ထိုင်းနိုင်ငံရောက် မြန်မာလုပ်သားတွေ အတွက် မည်သူမည်ဝါဖြစ်ကြောင်းသက်သေခံလက်မှတ် သက်တမ်းတိုး ထုတ်ပေးရေး လုပ်ငန်းစဉ် ကို ၂၀၂၅ခုနှစ် ဒီဇင်ဘာ ၃၁ ရက်အထိ ပြုလုပ်ပေးမယ်လို့စစ်ကော်မရှင်လက်အောက်ခံ ဘန်ကောက်အခြေစိုက် မြန်မာအလုပ်သမားသံအရာရှိရုံးက ဒီကနေ့ မှာ ထုတ်ပြန်လိုက်ပါတယ်။
CIစာအုပ် ထုတ်ပေးတဲ့ စခန်းတွေ ကို ဒီဇင်ဘာလ ၂၁ ရက်မှာ ပိတ်သိမ်းဖို့ ကနဦး ကြေညာထားပေမယ့် 7-Eleven စတိုးဆိုင်တွေမှာ ငွေပေးသွင်းသူများ ကျန်ရှိနေတာကြောင့် မြန်မာအလုပ်သမား နစ်နာမှုမရှိစေဖို့ လာမယ့် ဒီဇင်ဘာလ ၃၁ ရက်အထိ ထပ်တိုးဖွင့်လှစ်မယ်လို့ အသိပေးထားပါတယ်။
ဒါကြောင့် ချင်းမိုင်၊ စမွတ်စခွန်၊ စမွတ်ပရကန်နှင့် စူရတ်ဌာနီခရိုင် မှာ ဖွင့်လှစ်ထားတဲ့ CIစခန်း၄ခု နဲ့ ကရာဘီခရိုင်က မိုဘိုင်းစခန်းတစ်ခု တို့မှာ CIစာအုပ်သက်တမ်းတိုး လုပ်ငန်းစဉ်တွေ ကို ဒီဇင်ဘာ ၃၁ရက်အထိ လုပ်ကိုင်နိုင်တယ်လို့ သိရပါတယ်။
CI စာအုပ် သက်တမ်းတိုးဖို့ ကျန်ရှိနေသေးတဲ့ မြန်မာလုပ်သားတွေ အနေနဲ့ သတ်မှတ်ကာလ အမှီ အမြန်ဆုံးသွားရောက် လျှောက်ထားဖို့ အသိပေးနှိုးဆော် ထားပါတယ်။
CIစာအုပ် ပြုလုပ်ရာမှာ ကုန်ကျစရိတ်ကို ဘတ်၂၆၇၀ သာ ကျသင့်မယ်လို့ ကြေညာထားပေမယ့် အမှန် တကယ်လုပ်ဆောင်ချိန်မှာ သတ်မှတ်ဈေးထက် များစွာ ပေးချေရတယ်လို့ မြန်မာလုပ်သားတွေက ပြောကြားမှုတွေရှိပေမယ့် မြန်မာသံရုံးဘက်မှ စိစစ်အရေးယူတာမျိုးတော့ မရှိခဲ့ဘူး လို့ သိရပါတယ်။
