မြန်မာ ပြည်တွင်း ပဋိပက္ခဖြစ်ပေါ်မှုတွေကြောင့် ပြည်တွင်းမှာ စားနပ်ရိက္ခာဖူလုံ မှု မရှိတော့ကာ ငါးနှစ်အောက် ကလေးငယ် လေးသိန်းကျော်ဟာ အာဟာရချို့တဲ့မှုနဲ့ ရင်ဆိုင်နေရတယ်လို့ ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး (OCHA)က ယမန်နေ့က ထုတ်ပြန်ထားပါတယ်။
စားနပ်ရိက္ခာနှင့် စိုက်ပျိုးရေးအဖွဲ့ (FAO) နှင့် ကမ္ဘာ့စားနပ်ရိက္ခာအစီအစဉ် (WFP) တို့က နိုဝင်ဘာ ၁၁ ရက်က နောက်ဆုံးထုတ်ပြန်ခဲ့တဲ့ Hunger Hotspot အစီရင်ခံစာတွင် မြန်မာနိုင်ငံဟာ “အလွန်စိုးရိမ်ဖွယ်ရာ ငတ်မွတ်မှုပြဿနာ” ခြောက်ခုအနက်မှ တစ်ခုအဖြစ် သတ်မှတ်ခံထားပြီး စားနပ်ရိက္ခာ လုံခြုံမှု မရှိတဲ့ နိုင်ငံပေါင်း ၁၆ နိုင်ငံမှာ ပါဝင်ကာ အဆိုးရွားဆုံး အန္တရာယ်နဲ့ ရင်ဆိုင်နေရသော နိုင်ငံဖြစ်တယ်လို့ ဖေါ်ပြထားပါတယ်။
အစီရင်ခံစာအရ ငါးနှစ်အောက်ကလေးငယ် ၄၁၀,၀၀၀ ၊ ကိုယ်ဝန်ဆောင်နှင့် နို့တိုက်မိခင်တွေဟာ ၂၀၂၅ ခုနှစ် ဇွန်လမှ ၂၀၂၆ ခုနှစ်အတွင်း အာဟာရချို့တဲ့မှုနှင့်ရင်ဆိုင်ရမယ်လို့ ခန့်မှန်းထားပြီး စဉ်ဆက်မပြတ်အာဟာရထောက်ပံ့မှုနှင့် လူသားချင်းစာနာထောက်ထားမှုလက်လှမ်းမီမှုအတွက် အရေးတကြီးလိုအပ်နေတယ်လို့ အလေးပေးဖော်ပြထားပါတယ်။
အထူးသဖြင့် ပဋိပက္ခဖြစ်ပွားရာဒေသ တွေမှာ ရန်ပုံငွေပြတ်လပ်မှုနှင့် လက်လှမ်းမီမှု အလွန်အမင်း ကန့်သတ်ချက်တွေကြောင့် အခြေအနေဟာ ပိုမို စိုးလာတယ်လို့ ဆိုပါတယ်။
ရခိုင်ပြည်နယ်မြောက်ပိုင်းတွင် အာဟာရဆိုင်ရာ မျှော်မှန်းချက်မှာ အထူးသဖြင့် မောင်တောမြို့နယ်တွင် စိုးရိမ်ရတဲ့ အဆင့် ၄ နဲ့ ဘူးသီးတောင်မြို့နယ်တွင် ၂၀၂၅ ခုနှစ် နိုဝင်ဘာလမှ ၂၀၂၆ ခုနှစ် မေလအတွင်း အဆင့် (၅) ရှိတယ်လို့ ဖေါ်ပြထားပါတယ်။
ပြည်တွင်းရှိ လူဦးရေ ၁၁.၈ သန်းခန့် (စုစုပေါင်းလူဦးရေ၏ ၂၂ ရာခိုင်နှုန်း) နဲ့ အရေးပေါ်အဆင့် လူတစ်သန်းအပါအဝင် ဟာ ပြင်းထန်သော အစားအစာမလုံလောက်မှုအဆင့်ကို ကြုံတွေ့နေရတယ်လို့ ထုတ်ပြန်ချက်မှာဖေါ်ပြထားပါတယ်။
