ထိုင်းနိုင်ငံ ကို MOU စနစ်ဖြင့် အလုပ်သွား လုပ်ရန် အတွက် လိုင်စင်ရ အေဂျင်စီ ဖြင့် အလုပ်သမားဝန်ကြီးဌာန သတ်မှတ်ထားသည့် EC စာချုပ် ချုပ်ဆိုထားပြီး ရက်ပေါင်း ၉၀ ကျော်တဲ့ အထိ မသွားရတဲ့ အလုပ်သမား များစွာရှိနေပြီး နစ်နာမှု​တွေ ဖြစ်​ပေါ် ​နေတယ်လို့ အလုပ်သမားတွေ ထံကသိရပါတယ်။ 

ထိုင်းနိုင်ငံကို MOU စနစ်ဖြင့် တရားဝင် အလုပ်သွားရောက် လုပ်မယ့် အလုပ်သမားတွေနဲ့ ပို့ဆောင်ပေးမယ့် အေဂျင်စီ တို့ ဟာ အလုပ်သမားဝန်ကြီး ဌာနက ဖွင့်လှစ်ထားတဲ့ မြောက်ဒဂုံ အလုပ်သမားသင်တန်းကျောင်း ပင်လုံခန်းမ တွင် အလုပ်သမားဝန်ကြီးဌာန မှ အရာရှိများ ရှေ့မှာ သဘောတူစာချုပ် ချုပ်ဆိုရကာ စာချုပ်အတွင်း ရက်ပေါင်း၉၀အတွင်း အေဂျင်စီမှ ထိုင်းနိုင်ငံသို့ ပို့ဆောင်ပေးရမယ်လို့ ပါရှိကြောင်း သိရပါတယ်။ 

""ကျွန်မတို့ စာချုပ် ချုပ်ထားတာ ၅လကျော် ရှိပြီ အခုထိ မထွက်ရသေးဘူး အေဂျင်စီ ကို ဆက်သွယ်တော့လည်း ဟိုနေ့ သွားရမယ်ဒီနေ့သွားရမယ်နဲ့ အခုထိ မသွားရသေးဘူး ပိုက်ဆံတွေလည်းသွင်းထားတာ အတိုးတွေနဲ့ အခုဘာဆက်လုပ်ရမယ်မသိ ဖြစ်နေတယ်""လို့  နစ်နာသူအလုပ်သမား တစ်ဦးကပြောပါတယ်။ 

ထိုင်းနိုင်ငံ ကို သွားရောက်ဖို့ အေဂျင်စီ နဲ့ စာချုပ် ချုပ်ဆို ပြီး တစ်နှစ်ကျော် တဲ့ အထိ မသွားရတာတွေပါရှိတယ်လို့ သိရပါတယ်။ 

"အစ်မတို့ ဆို တစ်နှစ်ကျော်ပြီ  စုစုပေါင်း အယောက် ၅၀ အေဂျင်စီက အောင်ဘုန်းမြတ်ဟိန်း  တစ်ယောက်ကို ၃၂သိန်း ကျပ် ပေးထားတာ ၁၀သိန်းပဲ ပြန်ပေးပြီး ကျန်တာ တွေ လည်း ပြန်မပေးဘူး အာ့ကြောင့်အလုပ်သမားတွေ စုပြီး တိုင်ဖို့ လုပ်နေတယ်""လို့ နစ်နာသူအမျိူးသမီးတစ်ဦးကပြောပါတယ်။ 

ယခုကဲ့သို့ လိုင်စင်ရ အေဂျင်စီ မှ သတ်မှတ်စည်းကမ်း ချက်နဲ့ မညီဘဲဥပဒေ ချိုးဖောက်မှု တွေ ဖြစ်ပါက မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအသင်း(MOEAA) ကိုတိုင်ကြားနိုင်တယ်လို့ သိရပါတယ်။ 

""စာချုပ်ပါ သတ်မှတ်ရက် အတွင်း လုပ်ငန်းခွင်ကို အေဂျင်စီက မပို့ပေး နိုင် ဘူး အခုလို လိုင်စင်ရအေဂျင်စီ နဲ့ပက်သက်တာ ဖြစ်ရင် MOEAAကို တိုင်လို့ရတယ် ရုံးကဗိုလ်ကလေးဈေးမှတ်တိုင်နားမှာ အေဂျင်စီနာမည် ထိုင်းဘက်က အေဂျင်စီ နာမည် စက်ရုံ နာမည်နဲ့ ဘယ်နေ့ကစာချုပ်ချုပ်ခဲ့တယ်စတဲ့ အချက်အလက် တွေယူပြီး တိုင်လို့ရပါတယ်""လို့ MOEAAမှ အဖွဲ့ဝင်တစ်ဦးကပြောထားပါတယ်။ 

မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအသင်း(MOEAA) အနေဖြင့် အခုလို ကိစ္စရပ်တွေ ကို ဖြေရှင်း ဆောင်ရွက်ပေးနေတယ်လို့လည်း  သိရပါတယ်။