ထိုင်းနိုင်ငံ၊ ပထုံဌာနီခရိုင် မှာ အလှူက ပြန်လာတဲ့ မြန်မာအလုပ်သမား ၁၃ဦး စီးလာတဲ့ ကားဟာ တူးမြောင်းထဲ ထိုးကျ မှုဖြစ်တာကြောင့် မြန်မာလုပ်သား ၆ ဦး သေဆုံး မှုဖြစ်ပွားခဲ့တယ်လို့ ထိုင်းသတင်းတွေရဲ့ ဖေါ်ပြချက်အရ သိရပါတယ်။

ဒီဇင်ဘာလ ၃၀ ရက်နေ့ ည ၁၀ နာရီဝန်းကျင်အချိန် မှာ မြန်မာအလုပ်သမားတွေက ချောင်ပူရီခရိုင်သို့ အလှူသွားလုပ်ပြီးအပြန် စီးနင်းလာတဲ့ ပစ်ကပ်ကားဟာ ပထုံဌာနီအရောက်တွင် လမ်းဘေးအတားအဆီး ဘိလပ်မြေတုံးတွေကို အရှိနိပြင်းစွာ တိုက်မိပြီး တူးမြောင်းအတွင်းသို့ ထိုးကျသွားခဲ့တယ်လို့ သိရပါတယ်။

 

၎င်းကားပေါ်တွင် ယာဉ်မောင်းအပါအဝင် မြန်မာလုပ်သား ၁၃ဦး လိုက်ပါခဲ့ ပြီး ကားရေထဲ သို့ ထိုးကျစဉ် ဒေသခံ တွေက ရေထဲသို့ ခုန်ဆင်းပြီး ကယ်ဆယ်ပေးခဲ့ရာ အမျိုးသား ၄ဦးနဲ့ အမျိုးသမီး၃ဦးစုစုပေါင်း ၇ဦးကိုတော့ကယ်ထုတ်နိုင်ခဲ့ကြောင်း ၎င်းတို့ထဲမှ ၂ဦးဟာ ထိခိုက်ဒဏ်ရာရသဖြင့်ဆေးရုံသို့ပို့ဆောင်ခဲ့ကြောင်း သိရပါတယ်။

 

ထို့နောက် ကယ်ဆယ်ရေးအဖွဲ့ ရေငုတ်သမားတွေက ရှာဖွေပေးရာမှာ ကားဟာ ကမ်းစပ် မှ ၁၅ မီတာ ခန့်သို့ ရောက်ရှိနေပြီး ကားအတွင်းပိတ်မိနေတဲ့ ရုပ်အလောင်း အမျိုးသား၂ဦးနဲ့ အမျိုးသမီး ၁ဦးကို တွေ့ရှိကာ နောက်ထပ်ရုပ်အလောင်း ၃လောင်းကိုလည်း ထပ်မံ ရှာဖွေရာမှ တွေ့ရှိ ဆယ်ယူနိုင်ခဲ့တယ်လို့ သိရပါတယ်။

 

ရဲတပ်ဖွဲ့၏ သုံးသပ်ချက်အရ ကားမောင်းသူဟာ ၎င်းဒေသရဲ့ လမ်းပိုင်းကို ကျွမ်းကျင်မှုမရှိခြင်းနဲ့ လမ်းဖြောင့်ဖြစ်တာကြောင့် အရှိန်ပြင်းစွာ မောင်းနှင်လာခဲ့ခြင်းတို့ကြောင့် ရုတ်တရက် အကွေ့တွင် အချိန်မီ ဘရိတ်မအုပ် နိုင်ဘဲ အတားအဆီးတွေကို တိုက်မိကာ ရေထဲသို့ ပြုတ်ကျတာဖြစ်နိုင်တယ်လို့ သုံးသပ်ထားပါတယ်။

 

ဒီဇင်ဘာ၂၈ရက်ကလည်း ကန်ချနဘူရီ ခရိုင် သလော်ကမ်းခြေ ကို နှစ်ကူးအလုပ်ပိတ်ရက် အလည်လာတဲ့ မြန်မာလုပ်သား၄၄ဦးဟာ လှေစီးကျရာမှ မြန်မာလုပ်သား တစ်ဦးဟာ ရေထဲသို့ ပြုတ်ကျ ပြီးရေနစ်သေဆုံးမှု ဖြစ်ပွားခဲ့ကြောင်းသိရပါတယ်။

 

Ref-Khaosod