ထိုင်းနိုင်ငံ ကို အလုပ်သမား ပို့ဆောင် ရန် အတွက် အလုပ်ခေါ်စာ မှန်ကန်ကြောင်း ခွင့်ပြုချက်ရရှိပြီး စာချုပ်ချုပ်ရန် အတွက် အေဂျင်စီ မှ အလုပ်သမားဝန်ကြီးဌာန ကို ခွင့်ပြုချက် တောင်းခံထားရာ အသက်၂၃နှစ်အောက်နဲ့ ၃၁နှစ်အထက်အလုပ်သမားများ ကိုသာ  ခွင့်ပြုမယ်လို့ အီးမေးကတစ်ဆင့်အကြောင်းပြန်လာတယ်လို့ အေဂျင်စီတွေထံ က သိရပါတယ်။

ထို့ကြောင့် အသက်၂၃နှစ်မှ ၃၁နှစ်အ ထိ အလုပ်သမား တွေ ကို စာချုပ်ချုပ်ခွင့်မပေးတဲ့ အတွက် စာချုပ်ချုပ်ရန် တင်ပြထားတဲ့ လူစာရင်းကို ပြန်လည်ပြင်ဆင်ဖို့အတွက် အလုပ်သမားဝန်ကြီးဌာန က အကြောင်းကြားတယ်လို့ သိရပါတယ်။

""ထိုင်းစာချုပ် အတွက် တင်တဲ့ အေဂျင်စီ တွေ ကို အမျိုးသား အလုပ်သမား အသက်၂၃နှစ်အောက်နှင့်၃၁နှစ်အထက်ကိုသာ စုဆောင်းချုပ်ဆိုရန် ဆိုပြီး အကြောင်းကြားတယ် စာချုပ်ချုပ်မယ့် စာရင်း ကို ပြန်လည် ပေးပို့ခိုင်းတယ်၊ အခုစာချုပ်ချုပ်ခွင့်တင်ထားတာက မေလ၁ရက်နေ့ မတိုင်ခင်က တင်ထားတဲ့ အလုပ်တွေပါ  demand အသစ်မဟုတ်ပါဘူး အခုလို အသက် သတ်မှတ် တာက ထိုင်း တစ်ခုထဲလား အခြား နိုင်ငံ တွေ ပါ ပါ လားဆိုတာလည်း သေချာမသိရသေးဘူးထိုင်း စာချုပ်ချုပ်ခွင့်တင်ထားတဲ့အေဂျင်စီ တွေကို အခုလိုအကြောင်းပြန်တာပါ""ဟု လိုင်စင်ရအေဂျင်စီတစ်ခုမှ တာဝန်ရှိသူ တစ်ဦးကပြောပါတယ်။

အဆိုပါ အကြောင်းရာနဲ့ ပက်သက်ပြီး အလုပ်သမားဝန်ကြီးဌာနကို ဆက်သွယ်မေးမြန်းပေမယ့် ပြန်လည်‌ဖြေကြားခြင်းမရှိပါ။

အခုလို  ထိုင်းနိုင်ငံ ကို လုပ်သားစေလွှတ်ဖို့ စာချုပ်ချုပ်ခွင့် တင်ထားရာမှာ သွားရောက်နိုင်မယ့် အမျိုးသား အလုပ်သမား တွေ ကို အသက်ကန့်သတ်လိုက်တဲ့အခါ ပို့ဆောင်ပေးမယ့် အေဂျင်စီ တွေ လည်း အခက်ခဲ ဖြစ်နေတယ်လို့ သိရပါတယ်။

အလုပ်သမားဝန်ကြီးဌာန အနေနဲ့ မေလ ၁ရက်က စပြီး  အလုပ်သမား‌ ထွက်ခွာခွင့်ကိစ္စရပ်တွေ ကို ပိုမိုအချိန်ယူစိစစ်နိုင်ဖို့နဲ့ အခြားအခြေနေများအရ အမျိူးသား လုပ်သား တွေ ပြည်ပ ထွက်ခွင့် ယာယီဆိုင်းငံလိုက်တယ်လို့ မီဒီယာမှမေးမြန်းမှု ကို ‌ဖြေကြားခဲ့ပါတယ်။