ဧပြီလတတိယ ၁၀ ရက်ပတ်အတွင်း နေပြည်တော် စစ်ကိုင်းတိုင်းဒေသကြီး မန္တလေးတိုင်းဒေသကြီး မကွေးတိုင်းဒေသကြီး ပဲခူးတိုင်း ဒေသကြီး ရန်ကုန်တိုင်း ဒေသကြီး ဧရာဝတီတိုင်းဒေသကြီး တနင်္သာရီတိုင်းဒေသကြီး ရှမ်းပြည်နယ် ကယားပြည်နယ် နှင့်မွန်ပြည်နယ်စတဲ့ တိုင်းနဲ့ ပြည်နယ် ၁၁ ခုမှာ နေ့အပူချိန်ဟာ ဧပြီလပျမ်းမျှအပူချိန်၏ ၁.၅ ဒီဂရီဆဲစီးရပ်စ် နှင့်အထက်ပိုမိုပူပြင်းနိုင်တယ်လို့ မိုးလေဝသနှင့် ဇလဗေဒ ညွှန်ကြားမှုဦးစီးဌာနက ထုတ်ပြန်ထားပါတယ်။
ခန့်မှန်းချက်တွေအရ အဆိုပါ တိုင်းနှင့်ပြည်နယ် ၁၁ ခုမှာ နေ့အပူချိန်မြင့်တက်နိုင်ပေမဲ့ ကျန်ဒေသများဖြစ်တဲ့ ကချင်ပြည်နယ် ချင်းပြည်နယ် ရခိုင်ပြည်နယ်နှင့် ကရင်ပြည်နယ်တို့မှာတော့ ဧပြီလ ပျမ်းမျှအပူချိန်ခန့်သာရှိနိုင်တယ်လို့ ဆိုပါတယ်။
အခုလို ရာသီဥတုပူပြင်းမှုကြောင့် နေပူထဲတွင် သွားလာ အလုပ်လုပ်ကိုင်သူတွေအနေနဲ့ အပူရှပ်ခြင်းဖြစ်ပေါ်နိုင်သဖြင့် သတိထားသွားလာဖို့ လိုအပ်သလို လူဦးရေ ထူထပ်တဲ့ စက်ရုံအလုပ်ရုံတွေမှာလည်း အပူဒဏ်ကာကွယ်ရေးကြိုတင်ပြင်ဆင်ထားသင့်တယ်လို့ လေ့လာစောင့်ကြည့်သူတွေက သတိပေးပြောဆိုထားပါတယ်။
"စက်ရုံအလုပ်ရုံတွေအနေနဲ့ လေဝင်လေထွက်ကောင်းအောင်နဲ့ လေလည်ပတ်မှုရှိအောင် ပန်ကာလိုမျိုးတွေကို စက်ရုံလုပ်သားထူထပ်တဲ့နေရာတွေနဲ့ နေ့လည်စာစားတဲ့နေရာတွေမှာအရင်ဆုံး ပြင်ဆင်ပေးထားသင့်ပါတယ်။နောက်တချက်အနေနဲ့ အရေးပေါ်မူးမေ့သွားတာမျိုးဖြစ်လာရင် ကုသပေးနိုင်မဲ့ ဆေးအဖွဲ့အရန်သင့်ထားပေးဖို့လိုပါမယ်၊လိုအပ်ရင် နီးစပ်ရာဆေးရုံကို ပိုပေးနိုင်အောင် လူနာတင်ယာဉ်ပြင်ဆင်ထားပြီးဖြစ်ဖို့လဲ လိုပါမယ်။
ဒီလိုလုပ်ရမှာတွေက အခုလို အပူပြင်းလာတဲ့ရာသီတခုအတွက်ပါဘဲ။ မိုးကျလာလို့ ရာသီဥတု ပြန်အေးသွားတဲ့အခါ အပူဒဏ်အတွက် ပြင်ဆင်ထားတာတွေ လျှော့ချလိုက်ပြီး ပုံမှန် ကျန်းမာရေးစောင့်ရှောက်မှုတွေပြန်လုပ်နိုင်ပါတယ်"လို့ မိုးလေဝသလေ့လာစောင့်ကြည့်သူတစ်ဦးဖြစ်တဲ့ ဦးဝင်းနိုင်က သတိပေးပြောဆိုထားပါတယ်။
ဧပြီလအတွင်း မိုးရွာသွန်းမှုအနေနဲ့ကတော့ ကချင်ပြည်နယ်မှာတော့ ရွာသွန်းမြဲထက်ပိုပြီး စစ်ကိုင်းတိုင်းဒေသကြီးအထက်ပိုင်းနှင့် ချင်းပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်ကာ ကျန်ဒေသများမှာတော့ ရွာသွန်းမြဲအောက် လျော့နည်းနိုင်တယ်လို့ ခန့်မှန်းချက်အရသိရပါတယ်။
ယနေ့အတွက် ထူးခြားတဲ့ နေ့အပူချိန်တွေကတော့ ချောက်မြို့တွင် ၄၇ ဒီဂရီဆဲစီးရပ်စ် မုံရွာနှင့် တံတားဦး( လေကြောင်းမိုးလေဝသ)တို့တွင် ၄၄ ဒီဂရီဆဲစီးရပ်စ် နှင့် မင်းကင်းမြို့ စစ်ကိုင်းမြို့ ရေဦးမြို့ မြင်းမူမြို့ မြင်းခြံမြို့ မင်းဘူးမြို့ နှင့် မကွေးမြို့တို့တွင် ၄၃ ဒီဂရီဆဲစီးရပ်စ် ထိ မြင့်တက်ခဲ့တယ်လို့ တိုင်းထွာချက်တွေအရသိရပါတယ်။
