မလေးရှားရှိ အထောက်အထား မပြည့်စုံတဲ့ မြန်မာ အလုပ်သမားတွေကို မြန်မာသံရုံး ကနေ ထုတ်ပေးတဲ့ မည်သူမည်ဝါဖြစ်ကြောင်း သက်သေခံ လက်မှတ် Certificate of Identity (CI) ဖြင့် မြန်မာနိုင်ငံ ကို ပြန်ကြမယ့် နိုင်ငံသားတွေ အနေနဲ့ မလေးရှား အစိုးရ က ဒဏ်ကြေးငွေ လျော့ပေါ့ ပေးနေတဲ့ ကာလ အတွင်းမှာ မလေးရှားလူဝင်မှုကြီးကြပ်ရေး ရုံးတွေ မှာ Exit pass ကို မဖြစ်မနေ လျှောက်ထားဖို့ မြန်မာသံရုံး ကွာလာလမ်ပူမြို့ က မေလ ၂၁ ရက် မှာ အသိပေးထားပါတယ်။
မလေး ရှားအစိုးရအနေနဲ့ ၂၀၂၄ ခုနှစ် မတ်လ ၁ ရက် ကနေ ဒီဇင်ဘာ ၃၁ရက် အထိ မလေးရှား နိုင်ငံ အတွင်း တရားမဝင်ရောက်ရှိနေတဲ့ နိုင်ငံခြားသားတွေ ကို မူရင်းနိုင်ငံသို့ နိုင်ငံကူးလက်မှတ် သိူ့မဟုတ် CI တို့နဲ့ အတူ အပြန်လေယာဉ် မှတ်တို့ ဖြင့် မလေးရှား လူဝင်မှုကြီးကြပ်ရေး ရုံးတွေမှာ သတ်မှတ်ဒဏ်ကြေး ရင်းဂစ် ၅၀၀ နဲ့ Exit pass အတွက် ရင်းဂစ် ၁၀၀ တို့ကို ပေးဆောင်ပြီး ၁၄ ရက် အတွင်း မလေးရှား နိုင်ငံ မှ ထွက်ခွာနိုင်တယ်လို့ ထုတ်ပြန်ထားပါတယ်။
လက်တလောမှာလည်း မလေးရှားနိုင်ငံအတွင်း တရားမဝင် နိုင်ငံခြားသား အလုပ်သမား တွေကို စီမံချက်နဲ့ ဖမ်းဆီး တာတွေကို နိုင်ငံတဝန်း လုပ်ဆောင်နေပြီး အထောက်အထားမပြည့်စုံတဲ့ မြန်မာနိုင်ငံသားတွေ လည်း အဖမ်းဆီးခံရမှု များနေတယ်လို့ သိရပါတယ်။
"အခုရက်ပိုင်း အဖမ်းအဆီးတွေ အရမ်းများတယ် အဲ့တော့ အထောက်အထားမပြည့်စုံတဲ့ သူတွေ အနေနဲ့ ပြန်မယ်ဆိုရင် အခုကာလ ထဲ မှာ exit pass လျှောက်ပြီး ပြန်တာ ကောင်းတယ်၊ အဖမ်းခံရတယ်ဆိုရင်
ထောင်ဒဏ်လဲ ကျခံရအုံးမယ် အခု မလေးအစိုးရ ခွင့်ပြုပေးတဲ့အချိန် ဆိုတော့ ဒဏ်ကြေးဆောင်ပြီး လေယာဉ်နဲ့ အေးဆေးပြန်လို့ရတာပေါ့"လို့ မလေးရှားရောက် မြန်မာအလုပ်သမားတစ်ဦးကပြောပါတယ်။
ထိုသို့ ပြန်ရန် အတွက် မလေးရှား လဝကရုံးမှာ Exit pass ထုတ်ယူထားပြီး တဲ့ မြန်မာ နိုင်ငံ သားတွေ အနေနဲ့ မလေးရှား နိုင်ငံ မှ ပြန်လည်ထွက်ခွာဖို့ သက်မှတ်ရက် မတိုင် ခင် မှာ အော်ပရာဇီ ဖမ်းစီးမှု များ နဲ့ ကြုံပါက နိုင်ငံကူးလက်မှတ် သို့မဟုတ် CIစာရွက်၊ လေယာဉ်လက်မှတ်၊ မလေးရှား လ. ဝ .က မှာ ဒဏ်ကြေး ဆောင်ထားသည့် လက်ခံစာရွက်နဲ့ မလေးရှားနိုင်ငံ မှ ပြန်လည်ထွက်ခွာခွင့်ပြုသည့် Exit pass စာရွက် တို့ ကို ပြ နိုင်ပါက ဖမ်းဆီးမှုမှ ကင်းလွတ်ခွင့်ရရှိမယ်လို့ မြန်မာသံရုံး က အသိပေးထားပါတယ်။
ဒါ့အပြင် မလေးရှား လဝက ရုံးများ မှာ ပေးဆောင်ရမယ့် ဒဏ်ကြေး ရင်းဂစ် ၅၀၀နဲ့ Exit pass ရင်းဂစ် ၁၀၀တို့ကို ဘဏ်ကတ် credit card /debit card တို့ နဲ့သာ ပေးဆောင်ရမှာ ဖြစ်တယ်လို့ မြန်မာသံရုံးက ထပ်မံအသိပေးထားပါတယ်။
