၂၀၂၄ ဇန်နဝါရီလမှ စက်တင်ဘာလအထိ ကိုးလအတွင်း ထိုင်းရှိ မြန်မာရွှေ့ပြောင်းလုပ်သား ၅၂၆၉ ဦး ဖမ်းဆီးခံခဲ့ရတယ်လို့ FE5 တနင်္သာရီ အဖွဲ့ရဲ့ စစ်တမ်းအရ သိရပါတယ်။
ပဋိပက္ခများနှင့် လူမှုစီးပွားဘဝများကို သုတေသနပြုလုပ်နေသော FE5 တနင်္သာရီ အဖွဲ့က
ထိုင်းတော်ဝင်တပ်မတော်၊ တာခ့်ခရိုင် လ၀ကနှင့် ထိုင်းသတင်းမီဒီယာတွေရဲ့ အချက်အလက်နှင့် စာရင်းများကို ကောက်ယူပြီးနောက် ဖမ်းဆီးခံခဲ့ရတဲ့ မြန်မာလုပ်သားအရေအတွက်စာရင်းကို ထုတ်ပြန်ခဲ့တာဖြစ်ပါတယ်။
မြေပြင်တွင် ဖမ်းဆီးရတဲ့ မြန်မာအရေအတွက် ပိုမိုများပြားနိုင်တယ်လို့ သိရပါတယ်။
မြန်မာရွှေ့ပြောင်းလုပ်သားတွေ အများဆုံးအဖမ်းခံရတဲ့ နေရာတွေကတော့ ထိုင်း-မြန်မာနယ်စပ် ကန်ချနဘူရီဒေသ၊ တာခ့်ခရိုင် မဲဆောက်၊ ထိုင်းတောင်ပိုင်း မလေးရှားနယ်စပ်နှင့် အမြန်လမ်းတွေပေါ်မှာ ဖြစ်တယ်လို့ FE5 တနင်္သာရီ အဖွဲ့က ထုတ်ပြန်ထားပါတယ်။
စစ်ကောင်စီအဖွဲ့က အသက် ၁၈ နှစ်ပြည့်ပြီးသူတိုင်း စစ်မှုထမ်းရမဲ့ ဥပဒေကို ပြဌာန်းလိုက်တာကြောင့် ပြည်တွင်းရှိ လူငယ်အများစုဟာ ထိုင်းနိုင်ငံအတွင်းသို့ တရားဝင် (သို့) တရားမဝင် ဝင်ရောက်မှု များပြားလာခဲ့ပါတယ်။
ထိုင်းသို့ တရားမဝင်နည်းလမ်းဖြင့် ဝင်ရောက်ရာတွင် ပွဲစားကို ဘတ် ၂၀၀၀၀ မှ ဘတ် ၅၀၀၀၀ (ကျပ် ၂၈ သိန်းမှ ၇၀ သိန်း) အထိ ပေါက်ဈေးရှိနေပါတယ်။
