အစားအသောက်တွေကို မှာယူသူတွေထံ အိမ်တိုင်ရာရောက် လိုက်လံပို့ဆောင်ပေးတဲ့ Food Panda Rider တွေအနေနဲ့ တောင်းဆိုချက်အချို့တောင်းဆိုရာမှ ကုမ္ပဏီဘက်က မလိုက်လျောနိုင်တဲ့အချက်တွေကြောင့် ဆက်လက်သပိတ်မှောက်သွားမယ်လို့ Rider တွေက ဒီကနေ့ ဧပြီ ၂၂ ရက်မှာထုတ်ပြန်လိုက်ပါတယ်။
ပြီးခဲ့တဲ့ မတ်လ ၁၆ ရက်နေ့က Rider များထံကြိုတင်အကြောင်းကြားတာမရှိဘဲ ကွန်ပျူတာ စနစ်အမှားအယွင်းဟုဆိုကာ အော်ဒါကြေးတွေ စတင်လျော့ချလိုက်တာ ဖြစ်တယ်လို့သိရပါတယ်။
Rider တွေ တောင်းဆိုတဲ့အချက် ၇ ချက်မှ အဓိကအချက်တွေဖြစ်တဲ့ အော်ဒါကြေးအနည်းဆုံး ၆၇၀ ကျပ် ပေးရန်နှင့် ခရီးအကွာအဝေးတွက်ချက်ရာတွင် google map အသုံးပြု တောင်းဆိုချက်များအား မလုပ်ဆောင်ပေးနိုင်ကြောင်း ခရီးအကွာအဝေး ၁ ကီလိုမီတာ လျှင် ၅၈၀ ကျပ်သာပေးမည်ဟု ကုမ္ပဏီဘက်က တုံ့ပြန်ခဲ့တာကြောင့် လုပ်အားခခေါင်းပုံဖြတ်ခြင်းဟု ယူဆကြောင်း ထုတ်ပြန်ချက်မှာဖော်ပြပါတယ်။
ဆက်လက်ပြီး Rider များတောင်းဆိုထားသော လုပ်အားခ အော်ဒါကြေးနှင့် အခွင့်အရေးများအား Food Panda Myanmar ကုမ္ပဏီဘက်မှ လိုက်လျောခြင်းမရှိပါက ဆက်လက်ပြီးလက်တွဲလုပ်ဆောင်ခြင်း မပြုလုပ်နိုင်ကြောင်းနှင့် Rider များမှ ဆက်လက် သပိတ်မှောက်သွားမယ်လို့ အဆိုပါ ထုတ်ပြန်ချက်မှာ ဖော်ပြထားပါတယ်။
