မြန်မာနိုင်ငံ အတွင်း ဆန်ဈေးနှုန်း ကို သတ်မှတ်ဈေးထက် များစွာ ဈေးတင်ရောင်းတဲ့ အကြောင်းပြချက်နဲ့ Aeon Orange ဈေးဝယ်စင်တာရဲ့ ဒါရိုက်တာ ဂျပန် နိုင်ငံသား အဖမ်းခံထားရတာ နဲ့ ပက်သက်ပြီး ပြန်လွှတ်ပေးဖို့ ဂျပန်အစိုးရနဲ့ရန်ကုန်ရှိဂျပန်သံရုံးတို့ က တောင်းဆိုထားတယ်လို့သိရပါတယ်။
မြန်မာနိုင်ငံရှိ ဂျပန်သံရုံးက NHK ဂျပန်သတင်းဌာနကို ပြောကြားရာမှာ ဂျပန်နိုင်ငံသားတစ်ဦးအား ဖမ်းဆီးထိန်းသိမ်းထားခြင်းကို သိရှိပြီး အဆိုပါ ဂျပန်နိုင်ငံ သားကို ပြန်လွှတ်ပေးဖို့ မြန်မာစစ်တပ်ကို တောင်းဆိုထားတယ်လို့ သိရပါတယ်။
ဆန်ဈေးနှုန်းကို သတ်မှတ်ဈေးထက် ၅၁ရာခိုင်နှုန်းမှ ၇၀ရာခိုင်နှုန်းအထိ ပိုမိုအမြတ်တင်ရောင်းချခဲ့တဲ့ ဈေးဝယ်စင်တာ ၂၂ဆိုင် မှ တာဝန်ရှိသူ ၄ဦး ကို ၂၀၁၂ခုနှစ် အရေးကြီး ကုန်စည်နှင့်ဝန်ဆောင်မှုဥပဒေ ပုဒ်မ-၅အရ အရေးယူရာမှာ Aeon Orange ရဲ့ ဒါရိုက်တာ ဂျပန် နိုင်ငံသား Mr.Kasamatsu Hiroshi လည်း ပါဝင်ခဲ့ပါတယ်။
အဆိုပါ ဂျပန်နိုင်ငံသား ကို ရန်ကုန်မြို့က ရဲစခန်းမှာ ထိန်းသိမ်းခံထားရကာ သက်ဆိုင်ရာက စစ်ဆေးနေတယ်လို့သိရပါတယ်။
ပြည်တွင်းဆန်ဈေးကွက်မှာ သင့်တင့်မျှတတဲ့ ဈေး ကွက်ဈေးနှုန်းထက်ပိုမိုပြီး ဈေးနှုန်းမြှင့်တင်ရောင်းခဲ့တဲ့အတွက် နာမည်ကြီး City Mart ၊ One Stop Mart ၊ စိန်ဂေဟာတို့က တာဝန်ရှိသူတွေကို ဖမ်းဆီးခဲ့သလို ပြည်တွင်းဆန်ဈေးကွက်မှာ သင့်တင့်မျှတတဲ့ ဈေး ကွက်ဈေးနှုန်းထက်ပိုမိုပြီး ဈေးနှုန်းမြှင့်တင်ရောင်းခဲ့တဲ့ ဆန်စပါးလုပ်ငန်းရှင် ၇ ဦးကိုလည်း ၂၀၁၂ ခုနှစ်၊ အရေးကြီးကုန်စည်နဲ့ဝန်ဆောင်မှု ဥပ ဒေပုဒ်မ-၅ အရ အရေးယူဆောင်ရွက်မယ်လို့ ဇွန်လ ၃၀ ရက်မှာ စကစ မှ ကြေညာခဲ့ပါတယ်။
