မလေးရှားနိုင်ငံ ကွာလာလမ်ပူမြို့ Jalan imbi ဧရိယာမှာရှိတဲ့ နိုင်ငံခြားသားအလုပ်သမားအများဆုံးရှိတဲ့ နေရာတွေကို ဧပြီ ၁၇ ရက် ညက မလေးရှား အာဏာပိုင်တွေက ဝင်ရောက်စစ်ဆေးမှုပြုလုပ်ရာ မြန်မာအပါအဝင် အထောက်အထားမပြည့်စုံတဲ့ နိုင်ငံခြားသား လုပ်သား ၅၀၀ ကျော် ဖမ်းဆီးခံခဲ့ရတယ်လို့ မလေးရှားလူဝင်မှုကြီးကြပ်ရေးဌာန JIM ရဲ့ ထုတ်ပြန်ချက်အရသိရပါတယ်။
ဖမ်းဆီးခံရသူ စာရင်းတွေအရ မြန်မာအလုပ်သမား ၄၆ဦး၊ ဘင်္ဂလားဒေ့ရှိ ၁၆၅ ဦး၊ နီပေါ ၁၄၂ ဦး၊ အင်ဒိုနီးရှား ၁၀၉ ဦး၊ ၊ အိန္ဒိယ ၂၅ ဦးနှင့် သီရိလင်္ကာ ၁၉ ဦးတို့ ပါဝင်တယ်လို့ သိရပါတယ်။
အဖမ်းရတဲ့ နိုင်ငံခြားသား လုပ်သား ၅၀၆ဦး တွင် အမျိုးသား ၄၄၈ ဦးနဲ့ အမျိုးသမီး ၅၈ဦး ဖြစ်ကာ အသက် ၂၅နှစ်မှ ၆၅နှစ်ကြား ရှိ သူတွေ ဖြစ်တယ်လို့ သိရပါတယ်။
"အခုနေရာက စက်ရုံ အလုပ်ရုံတွေနီးတော့ နိုင်ငံခြားသားလုပ်သားတွေ တိုက်ခန်းငှားပြီး နေကြတာ များတယ် အထောက်အထားမပြည့်စုံတဲ့ အိုသမားတွေလည်း များတယ် မြန်မာအလုပ်သမားတွေ လည်း အဲ့နေရာမှာ များတယ် မလေးရှား မှာက နေ့တိုင်း အဖမ်းဆီးက ရှိနေတာ အထောက်အထားမပြည့်စုံ တဲ့ သူတွေ ဆိုရင် အလုပ်သွားဖို့ အဖမ်းဆီးသတင်းအရင် လေ့လာပြီးမှ သွားရတယ် အဖမ်းဆီး ကြောင့် အလုပ်ပုံမှန် မသွားနိုင်တော့ စားဖို့ နေဖို့နဲ့ မိသားစုကို ပြန်ပို့ပေးဖို့ကို မလွယ်ကူကျတော့ဘူး ကိုယ့်နိုင်ငံ က လည်း မငြိမ်းချမ်းသေးတော့ ဒီမှာပဲ အဆင်ပြေသလို ရသလို နေရတာပဲ ကံမကောင်းလို့ အဖမ်းခံရ တော့လည်း ဖမ်းပေါ့ ဆိုတဲ့ စိတ်နဲ့ လုပ်နေရတာ""လို့ မလေးရှားရောက် မြန်မာလုပ်သားတစ်ဦးကပြောပါတယ်။
မလေးရှားအစိုးရ အနေနဲ့ အထောက်အထားစာရွက်စာတမ်း မရှိတာ၊ မှန်ကန်တဲ့ အထောက်အထားစာရွက်စာတမ်း ကိုင်ဆောင်မထားတဲ့ နိုင်ငံခြားသားလုပ်သားတွေ ကို လူဝင်မှုကြီးကြပ်ရေးအက်ဥပဒေနဲ့ ဖမ်းဆီးအရေးယူတာ ကို ယခုနှစ်ကုန်ပိုင်းအထိ ဆောင်ရွက်သွားမယ်လို့ သိရပါတယ်။
မလေးရှား အစိုးရ က မြန်မာအပါအဝင် တရားဝင် နိုင်ငံခြားသား လုပ်သားသစ်ခေါ်ယူမှု ကို ၂၀၂၄ ခုနှစ် ဧပြီ လကုန် ပိုင်းကစပြီး ယာယီရပ်နားခဲ့တဲ့ အတွက် မြန်မာလုပ်သားတွေ အနေနဲ့ မလေးရှား နိုင်ငံကို တရားမဝင် သွားရောက် အလုပ်လုပ်ကိုင်တာတွေ ပိုများလာတယ်လို့ သိရပါတယ်။
Photo-JIM
