ထိုင်းနိုင်ငံရှိ ဆောက်လုပ်ရေး လုပ်ငန်း တွင် လုပ်ကိုင်ရန် MOU ဖြင့်စာချုပ်ချုပ်ဆိုကာ တရားဝင် လာရောက်ပေမယ့် ထိုင်းကိုရောက်ရှိ အလုပ် လုပ်ရာမှာ စာချုပ်ချုပ်ထားတဲ့ အလုပ် နေရာ မဟုတ်တဲ့ အပြင် လုပ်ခလစာ မရတဲ့ အတွက် မြန်မာအလုပ်သမား ၁၆ဦး အခက်ခဲ ဖြစ်နေတယ်လို့ WAG အလုပ်သမားမဟာမိတ်အဖွဲ့နှင့် နစ်နာသူအလုပ်သမားတွေထံက သိရပါတယ်။ 

မြန်မာနိုင်ငံမှ GREAT SILVER LAND SERVICES CO.,LTD နှင့်ချိတ်ဆက်ကာ ထိုင်းနိုင်ငံ ၊ ဘန်ကောက်မြို့ ဟွေခွမ်ခရိုင်၊ လတ်ချဒါတွင်ရှိတဲ့ ကုမ္ပဏီ မှာ အလုပ် လုပ်ရန်အတွက် (၂ )နှစ်စာချုပ်ချုပ်ဆိုခဲ့ပြီး ၎င်းတို့သည်  ၂၀၂၄ခုနှစ် ဇူလိုင် ၃၁ရက် မှာ ဘန်ကောက်မြို့၊ ဒွန်းမောင်းလေဆိပ်သို့ရောက်ရှိခဲ့ပြီး တောမောင်းရုံးတွင် လက်ဗွေနှိပ်၊ ဝါ့ပါမစ်ကတ်များပြုလုပ်ခဲ့ကာ ည ၇နာရီ အချိန်မှာတော့  ကား၂စီးဖြင့်လာရောက်ခေါ်ဆောင်သွားပြီးနောက် မနက်မိုးလင်းမှ ချင်းမိုင်မြို့ သို့ ရောက်လာသည်ကိုသိရတယ်အလုပ်သမားတွေက ပြောပါတယ်။ 

လေယာဉ်ကွင်း မှာ  လာကြိုတဲ့ သူဌေးမက၎င်းတွင် အလုပ်မရှိသေးတဲ့ အတွက် ယခု ချင်းမိုင်းမြို့ရှိ SMC-(ဆောက်လုပ်ရေးဆိုက်) မှာ ခဏလုပ်ရန်လာပို့ခဲ့တာဖြစ်တယ်လို့ ပြောခဲ့ကာ ဩဂုတ် ၃ရက် နေ့ မှာ    အလုပ်စဆင်းရပြီး ပထမ (၁၅ )ရက် တစ်ဝက်စာ လုပ်အားခကိုရှင်းပေးခဲ့ပေမယ့်  (၈)လပိုင်း လဝက်စာနဲ့  (၉)လပိုင်း (၁)လစာ လုပ်အားခကို တော့ ယနေ့အချိန်ထိ မရှင်းပေးတဲ့ အတွက်အလုပ်သမားတွေမှာ အခက်ခဲ ဖြစ်နေရတယ်လို့ ဆိုပါတယ်။ 

"စာချုပ် ချုပ်တုန်းက ဘန်ကောက် က ဆောက်လုပ်ရေးဆိုပြီးချုပ်လာတာ ဒီရောက်တော့ ချင်းမိုင် ကို လာလုပ်ရတဲ့ အပြင် လစာက ၄၅ ရက်ခ မထုတ်ပေးသေးဘူး အလုပ်လည်းပေးမဆင်းဘူး အခု စားသောက်ရေးအတွက် လက်ထဲ ငွေ လဲ မရှိနဲ့ ဒုက္ခရောက်နေတာ တစ်လပြည့်တော့မယ် အေဂျင်စီ ဘက်ကလည်း အခုထိ ဘာမှ မလုပ်ပေးသေးဘူး""လို့နစ်နာသူအလုပ်သမားအမျိုးသမီးတစ်ဦးကပြောပါတယ်။ 

ယခုကဲ့သို့ လုပ်အားခ မရခြင်း အလုပ်မဆင်းရတဲ့ အပေါ် သက်ဆိုင်ရာအေဂျင်စီက လာရောက် မဖြေရှင်းပေးတဲ့ အတွက်  ထိုင်းရောက် အလုပ်သမား အရေး ကူညီပေးနေတဲ့ WAG အလုပ်သမား မဟာမိတ်အဖွဲ့ ထံ နစ်နာသူအလုပ်သမားတွေက အောက်တိုဘာ၁၂ရက်က  အကူညီတောင်းခံ လာတဲ့ အတွက် အလုပ်သမားအဖွဲ့ အနေနဲ့ ကူညီ ဖြေရှင်းပေးဖို့ လုပ်ဆောင်နေတယ်လို့ သိရပါတယ်။