ထုတ်ပြန်ကြောညာချက်တွင် ထိုင်းနိုင်ငံသို့ မြန်မာလုပ်သားစေလွှတ်နိုင်ရေးနဲ့ ပတ်သက်ပြီး လိုင်စင်ရအေဂျင်စီဆောက်ရွက်ရမယ့် လုပ်ငန်းအစီစဉ်တွေ ပါဝင်ပြီး အဓိက အနေဖြင့် အလုပ်ခေါ်စာ တင်ပြခွင့်ကို အေဂျင်စီ တစ်ခုလျှင် တစ်လ ကို လုပ်သားအယောက် ၅၀ အတွက်သာ တင်ပြခွင့်ပေးတော့မယ်လို့ဆိုပါတယ်။

 

ဒါ့အပြင် ၂၀၂၅ခုနှစ် ဇန်နဝါရီလ ၃၀ရက် မတိုင်မီ က စာချုပ်ချုပ်ဆိုထားတဲ့ အလုပ်ခေါ်စာ တွေမှာ လူဦးရေ ၅၀ ဦးထက် ပိုပါက ၎င်း Demand Letter တွေ ကို ၅၀ ဦးဖြင့် ပြန်လည် ပြင်ဆင်ပြီး မတ်လ၂၅ရက် ကစပြီး ပြင်ဆင်တင်ပြရမှာ ဖြစ်ကာ အေဂျင်စီ တစ်ခုကို တစ်လ တစ်ကြိမ်သာ တင်ပြရမယ်လို့ ပါရှိပါတယ်။

 

ထိုင်းနိုင်ငံ အတွက် Demand Letter အသစ် တင်ပြတာကိုတော့ ၂၀၂၅ခုနှစ် မေလ ၂ရက်က စပြီး လက်ခံဆောင်ရွက်ပေးမယ်လို့ ဆိုပါတယ်။

 

"အခုထုတ်ပြန်ချက် က ထိုင်းအတွက် လုပ်သားပို့မယ့် အေဂျင်စီက တစ်ဘက်နိုင်ငံစက်ရုံက လုပ်သား ၁၀၀ ခေါ်မယ်ဆိုရင် ၅၀ စီ နှစ်ခါ ခွဲပြီး တစ်လ မှ တစ်ကြိမ် တင်ပြခွင့်ရမယ် အဲ့တော့ အေဂျင်စီ အနေနဲ့ အလုပ်ခေါ်စာတွေ အများကြီးရှိလည်း သူတို့ သတ်မှတ်ထား တဲ့နှုန်းနဲ့ပဲ ခွင့်ပြုမယ် လုပ်သားဦးရေ ကို ကန့်သတ်လိုက်တဲ့သဘော အခုက ဆိုးတာက တစ်လပိုင်း ၃၀ရက်မတိုင်မီက စာချုပ်ချုပ်ထားတာတွေ ပါ ကန့်သက်တဲ့ ထဲ ပါနေတယ် တစ်ချို့ ထုတ်ပြန်ထားတဲ့ အချက်အလက်တွေက မရှင်းလင်းဘူး အရင်ကဆို MOEAA အသင်း ကနေတစ်ဆင့်စာထုတ်တာ များတယ် အခုက နိုင်ငံပိုင်သတင်းစာကနေ ထုတ်ပြန်ကြေညာတော့အေဂျင်စီတွေ အနေနဲ့ မရှင်းလင်းလို့ မေးဖို့တောင် ခက်နေတယ်" လို့လိုင်စင်ရအေဂျင်စီမှတာဝန်ရှိသူတစ်ဦးကပြောပါတယ်။

 

ဂျပန်၊ ကိုရီးယား၊ စင်္ကာပူ၊ မလေးရှားနဲ့ အခြားနိုင်ငံ အတွက် ဆောင်ရွက်ရမယ့် လုပ်ငန်းစဉ် တွေကိုတော့ မြန်မာ့အလင်းနဲ့ကြေးမုံတို့မှာ ဆက်လက်ဖေါ်ပြပေးမယ်လို့ ထုတ်ပြန်ထားပါတယ်။