လူမှုဖူလုံရေးထည့်ဝင်ကြေးထည့်သွင်းထားတဲ့ အာမခံလုပ်သားတွေ ရဲ့ သားသမီးတွေ အတွက် ပညာသင်စရိတ်ထောက်ပံ့ငွေ လျှောက်ထားမှု ကို စက်တင်ဘာ ၁၆ ရက်နောက်ဆုံးထားလျှောက်ထားရမယ်လို့ အလုပ်သမားဝန်ကြီးဌာနက ဩဂုတ်လ ၂၆ ရက်မှာ ထုတ်ပြန်ကြေညာပါတယ်။
အလုပ်သမားဝန်ကြီးဌာန၊ လူမှုဖူလုံရေးအဖွဲ့ဟာ လူမှုဖူလုံရေးနည်းဥပဒေများ နည်းဥပဒေ ၁၃၅ အရ သတ်မှတ်တဲ့ အာမခံထားသူ ရဲ့ အများဆုံးလုပ်ခဝင်ငွေနဲ့ သားသမီးပညာသင်စရိတ် ခံစားခွင့်နှုန်းထားကို၂၀၁၂ ခုနှစ်၊လူမှုဖူလုံရေးဥပဒေပုဒ်မ ၁၀၃၊ ပုဒ်မခွဲ (ခ)ပါ လုပ်ပိုင်ခွင့်ကိုကျင့်သုံးပြီး၊ လူမှုဖူလုံရေးရန်ပုံငွေကိုအနည်းဆုံး ၃၆ လ ထည့်ဝင်ကြေး ပေးသွင်းထားတဲ့ အလုပ်သမားရဲ့ သားသမီးတွေကိုထောက်ပံ့ပေးသွားမှာဖြစ်ပါတယ်။
အာမခံလုပ်သားရဲ့ သားသမီးဟာ နိုင်ငံပိုင်ကျောင်းများတွင်ဖြစ်စေ၊ နိုင်ငံတော်ကအသိအမှတ်ပြုထားတဲ့ ကျောင်းများတွင် ဖြစ်စေ အချိန်ပြည့် ပညာသင်ကြားနေသူတွေ ဖြစ်ရမှာဖြစ်ကာ ၂၀၂၅-၂၀၂၆ ပညာသင်နှစ် က စပြီး ပညာသင်စရိတ်ထောက်ပံပေးမှာ ဖြစ်တယ်လို့ ဆိုပါတယ်။
ဒါကြောင့် လူမှုဖူလုံရေးအဖွဲ့ တွင်အကျုံးဝင်မှတ်ပုံတင်ထားတဲ့ အာမခံလုပ်သားတွေအနေနဲ့ သားသမီးပညာရေးစရိတ်တောင်းခံတဲ့ လျှောက်လွှာ ကို လာမယ့်စက်တင်ဘာ ၁၆ ရက် နောက်ဆုံးထားပြီး သက်ဆိုင်ရာမြို့နယ် လူမှုဖူလုံရေးရုံးကို ပေးပို့လျှောက်ထားရမယ်လို့ အလုပ်သမားဝန်ကြီးဌာနက အသိပေးကြေညာထားပါတယ်။
