက်