ကိုရီးယားမှာ အလုပ်လုပ်ကိုင်နေကြတဲ့ ရွှေ့ပြောင်းလုပ်သားတွေဟာ လုပ်ငန်းခွင်တွင်းဖိအားတွေနဲ့ မိသားစုရဲ့ စိတ်ဖိစီးမှုတွေကြောင့် မိမိကိုယ်ကို အဆုံးစီရင်သူတွေ ရှိနေပါတယ်။
ဒီအရေအတွက်ဟာ လုပ်ငန်းခွင်တွင်း ထိခိုက်မှုကြောင့် ကွယ်လွန်သူအရေအတွက်နဲ့ ညီမျှနေတယ်လို့ တောင်ကိုရီးယားနိုင်ငံ အလုပ်သမားဝန်ကြီးဌာန ကလည်း ထုတ်ပြန်ထားပါတယ်။
တောင်ကိုရီးယားနိုင်ငံ အလုပ်သမားဝန်ကြီးဌာနရဲ့ ထုတ်ပြန်ချက်အရတော့ ၂၀၂၀ ခုနှစ်နောက်ပိုင်းမှာ လုပ်ငန်းခွင် ထိခိုက်မှုကြောင့် ကွယ်လွန်သူ (၃၆) ဦး ရှိခဲ့ပါတယ်။
ဒါ့အပြင် မိမိကိုယ်ကို အဆုံးစီရင်သူကလည်း (၃၂) ဦးထိ ရှိခဲ့ပြီး အရေအတွက် ညီမျှနေတယ်လို့ သိရပါတယ်။
“လုပ်ငန်းခွင် ဖိစီးမှုက အရမ်းများတယ်လို့ဆိုရပါမယ်။ ကိုရီးယားနိုင်ငံဖွံ့ဖြိုးတာက ၁၀စုနှစ်လောက်ပဲ ရှိသေးတော့ အလုပ်နဲ့ပတ်သက်ရင် ကိုယ့်ကိုယ်ကိုတောင် မပိုင်ဘူးလို့ ပြောလို့ရပါတယ်။ အထူးသဖြင့် ရွှေ့ပြောင်းအလုပ်သမား တွေအတွက် စိတ်အဖိစီးဆုံးအရာက လွတ်လပ်စွာ လုပ်ငန်းခွင်ပြောင်းခွင့်မရသေးတာက အဆိုးဆုံးလို့ ပြောရပါမယ်။ နောက်ဒီကိုလာတဲ့ အများစုက E-9 ဗီဇာနဲ့လာကြတာဖြစ်ပြီး 3Dခေါ်(Dirty,Dangerous,Difficult) ဆိုတဲ့ အလုပ်တွေ လုပ်ဖို့လာကြတာဖြစ်ပါတယ်။ကိုရီးယား ရောက်လာတော့ ဘာသာစကား အခက်အခဲတွေ လုပ်ငန်းခွင်အခက်အခဲတွေ၊ မိသားစုဆီကလာတဲ့ စိတ်ဖိစီးမှုတွေပေါင်းပြီး စိတ်ကျရောဂါကြောင့် ဒီလမ်းကို ရွေးချယ်ကြတာ ဖြစ်မယ်ထင်ပါတယ်”လို့ ကိုရီးယားနိုင်ငံမှာ အလုပ်လုပ်ကိုင်နေတဲ့ မြန်မာအမျိုးသားတစ်ဦးက ပြောပါတယ်။
လက်ရှိမှာ ကိုရီးယားနိုင်ငံက သတင်းစာတိုက်ကြီး တစ်ခုဖြစ်တဲ့ ဟန်းဂယော်လဲ့နဲ့ ရွှေ့ပြောင်းသူ လူ့အခွင့်အရေး အဖွဲ့အစည်းတွေက အတူစုပေါင်းပြီး ကိုရီးယားရောက် ရွှေ့ပြောင်းလုပ်သားတွေ မိမိကိုယ်ကို အဆုံးစီရင်ကြတဲ့ အကြောင်းရင်းကို ပြေလည်စေဖို့ အထူးသတင်းထုတ်ပြန်ဖို့ စီစဉ်နေကြတာတယ်လို့ မြန်မာအလုပ်သမား လူမှုဖူလုံရေးစင်တာ (ကိုရီးယား) က သိရပါတယ်။။
“ဒီလိုသတင်းတွေ ထွက်လာရင်တော့ ကိုရီးယားမှာရှိတဲ့ ရွှေ့ပြောင်းလုပ်သားတွေအတွက် ကောင်းမွန်တဲ့ အခြေအနေတစ်ခုတော့ မြှင့်တင်ပေးနိုင်ပါလိမ့်မယ်။ အခုက သတင်းထောက်နဲ့ ရွှေ့ပြောင်းသူလူ့အခွင့်အရေးအဖွဲ့ တွေက မြန်မာအလုပ်သမားလူမှုဖူလုံရေးစင်တာကို ဆက်သွယ်လာပြီး ကိုရီးယားရောက်မြန်မာလုပ်သားတွေထဲက မိမိရဲ့ အခန်းဖော်ဖြစ်စေ၊လုပ်ဖော်ကိုင်ဖက်ဖြစ်စေ ကိုယ့်ကိုယ်ကို အဆုံးစီရင်တကို မျက်မြင်ကြုံဖူးသူ၊ ဒီလိုကြုံတွေ့ရတော့ ဖြစ်ပေါ်ခံစားကြရတဲ့ နောက်ဆက်တွဲ စိတ်ပိုင်းဆိုင်ရာခံစားချက်တွေနဲ့ ပတ်သက်ပြီး အင်တာဗျူးလက်ခံမယ့်သူကို ရှာဖွေပေးဖို့ အကူညီတောင်းခံထားပါတယ်။ ဒီလိုအခြေအနေတွေကို ဖြေကြားပေးမယ့်သူရှိရင်လည်း စင်တာကိုဆက်သွယ်နိုင်ပါတယ်”လို့ စင်တာက တာဝန်ရှိသူတစ်ဦးက ပြောပါတယ်။
ကိုရီးယားနိုင်ငံဟာ နှစ်စဉ်လုပ်အားခ တိုးပေးနေတာကြောင့် ပြည်တွင်းက သွားရောက်လုပ်ကိုင်သူများတဲ့ နိုင်ငံဖြစ်ပါတယ်။
လက်ရှိမှာ အစိုးရချင်း ချိတ်ဆက်ပြီး လုပ်သားစေလွှတ်နေတာဖြစ်ပြီး ဒီနှစ်မှာတော့ အမျိုးသားလုပ်သားတွေတင်မကဘဲ အမျိုးသမီးလုပ်သားတွေပါ စတင်စေလွှတ်တော့မှာ ဖြစ်ပါတယ်။
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
