ပြည်ပအလုပ်အကိုင် အလုပ်သမားသက်သေခံကတ် OWIC ပြုလုပ်ခွင့်ပေးရန် စစ်ကောင်စီရဲ့ အလုပ်သမားဝန်ကြီးဌာနက နေပြည်တော် အလုပ်သမားရုံးချုပ်ကို စာတိုက်ကနေ လျှောက်ထား ခိုင်းပေမယ့် မတ်လ၂၅ ရက်အထိ ပြုလုပ်ခွင့် မချပေးသေးဘူး လို့ ပြည်ပထွက်မယ့်လုပ်သားတွေနဲ့လိုင်စင်ရအေဂျင်စီတွေထံမှ သိရပါတယ်။
ပြီးခဲ့တဲ့ဖေဖေါ်ဝါရီလ ဒုတိယအပတ်ကတည်းက OWICကတ် ထုတ်ပေးတဲ့ ရုံးတွေကို ကြိုတင်အကြောင်းကြားမှုမရှိဘဲ ယာယီပိတ်ခဲ့ပြီး မတ်လ ၁၀ ရက်နေ့မှာတော့ OWIC ကတ် အသစ်ပြုလုပ်လိုသူများအနေနဲ့ မတ်လ၂၀ရက် မှစပြီးအလုပ်သမားဝန်ကြီးဌာနကို တင်ပြထားတဲ့ အချက်အလက်တွေ စိစစ်ပြီး အစဉ်အလိုက် OWICကတ်ပြန်ထုတ်ပေးမယ် လို့ နိုင်ငံပိုင်သတင်းစာကနေကြေညာခဲ့ပါတယ်။
သို့သော် လက်ရှိအချိန်ထိ OWICကတ် ပြုလုပ်ရန် လျှောက်ထားတဲ့ အလုပ်သမား တွေကို စစ်ကောင်စီရဲ့ အလုပ်သမားဝန်ကြဌာနက OWIC ကတ် ပြုလုပ်ခွင့် မချပေးသေးဘူးလို့လည်းသိရပါတယ်။
"အခုက OWIC ကတ် ပြုလုပ်ခွင့်ပေးဖို့ လျှောက်ထားတာကိုပဲ လက်ခံသေးတယ်။ OWICကတ် ပြုလုပ်ဖို့ ခွင့်ပြုချက် ပြန်ချပေးတာ မရှိသေးဘူး။ OWICကတ်ထုတ်ပေးတဲ့ စက်တွေ ပြောင်းရွှေ့ပြင်ဆင်နေလို့ လေးလပိုင်းပထမအပတ်လောက်မှ ပြုလုပ်ခွင့်တွေ ပေးမယ်လို့ ကြားတယ် "လို့ လိုင်စင်ရအေဂျင်စီမှ တာဝန်ရှိသူ တစ်ဦးကပြောပါတယ်။
အခုလို OWIC ကတ်ပြုလုပ် မပေးသေးတဲ့ အတွက် ပြည်ပလုပ်သားပို့ဆောင်ပေးတဲ့ အေဂျင်စီတွေမှာ ဆုံးရှုံးနစ်နာမှုတွေဖြစ်သလို အလုပ်လုပ်ဖို့ စာချုပ်ချုပ်ဆိုထားတဲ့ လုပ်သားတွေမှာလည်း စိုးရိမ်မှုတွေဖြစ်ပေါ်နေတယ်ဟုသိရပါတယ်။
"ထိုင်း ကို သွားဖို့စာချုပ်ချုပ်ပြီးတာ ၃လ ပြည့်တော့မယ်။ အခုထိ သင်တန်းနဲ့ OWIC ကတ်ရိုက်ခွင့်မရသေးဘူး။ အေဂျင်စီ ကို ဖုန်းဆက်မေးတော့လည်း ဝန်ကြီးဌာနက မချပေးသေးတာလို့ ပြောတယ်။ ပိုက်ဆံတွေကလည်းသွင်းထားရတာဆိုတော့ အကယ်၍ များ မထွက်ရရင် ဆိုတဲ့ အတွေး တွေးမိရင် ညဘက်အိပ်ကိုမပျော်တော့ဘူး” လို့ ပြည်ပကိုအလုပ်သွားလုပ်ဖို့စီစဉ်ထားသူတစ်ဦးကပြောပါတယ်။
ဒါ့အပြင် OWICကတ် ပြုလုပ်ခွင့် မရသေးတဲ့ အတွက် ပြည်ပကနေ ခွင့်ဖြင့်ပြန်လာတဲ့လုပ်သားတွေ မှာလဲ အခက်ခဲ တွေ ဖြစ်ပေါ်နေတယ်လို့လည်းဆိုပါတယ်။
"သူတို့က စာတိုက်ကနေ ခွင့်ပြုချက် တောင်းပါဆိုလို့ ပို့ပြီးပြီ။ အခု စက်တွေပြင်ဆင်နေရတယ်ဆို တာကော ဟုတ်ပါ့မလား။ ပြည်ပ ကို ထွက်လို့မရအောင် အချိန်ဆွဲနေတာ မျိုး ဖြစ်နေပြီ။ လေးလပိုင်း မှ လုပ်ပေးမယ်ဆိုရင် သင်္ကြန်ပိတ်ရက်နဲ့ တင်ထားတဲ့သူကအများကြီး ဘယ်လိုတွေ အဆင်ပြေမလဲ ခွင့်ပြန်လုပ်သားတွေ အားလုံး အချိန်မီ လုပ်ငန်းခွင်မဝင်နိုင်ရင် ဆုံးရှုံးနစ်နာမှု တွေ ဖြစ်ကြမှာ"လို့ ခွင့်ပြန်လုပ်သားတစ်ဦးကပြောပါတယ်။
စစ်ကောင်စီရဲ့ အလုပ်သမားဝန်ကြီးဌာနရဲ့ ပြောင်းလဲလိုက်တဲ့ မူဝါဒ အရ ပြည်ပကို တရားဝင်အလုပ်သွားရောက်မယ့် လုပ်သား တွေအနေနဲ့ OWIC ကတ် ရိုက်နှိပ်ပြီးပါကလည်းပြည်ပထွက်ခွာ ခွင့်ပြုဖို့ကိုပါ အလုပ်သမားဝန်ကြီးဌာနထံ ခွင့်ပြုချက် တောင်းခံရဦးမှာ ဖြစ်ပါတယ်။
