ItaIian Thai DeveIopment Public Co,Ltd ရဲ့ ရေနက်ဆိပ်ကမ်းဆောက်လုပ်ရေးလုပ်ငန်းမှာ လုပ်ကိုင်နေတဲ့ မြန်မာလုပ်သား ၅၀၀ ဝန်းကျင်က လုပ်ခလစာမရတာကြောင့် အမှုဖွင့်တိုင်ကြားထားတယ်လို့ ထိုင်းအခြေစိုက် မြန်မာအလုပ်သမားအရေးဆောင်ရွက်နေသူတွေက ပြောပါတယ်။
ထိုင်းနိုင်ငံ၊ လယောင်မြို့၊ မတ်တာဖွတ်မှာရှိတဲ့ ItaIian Thai DeveIopment Public Co,Ltd ရဲ့ လုပ်ငန်းခွင်မှာ လုပ်ကိုင်နေတဲ့ မြန်မာ MOU လုပ်သား ၃၀၀ ကျော်နဲ့ CI လုပ်သား ၁၀၀ ကျော်က လုပ်ခလစာအတွက် ညှိနှိုင်းရာမှာ အဆင်မပြေတာကြောင့် အမှုဖွင့်တိုင်ကြားခဲ့တာလို့ သိရပါတယ်။
"ခုဆိုရင် လယောင်က ဆောက်လုပ်ရေးအလုပ်သမား ၅၀၀ ကျော် လုပ်ခလစာ တစ်လစာ မပေးလို့ အမှုဖွင့် တိုင်ကြား တာပါ။ လစာပြန်လည်ရရှိရေး ဆောင်ရွက်ပေးမှာပါ” လို့ မြန်မာအလုပ်သမား ကူညီစောင့်ရှောက်ရေး အဖွဲ့ WAG က တာဝန်ရှိသူက ပြောဆိုပါတယ်။
အလုပ်သမားတွေရဲ့ တလစာ လုပ်အားခ ဘတ်သိန်း ၆၀ ထုတ်မပေးတာကြောင့် မတ်လ ၇ ရက်က ညှိနှိုင်းဖြေရှင်းခဲ့ရာမှာ ကုမ္ပဏီဘက်က အလုပ်သမားခေါင်းဆောင်က လုပ်အားခ ၁၅ ရက်အတွက် ထုတ်ပေးမှာ ဖြစ်ပြီး နောက် ၁၅ ရက်အတွက် လုပ်အားခကိုတော့ မတ်လ ၂၀ ရက်မှ ထုတ်ပေးမယ်လို့ ပြောဆိုခဲ့ပါတယ်။ ဒီအစီအစဉ် ကို အလုပ်သမားတွေက လက်မခံတာကြောင့် မတ်လ ၈ရက်မှာ ချွန်ပူလီ ၊လယောင် အလုပ်သမား ရုံးကို သွားရောက် အမှုဖွင့်တိုင်ကြားခဲ့တာလို့ WAG အဖွဲ့ဆီက သိရပါတယ်။
ItaIian ThaI DeveIipment PIibuc Co,Ltd(ရေနက်ဆိပ်ကမ်းဆောက်လုပ်ရေးလုပ်ငန်း)တွင် ၀င်ရောက် လုပ်ကိုင် နေတဲ့ တခြား မြန်မာအလုပ်သမားကလည်း လုပ်ခလစာမရလို့ မတ်လ ၇ ရက်မှာ ဆန္ဒပြတောင်းဆိုခဲ့လို့ ပြေလည်မှု ရရှိခဲ့ပါတယ်။
