ထိုင်းနိုင်ငံက မြန်မာအလုပ်သမားတွေအတွက် မည်သူမည်ဝါဖြစ်ကြောင်း လက်မှတ်(CI) လျှောက်ထားရာမှာ ကုန်ကျစရိတ် အဖြစ် ဘတ်၂၆၇၀ သာ ကုန်ကျမှာဖြစ်တယ်လို့ ထိုင်းရှိမြန်မာအလုပ်သမားသံအရာရှိရုံးက စက်တင်ဘာ ၁၀ ရက်မှာ ထုတ်ပြန်ကြေညာပါတယ်။

 

CI လျှောက်ထား လိုတဲ့ အလုပ်သမားတွေဟာ နီးစပ်ရာ 7-Eleven စတိုးဆိုင်များ မှာ CI စာအုပ်ဖိုး ဘတ် ၂၆၇၀ ကိုပေးသွင်းပြီး မိမိအဆင်ပြေရာ CIစခန်းနဲ့ နေ့ရက်ကို ကိုရွေးချယ် ငွေပြေစာနဲ့အတူ CIစခန်းမှာ သွားရောက် ပြုလုပ်နိုင်တယ်လို့ ဆိုပါတယ်။

 

ဒါကြောင့် CI လျှောက်ထားရာမှာ ပေးငွေအဖြစ်ဘတ် ၂၆၇၀ သာကုန်ကျမှာဖြစ်လို့ မလိုလားအပ်တဲ့ ကုန်ကျစရိတ်တွေ မရှိစေဖို့ သတိပြုရန် အလုပ်သမားသံအရာရှိရုံးက အသိပေးထားပါတယ်။

 

အခုလို အလုပ်သမားသံအရာရှိရုံးရဲ့ CI လျှောက်ထား ဖို့အတွက် ကုန်ကျငွေ ထုတ်ပြန်တာဟာ မြေပြင်အခြေအနေနဲ့ ကုန်ကျစရိတ် ကွာဟနေတဲ့ အတွက် မြန်မာအလုပ်သမားတွေက ဝေဖန်ပြောဆို လျက်ရှိပါတယ်။

 

""ဘယ်သူမှ ၂၆၇၀ ဘတ်နဲ့ လုပ်မရဘူး ပွဲစားတွေနဲ့ လုပ်ရတာ တစ်ယောက်ကို ဘတ် ၅၀၀၀ ၊၆၀၀၀ လောက်ကုန်တယ် ပွဲစားနဲ့မလုပ်ဘဲ ကိုယ်တိုင်လုပ်မယ်ဆိုတော့ တုန်ကင်မရတာနဲ့ ဘာနဲ့ လုပ်မပေးဘူး ပွဲစားမပါရင် တောမောရုံးရော CI ရုံးရော လုပ်မပေးဘူး အချိန်ကုန် ငွေကုန်တာဘဲ အဖတ်တင်တယ်""လို့ CI သက်တမ်းတိုးအတွက်လျှောက်ထားသူမြန်မာလုပ်သားတစ်ဦးကပြောပါတယ်။

 

မည်သူမည်ဝါဖြစ်ကြောင်း လက်မှတ်ထုတ်ပေးရေး ကို ဩဂုတ်လ ၆ ရက်ကစပြီး စမုစခွန်၊ စမုပရာကန်၊ ချင်းမိုင်၊ ဆူရတ်ဌာနီပြည်နယ်များတွင်စခန်းလေးခုဖြင့် ဖွင့်လှစ်ဆောင်ရွက်ပေးလျက်ရှိရာ လက်ရှိမှာ CI သက်တမ်းကုန်သူတွေ အတွက် သက်တမ်းတိုးလုပ်ငန်းစဉ်တွေ ဦးစွာဆောင်ရွက်ပေးလျက်ရှိကြောင်းသိရပါတယ်။