ရွှေပြည်သာမြို့နယ် ဝါးတရာစက်မှုဇုန်ရှိ GYSEN Myanmar Apparel အထည်ချုပ်စက်ရုံကို တရားမဝင် အချိန်ပိုခေါ်ယူမှုကြောင့် သက်ဆိုင်ရာ ဦးစီးဌာနမှ ဝင်ရောက်စစ်ဆေးရာ စက်ရုံတာဝန်ရှိသူတွေက အလုပ်သမားတွေကို ထွက်ပြေးခိုင်းခဲ့တယ်လို့ သိရပါတယ်။
"GYSEN ကအလုပ်သမားတွေကို ပုန်းခိုင်းတာ။ ထွက်ပြေးခိုင်းတာ" လို့ အလုပ်သမားနဲ့နီးစပ်သူက ဆိုပါတယ်။
GYSEN စက်ရုံကို ဩဂုတ် ၂၅ ရက် တနင်္ဂနွေနေ့က OT ခေါ်ယူခြင်း ကိုတိုင် ကြားခံရတဲ့အတွက် သက်ဆိုင်ရာ ဦးစီး မှူးတွေ ဝင်စစ်ဆေးစဉ် နေ့လည် ၁ နာရီ ၃၀ အချိန် စစ်ဆေးရန်လာရောက်သူများ စက်ရုံရှေ့ရောက်ချိန် စက်ရုံရဲ့အနောက်ပေါက်ကနေ အလုပ်သမား ၅၀၀ ကျော်ကို GYSEN ရုံ(3) ဂိုထောင် အတွင်းသို့ထွက်ပြေးခိုင်းခဲ့သလို HR ရုံးခန်းမှ လူများနှင့် Super များကလည်း ပုန်းခိုင်းခဲ့တာဖြစ်လို့ ထွက်ပြေးခဲ့ရတဲ့အလုပ်သမားများ ထိခိုက်ဒဏ်ရာရတာတွေပါရှိခဲ့တယ်လို့ သိရပါတယ်။
လာရောက်စစ်ဆေးမှုပြီးသွားလို့ပြန်သွားချိန် နေ့လည် ၂ နာရီ ခန့် တွင် လုပ်ငန်းခွင်ထဲ ပြန်လာရန် HR ရုံးခန်းမှ ထွက်ပြေးရတဲ့အလုပ်သမားတွေကို လာရောက်ခေါ်ယူခဲ့တာလို့ သိရပါတယ်။
GYSEN Myanmar အထည်ချုပ် စက်ရုံကို အမှတ် (- )ဝါးတရာစက်မှုဇုန်၊ ရွှေပြည်သာတွင် လုပ်သားအင်အား ၇၀၀ ကျော် ဖြင့် လွန်ခဲ့သော ၄ နှစ်ခန့်မှစတင်ဖွင့်လှစ်ခဲ့တာဖြစ်ပြီး လုပ်ငန်းရှင်က စက်ရုံရှိ တရားဝင်ဖွဲ့စည်းထားသော အလုပ်သမားသမဂ္ဂကို ဖြိုခွဲရန် အကြံဖြင့် အလုပ်သမားအခွင့်အရေးများ ချိုးဖောက်ကာ ၂၀၂၄ ၊ ဧပြီလ ၁၀ ရက်နေ့တွင် လုပ်သားလျှော့ချသည်ဟု အ ကြောင်းပြကာ သမဂ္ဂ ခေါင်းဆောင်တွေအပါ အလုပ်သမား ၅၀ ကို အလုပ်က ထုတ်ခဲ့တာလည်းဖြစ်ပါတယ်။
အဲ့ဒီလိုထုတ်ပယ်ပြီး နေ့စားဝန်ထမ်းတွေ ပြန်လည်ခေါ်ယူကာ လုပ်ငန်းလည်ပတ်တာကြောင့် လုပ်ငန်းရှင်သည် အမှန်တကယ် အော်ဒါမရှိခြင်းကြောင့် လုပ်သားအင်အား လျော့ချခြင်းမဟုတ်ဘဲ စက်ရုံရှိ အလုပ်သမားသမဂ္ဂ ခေါင်းဆောင်များကိုအလုပ်မှ ထုတ်ပယ်ရန်အတွက် ဟန်ပြ အလုပ်ထုတ်ခဲ့ခြင်းသာဖြစ်လို့ အလုပ်သမားညွှန်ကြားမှု ဦးစီး ဌာန သို့ လုပ်ငန်းရှင်အားအရေးယူပေးပါရန်တိုင်ကြားခဲ့သော်လည်း ယခုထိ အရေးယူဆောင်ရွက်ခြင်းမရှိသေးဘူးလို့လည်း သိရပါတယ်။
