ဇွန် ၂၄ ရက် တနင်္လာနေ့ နံနက် ၁၀ နာရီခွဲခန့်က တောင်ကိုရီးယားနိုင်ငံ ဆိုးလ် မြို့တော် တောင်ဘက် ဟွာဆောင်မြို့မှာရှိတဲ့ လစ်သီယမ်ဘက်ထရီစက်ရုံမှာ အကြီးစားပေါက်ကွဲမှုဖြစ်ပြီး မီးလောင်ကျွမ်းမှုဖြစ်ပွားခဲ့လို့ ရွှေ့ပြောင်း အလုပ်သမား ၂၂ ဦးသေဆုံးကာ ၂၃ ဦးပျောက်ဆုံးတယ်လို့ သိရပြီး မီးလောင်မှုဖြစ်တဲ့ ရက် ညနေ ၆နာရီ ၃၀ မိနစ်အထိ သေဆုံးသူ ၂၂ ဦးရှိကာ သေဆုံးသူတွေဟာ တရုတ်နိုင်ငံသား ၁၈ဦး၊ လာအိုနိုင်ငံသား တစ်ဦး၊ နိုင်ငံမသိသေးသူ တစ်ဦး၊ ကိုရီးယားနိုင်ငံသား ၂ဦးတို့ဖြစ်တယ်လို့သိရပါတယ်။
"ပျောက်ဆုံးနေတဲ့ ၂၃ ဦးထဲမှာ ၈ဦးရဲ့ ရုပ်အလောင်းများ ရှာဖွေတွေ့ရှိ၊ ၁၅ ဦး ရှာနေဆဲပါ။ အမှတ် ၃ အလုပ်ရုံမှာ ၆၇ ယောက် အလုပ် လုပ်ကိုင်နေကြပါတယ်" လို့ ကိုရီးယားမြန်မာချစ်ကြည်ရေးမှ ဦးဇော်မိုးအောင်က ဆိုထားပါတယ်။
အဆိုပါမီးလောင်ပေါက်ကွဲမှုဖြစ်နေစဥ် စက်ရုံရဲ့ဒုတိယထပ်မှာ အလုပ် လုပ်ကိုင်နေကြတဲ့အလုပ်သမားတွေဟာ ကိုရီးယားနိုင်ငံအတွင်းဝင်ရောက်လုပ်ကိုင်နေကြတဲ့ နိုင်ငံခြားသားအလုပ်သမားတွေဖြစ်ကြပြီး အဲ့ဒီအလုပ်သမား ၂၃ ဦးဟာညနေအထိ ပျောက်ဆုံးနေဆဲဖြစ်ပြီးညနေမှာတော့ ၈ ဦးရဲ့ရုပ်အလောင်းပြန်တွေ့ပြီး ၁၅ဦးဆက်လက်ပျောက်ဆုံးနေတယ်လို့ သိရပါတယ်။
"သူကဘက်ထရီတွေထုတ်တဲ့စက်ရုံဆိုတော့ ပေါက်ကွဲသံတွေကြားရတယ်။ မီးစတွေလမ်းပေါ်ထိလွင့်စင်တယ်။ ကျွန်တော်တို့အဆောင်ကနေမြင်နေရရင်းတောင် လန့်ရတယ်။ အဲ့စက်ရုံမှာကိုယ့်မြန်မာအလုပ်သမားလည်းရှိတယ်ကြားရတယ်" လို့ အလုပ်သမားတစ်ဦးက ဆိုထားပါတယ်။
အဆိုပါလစ်သီယမ် ဘတ်ထရီ စက်ရုံကို တောင်ကိုရီးယား၏ အထင်ကရ ဘက်ထရီထုတ်လုပ်သည့် ကုမ္ပဏီတစ်ခုဖြစ်သော Aricell က ပိုင်ဆိုင်ပြီး တောင်ကိုရီးယား၏ မြို့တော် ဆိုးလ်မြို့တောင်ဘက်၊ ဟွာဆုန်မြို့တွင် တည်ရှိကာ ကွန်ပျူတာနဲ့လက်ကိုင်ဖုန်းသုံးတဲ့ ဘက်ထရီတွေထုတ်လုပ်နေတဲ့ စက်ရုံဖြစ်တယ်လို့ သိရပါတယ်။
ဓါတ်ပုံ-Zaw Moe Aung (fb)