လာမယ့် ၄၈ နာရီ အတွင်း ပဲခူးမြစ်ရေဟာ ပဲခူးမြို့ရဲ့ စိုးရိမ်ရေမှတ်နဲ့ ချင်းတွင်းမြစ်ရေ ဟာ ဟုမ္မလင်း မြို့ရဲ့ စိုးရိမ်ရေမှတ်ကို ရောက်ရှိလာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးချက် ထုတ်ပြန်ထားပါတယ်။
ဇွန်လ ၂၁ရက် ၁၂နာရီ ခွဲ တိုင်းထွာချက်အရ ချင်းတွင်းမြစ်ရေဟာ ဟုမ္မလင်းမြို့ရဲ့ စိုးရိမ်ရေမှတ်အောက် ၅ ပေခွဲခန့်မှာ ရောက်ရှိနေသလို ပဲခူးမြစ်ရေဟာ ပဲခူးမြို့ရဲ့ စိုးရိမ်ရေမှတ် ၅ပေကျော် မှာ ရောက်ရှိနေတယ်လို့ မိုးဇလ က ထုတ်ပြန်ထားပါတယ်။
၎င်းမြစ်ရေတွေဟာ လာမယ့် ၂ရက် အတွင်း စိုးရိမ်ရေမှတ် ကို ရောက်ရှိ လာနိုင်တဲ့ အတွက် ဟုမ္မလင်းမြို့နယ်နဲ့ ပဲခူးမြို့နယ် အတွင်းရှိ မြစ်ကမ်းအနီးနဲ့ မြေနိမ့်ပိုင်းနေထိုင်သူတွေ အနေနဲ့ ကြိုတင်သတိပြုနိုင်ရန်၊ မြစ်ရေမြင့်တက်လာပါက အချိန်မီ ရှောင်ရှားကြဖို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးနှိုးဆော်ထားပါတယ်။
ဇွန်လ ၂၀ရက်က လည်း စစ်တောင်းမြစ်ရေ ဟာတောင်ငူ မြို့ရဲ့ စိုးရိမ်ရေမှတ်ကို ၂၄နာရီ အတွင်း ရောက်ရှိလာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးခဲ့ပြီး တောင်ငူမြို့နယ် အတွင်း ရေကြီးရေလျှံမှုတွေ ဖြစ်ပေါ်ခဲ့လို့ ဒေသခံလူမှုကူညီရေးအသင်းတွေက ပြည်သူတွေကို ဘေးကင်းရာ ပြောင်းရွှေ့ပေးလျက်ရှိပါတယ်။
ဇူလိုင် ၂၁ ရက် နေ့လည် ၂နာရီအချိန် မြစ်ရေ အခြေနေ ထုတ်ပြန်ချက်မှာတော့ စစ်တောင်းမြစ်ရေဟာလာမယ့် ၂၄ နာရီ အတွင်း ၁၉ စင်တီမီတာမြင့်လာမှာဖြစ်ပေမယ့် တောင်ငူမြို့ရဲ့ စိုးရိမ်ရေမှတ် အောက်မှာသာရှိသေးတယ်လို့ ထုတ်ပြန်ထားပါတယ်။
