ပြည်ပမှာတရားဝင် သွားရောက် အလုပ် လုပ်ကိုင်ဖို့ အတွက် ချုပ်ဆိုရတဲ့ အလုပ်ခန့်ထားမှုဆိုင်ရာသဘောတူစာချုပ် ချုပ်ဆို ပြီး သတ်မှတ်ကာလအတွင်း အလုပ်သမားကို စေလွှတ်မှုမရှိတဲ့ အေဂျင်စီတွေအနေနဲ့ အလုပ်သမားကပေးသွင်းထားတဲ့ ငွေကြေးကို ပြန်ပေးရမယ့် အပြင် ဒဏ်ကြေး အဖြစ် အလုပ်သမားတစ်ဦးလျှင် ကျပ်လေးသိန်းနှုန်းနဲ့ အလုပ်သမားဝန်ကြီးဌာနကိုပေးဆောင်ရမယ်လို့ သတ်မှတ်လိုက်ပါတယ်။
ဩဂုတ်လ ၁၃ ရက်က ထုတ်ပြန်လိုက်တဲ့ ပြည်ပအလုပ်အကိုင်လုပ်ငန်းဆောင်ရွက်နေမှုအပေါ် အရေးယူဆောင်ရွက်မည့်အကြောင်းအရာအမျိုးစားသတ်မှတ်ခြင်း မှာ စည်းကမ်းမလိုက်နာတဲ့အေဂျင်စီ တွေ ကို အခုကဲ့သို့ ဒဏ်ကြေး ပါ ပေးဆောင်ရမယ်လို့ သတ်မှတ်ခဲ့တာဖြစ်ပါတယ်။
၎င်းသတ်မှတ်ချက်တွေထဲ မှာ အလုပ်ခေါ်စာရရှိပြီး ဝန်ဆောင်ခ များ ရယူကာ အကြောင်းအမျိုူမျိုးကြောင့် စေလွှတ်နိုင်မှုမရှိသဖြင့် တိုင်ကြားခံရခြင်း ကို ပြေလည်အောင် ဖြေရှင်းပေးနိုင်မှုမရှိခြင်း ၊အလုပ်ခန့်ထားမှု ဆိုင်ရာသဘောတူစာချုပ်ချုပ် ဆိုပြီး ၃လ အတွင်း အကြောင်းအမျိုးမျိုးဖြင့် စေလွှတ်နိုင်မှုမရှိခြင်း နဲ့ အလုပ်သမားများ စုဆောင်းပြီး ဝန်ဆောင်ခ များကောက်ခံထားပြီး စေလွှတ်ပေးနိုင်မှု မရှိခြင်း တို့ကို စိစစ်တွေ့ရှိပါက အလုပ်သမား များထံ မှ ကောက်ခံထားတဲ့ ငွေကြေး အားလုံး ကို အလုပ်သမား ထံ ပြန်လည်ပေးအပ်ရမယ့်အပြင်အလုပ်သမား တစ်ဦး အတွက် ကျပ်လေးသိန်းနူန်း နဲ့ ဒဏ်ကြေးပေးဆောင်ရမယ်လို့ သတ်မှတ်ထားပါတယ်။
"အခုအရေးယူမှုမှာကဒဏ်ကြေးတွေ တိုးလိုက်တယ် ထိုင်းဆိုရင် စာချုပ်ချုပ်ပြီး ၃လ အတွင်း ထွက်ရမယ် စေလွှတ်နိုင်မှု မရှိဘူးဆိုရင် အလုပ်သမားတွေ ပေးထားတဲ့ ငွေ အပြင် ဒဏ်ကြေးဆိုပြီး အလုပ်သမားတစ်ဦး အတွက် လေးသိန်းနှုန်းနဲ့ ဝန်ကြီးဌာနကို ဆောင်ရမှာဆိုတဲ့ သဘော ဖြစ်တယ် ""လို့ အေဂျင်စီတစ်ခုမှ တာဝန်ရှိသူတစ်ဦးကပြောပါတယ်။
ပြည်ပအလုပ်အကိုင်အကျိုးဆောင်လိုင်စင်ရအေဂျင်စီများ ကို ပြည်ပအလုပ်အကိုင်လုပ်ငန်းဆောင်ရွက်နေမှုအပေါ် အရေးယူဆောင်ရွက်မည့်အကြောင်းအရာအမျိုးစားသတ်မှတ်ခြင်း အမိန့်ကြော်ညာစာကို ပြီးခဲ့တဲ့ ဇူလိုင် ၁၆ရက် က ထုတ်ပြန်ခဲ့ပြီး လိုင်စင်ရအေဂျင်စီတွေ ထံ ဩဂုတ် ၁၃ ရက်က လိုက်နာဆောင်ရွက်ရန် အကြောင်းကြားခဲ့တယ်လို့ သိရပါတယ်။
