ထိုင်းရောက် မြန်မာရွှေ့ပြောင်း လုပ်သား တွေ ကို မည်သူမည်ဝါဖြစ်ကြောင်း သက်သေခံလက်မှတ် (CI) သက်တမ်းတိုးတာနဲ့အသစ်ထုတ်ပေး တာကို ဩဂုတ် ၆ ရက်က စပြီး ဆောင်ရွက်ပေးမယ်လို့ မြန်မာအလုပ်သမားသံအရာရှိရုံး (ဗန်ကောက်) က အသိပေး ကြေညာလာပါတယ်။

 

မြန်မာနိုင်ငံနဲ့ ထိုင်းနိုင်ငံတို့ရဲ့ အလုပ်သမားဝန်ကြီးဌာနနှစ်ခု ပူးပေါင်းဆောင်ရွက်မှုနဲ့ မြန်မာရွှေ့ပြောင်းအလုပ်သမားတွေကို စမုစခွန်စခန်း၊ စမုပရာကန်စခန်း၊ ဆူရတ်ဌာနီစခန်းနဲ့ ချင်းမိုင်စခန်း စတဲ့ စခန်း လေးခု မှာ ဆောင်ရွက်ပေးမယ်လို့ ဆိုပါတယ်။

 

အဆိုပါ စခန်း တွေ မှာ မည်သူမည်ဝါဖြစ်ကြောင်း သက်သေခံလက်မှတ် (Certificate of Identity-CI) သက်တမ်းကုန်ဆုံးဖို့ (၆) လ အောက် ကျန်နေသူတွေ သက်တမ်းကုန်ဆုံးနေသူတွေကို အသစ်လဲလှယ်ပေးတာ ၊ ထိုင်းနိုင်ငံရဲ့ ဘတ်ကတ် (TR-38) လုပ်ငန်းစဉ်နဲ့အတူ CI စာအုပ်အသစ်တွေ ထုတ်ပေးခြင်း တို့ဆောင်ရွက် ပေးမယ်လို့ သိရပါတယ်။

 

ဒါ့အပြင်နိုင်ငံသားစိစစ်ရေးကတ်မူရင်း၊ အိမ်ထောင်စုစာရင်းနဲ့ CI စာအုပ်ရှိသူတွေကို အထောက်အထားစိစစ်ပြီးနောက် နိုင်ငံကူးလက်မှတ် (Passport for Thailand Only) ထုတ်ပေးခြင်း တို့ အပြင် Overseas Worker Identification Card – OWIC ကတ်ပြားထုတ်ပေးခြင်း ကိုလည်း ဆောင်ရွက်ပေးမယ်လို့ သိရပါတယ်။

 

CI စခန်းတွေမှာ ဆောင်ရွက်တဲ့အခါ တနင်္လာနေ့တိုင်းနဲ့ မြန်မာသံရုံး (ဗန်ကောက်) မှ သတ်မှတ်ထားတဲ့ ရုံးပိတ်ရက်တွေကို အလုပ်နားရက်သတ်မှတ်မယ်လို့ ကြေညာထားပါတယ်။

 

CI စာအုပ် လုပ်ဆောင်လိုတဲ့ မြန်မာရွှေ့ပြောင်း လုပ်သားတွေ အနေနဲ့ မိမိအဆင်ပြေရာ CIစခန်း ကိုရွေးချယ် လုပ်ဆောင်နိုင်ကာ ဝန်ဆောင်ခအဖြစ် ၂,၆၇၀ ဘတ် သတ်မှတ်ထားပြီး 7-Eleven စတိုး ဆိုင်တွေထံ တိုက်ရိုက်ငွေပေးသွင်း နိုင်တယ်လို့ ထိုင်းအလုပ်အကိုင်ဦးစီးဌာန ကလည်း ထုတ်ပြန်ကြေညာထားပါတယ်။