၂၀၂၅ခုနှစ် အတွင်း မလေးရှား နိုင်ငံတဝန်းမှာ အထောက်အထားမရှိတဲ့ နိုင်ငံခြားသား ရွှေ့ပြောင်းလုပ်သားတွေ ကို စီမံချက် တွေ နဲ့ ဖမ်းဆီးမှု များ ပြုလုပ်ခဲ့ရာမှာ မြန်မာနိုင်ငံသား ၁၀,၀၀၀ နီးပါး အဖမ်းခံရတဲ့အထဲမှာပါဝင် တယ်လို့ မလေးရှား နိုင်ငံ လူဝင်မှုကြီးကြပ်ရေးဌာန ရဲ့ ဒီဇင်ဘာ၂၇ရက် နေ့ ထုတ်ပြန်ချက်အရသိရပါတယ်။
မလေးရှားလူဝင်မှုကြီးကြပ်ရေးရဲ့ ထုတ်ပြန်ချက်အရ ဒီဇင်ဘာလ ၂၄ရက်ထိနိုင်ငံခြားသား ၂၃၅၃၄၃ ဦး ကို စစ်ဆေးမေးမြန်းခဲ့ ပြီးအထောက်အထားမရှိတဲ့ နိုင်ငံခြားသား ၉၀၀၀၀ ကျော်ဖမ်းဆီးနိုင်ခဲ့တယ်လို့ ထုတ်ပြန်ထားပါတယ်။
အဖမ်းခံရတဲ့ နိုင်ငံခြားသားတွေထဲမှာ အင်ဒိုနီးရှားနိုင်ငံသား ၁၅၃၈၅ ဦး၊ ဘင်္ဂလားဒေ့ရှ် ၁၁၁၀၅ ဦး၊ မြန်မာ ၉၇၈၉ဦး၊ဖိလစ်ပိုင် ၄၃၆၅ဦး၊ပါကစ္စတန် ၂၄၉၇၂ ဦး၊အိန္ဒိယ ၁၆၃၀ ဦး၊ထိုင်း ၁၄၉၃ ဦး၊တရုတ် ၁၀၃၈ ဦး၊ဗီယက်နမ် ၉၀၉ဦး၊နီပေါ ၇၆၉ ဦးနှင့်တခြားနိုင်ငံခြားသားများလည်းပါဝင်တယ်လို့ ဖေါ်ပြထားပါတယ်။
ဒါ့အပြင် အဖမ်းခံရသူတွေထဲမှာ ဒုက္ခသည်များဆိုင်ရာမဟာမင်းကြီးရုံး (UNHCR) ကတ်ကိုင်ဆောင်ထားတဲ့ ၅၂၉၄ ဦး လည်း ပါဝင်တယ်လို့ ဖေါ်ပြထားပါတယ်
"အခုနှစ်ကတော့ အဖမ်းဆီး အကြမ်းဆုံး နှစ်လို့ ပြောရမယ် အသိတွေထဲ အဖမ်းခံရတဲ့ သူတွေလည်း များတယ် ကျွန်တော်ဆို အလုပ်လုပ်နေတဲ့ဆိုင်ထဲ ဝင်ဖမ်းချိန် မှာ ကံကောင်းလို့ လွတ်လာတာ ဒါပေမယ့် စိတ်ချ လက်ချနဲ့ အိပ်ရေး၀၀ အိပ်ရတာ ရှားတယ်လမ်းသွားရင်လည်း ကျီးကန်းမျက်စိ လို လိုက်ကြည့်နေရတာ ကိုယ့်နိုင်ငံ မှာ အခြေနေ မကောင်းလို့သာ နေနေရတာ ဒီမှာက အဖမ်းဆီး တွေများတော့ အလုပ်လည်း သေချာ မလုပ်နိုင်ဘူး မြန်မာနိုင်ငံ ဒီနေ့ အေးချမ်းရင် ဒီနေ့ ပြန်မယ် အထောက်အထားမရှိတဲ့ ဘ၀ နဲ့ အလုပ်မလုပ်ချင်တော့ဘူး"မလေးရောက် မြန်မာလုပ်သား တစ်ဦးကပြောပါတယ်။
မလေးရှား အာဏာပိုင်တွေ အနေနဲ့ အထောက်အထားမရှိတဲ့ နိုင်ငံခြားသား လုပ်သားတွေကို ဖမ်းဆီးသလို ၎င်း လုပ်သားတွေကို အလုပ်ခန့်ထားပြီး ကာကွယ်ပေးတဲ့ အလုပ်ရှင်တွေကို လည်း ဖမ်းဆီးရာ မလေးရှားနိုင်ငံသား အလုပ်ရှင် ၂၀၁၂ဦး၊ဘင်္ဂလားဒေ့ရှ် နိုင်ငံသား ၃၄ဦး၊အင်ဒိုနီးရှား နိုင်ငံသား ၂၁ဦး နဲ့ ပါကစ္စတန်၊တရုတ်၊ထိုင်းနဲ့ မြန်မာနိုင်ငံသား အလုပ်ရှင်တွေလည်းပါဝင်တယ်လို့ သိရပါတယ်။
