ပြည်ပနိုင်ငံတွေမှာ သွားရောက်လုပ်ကိုင်တဲ့ အိမ်အကူလုပ်သားတွေကို တရားဝင်ရွှေ့ပြောင်း သွားလာတဲ့လမ်း ကြောင်း ဖြစ်စေဖို့ တိုက်တွန်းတယ်လို့ မြန်မာရွှေ့ပြောင်းအလုပ်သမားများဆိုင်ရာ အရပ်ဖက်လူမှုအဖွဲ့အစည်း များနှင့် အလုပ်သမားအဖွဲ့အစည်းများကွန်ရက်က ဒီဇင်ဘာလ (၁၈) ရက်နေ့မှာ ကျရောက်တဲ့ အပြည်ပြည် ဆိုင်ရာ ရွှေ့ပြောင်းအလုပ်သမားနေ့မှာ ထုတ်ပြန်တိုက်တွန်းထားပါတယ်။
ပြည်ပနိုင်ငံတွေကို အိမ်အကူအလုပ်အကိုင်အတွက် သွားရောက်လုပ်ကိုင်တာဟာ စစ်အာဏာ မသိမ်းခင်ကတည်း က ရှိနေတာဖြစ်ပြီး အခုချိန်ထိ တရားဝင်သွားရောက်လုပ်ကိုင်ခွင့်ပြုတာတော့ မရှိသေးပါဘူး။ အာဏာမသိမ်းခင် ကတော့ ပြည်ပမှာ ရောက်ရှိနေတဲ့ အိမ်အကူလုပ်သားတွေ တရားဝင်မှတ်ပုံတင်နိုင်ရေးအတွက် လုပ်ဆောင်နေ တယ်လို့ အလုပ်သမားဝန်ကြီးက ပြောဆိုခဲ့ပါတယ်။
လက်ရှိမှာတော့ ပြည်ပနိုင်ငံတွေကို သွားရောက်လုပ်ကိုင်နှုန်းဟာ ပိုမိုမြင့်တက်လာပြီး အိမ်အကူ အလုပ်အကိုင်နဲ့ ပြည်ပကို သွားရောက်လိုသူတွေလည်း များနေတာပဲ ဖြစ်ပါတယ်။
“အိမ်အကူအလုပ်သမားတွေ တရားဝင်ရွှေ့ပြောင်းသွားလာတဲ့လမ်းကြောင်း ဖြစ်ပေါ်စေရေး ဆောင်ရွက်ပေးဖို့နဲ့ တရားမဝင်ပွဲစားတွေကြောင့် ပြည်ပနိုင်ငံတွေမှာ ဒုက္ခရောက်နေတဲ့ အမျိုးသမီးရွှေ့ပြောင်းအလုပ်သမားတွေ ဘေးကင်းလုံခြုံစွာ နေရပ်ပြန်လာနိုင်ရေးအတွက် လိုအပ်တဲ့ပံ့ပိုးကူညီတာတွေ လုပ်ဆောင်ပေးဖို့ တိုက်တွန်း ပါတယ်”လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် အိမ်အကူလုပ်သားတွေ တခြားအလုပ်သမားတွေနည်းတူ အလုပ်သမားအခွင့်အရေးတွေ အပြည့်အဝ ရရှိ စေရေးအတွက် ဆိုက်ရောက်နိုင်ငံတွေက ဥပဒေတွေပြဌာန်းပြီး ထိရောက်စွာ ကျင့်သုံးဖို့လည်း တိုက်တွန်းဖော်ပြ ထားပါတယ်။
“သူများအိမ်မှာ အိမ်အကူလုပ်ရတာ တကယ်တော့ မလွယ်ပါဘူး။ အိမ်အကူမကောင်းတာကော၊ အိမ်ရှင်မကောင်း တာကော လူတွေကတော့ အမျိုးမျိုးရှိတာပေါ့။ ဒါပေမယ့် အိမ်အကူအလုပ်ဆိုတာ လွယ်ကူနေတာတော့ မဟုတ် ဘူး။ အလုပ်ချိန်မရှိဘူး။ အသက်ငယ်တယ်ဆို ကိုယ်ထိလက်ရောက် ကျူးလွန်ခံရတာတွေလည်း ရှိတယ်။ ပြည်တွင်းမှာတောင် ဒီလောက်ဒုက္ခရောက်ရင် ပြည်ပနိုင်ငံတွေမှာလုပ်ရတဲ့သူတွေတော့ ပိုဆိုးမယ်ထင်ပါတယ်။ လစာပိုရတယ်ဆိုပေမယ့် အဲဒီလိုကြီးတော့ နိုင်ငံခြားမှာ သွားမလုပ်ရဲဘူး”လို့ အိမ်အကူ အလုပ်လုပ်ကိုင်နေသူ တစ်ဦးက ပြောပါတယ်။
အလုပ်သမားဝန်ကြီးဌာနဟာ ၂၀၁၄ ခုနှစ်က ပြည်ပကို အိမ်အကူ အလုပ်အကိုင်နဲ့ လုပ်သားစေလွှတ်တာကို Pilot project လုပ်ကိုင်ခဲ့ပေမယ့် လက်ရှိချိန်ထိ တရားဝင် သွားရောက်လုပ်ကိုင်ခွင့် မပြုသေးပါဘူး။
#MyanmarLabourNews
