ထိုင်းနိုင်ငံ စာမွတ်ဆာခွန်ခရိုင် မဟာချိုင် ကေသုန်နယ်မြေမှာ အထောက်အထားအပြည့်အစုံရှိပေမဲ့ အလုပ်လက်မဲ့ ဖြစ်နေတဲ့ မြန်မာအမျိုးသမီးအလုပ်သမား ၈ဦး ကို အလုပ်သွင်းပေးမယ်ဆိုကာ အလုပ်စမတ်ခ အဖြစ် မြန်မာပွဲစားက ဘတ် ၇၀၀၀၀ လိမ်ယူသွားတယ်လို့ MHAC မဟာမိတ်အဖွဲ့ ထံမှသိရပါတယ်။
၎င်းပွဲစားဟာ မြန်မာအမျိုးသမီးအလုပ်သမား ၈ဦးကို လုပ်သားမခေါ်သေးတဲ့ အလုပ်ရုံကို လက်ညိုးထိုးပြီး အလုပ်သွင်းပေးမယ်လို့ လိမ်လည်ကာ ဘတ်ငွေ ၇၀၀၀၀ ကို ယူပြီးတိမ်းရှောင်နေတယ်လို့ နစ်နာသူမြန်မာအလုပ်သမားတွေထံမှသိရပါတယ်။
ဒါကြောင့် နစ်နာသူမြန်မာအမျိုးသမီးလုပ်သားတွေက အေအေစီ ရဲမင်း ဦးဆောင်သော MHAC အဖွဲ့ထံ အကူအညီတောင်းခံလာသလို ပွဲစားဖြစ်သူရဲ့ ပတ်စပို့စ်မိတ္တူနှင့် ဘတ်တစ်သိန်းခွဲတန် ဆိုင်ကယ်အား ကေသုန်နယ်မြေ ဘန်ထု့လပ်ရဲစခန်းထဲသို့ ဝိုင်းတွန်းယူလာပြီး ထိုင်းရဲအရာရှိရှေ့တွင် အပ်နှံကာ အမှုဖွင့်တိုင်ကြားခဲ့တယ်လို့ ဆိုပါတယ်။
အခုလို အမှုဖွင့်တိုင်ကြားခဲ့တဲ့ အတွက် အမှုကိုင်ထိုင်းရဲအရာရှိမှ MHAC အဖွဲ့သားများနှင့် အတူ တရားခံပွဲစား ကို သွားရောက်ဖမ်းဆီးနိုင်ခဲ့ရာ ယူထားတဲ့ ဘတ် ၇၀၀၀၀ ပြန်ပေးပါမည်လို့ ပြောဆိုခဲ့ ပြီး ဘတ် ၃၅,၀၀၀ ကို ပေးလျော်ကာ ကျန်တဲ့ ဘတ်၃၅၀၀၀ ကိုတော့ စက်တင်ဘာ၂၈ရက်မှာ ပေးလျော်မယ်လို့ကတိပြုခဲ့တယ်လို့ သိရပါတယ်။
ပွဲစားအနေဖြင့် ကျန်ရှိတဲ့ ဘတ် ၃၅၀၀၀ ကို လာရောက်ပေးလျော်မှသာ ရဲစခန်းမှာ ထိမ်းသိမ်းထားတဲ့ ဆိုင်ကယ်ကို ပြန်ပေးမှာ ဖြစ်သလို MHAC မဟာမိတ်အဖွဲ့ကလည်း မြန်မာအမျိုးသမီးလုပ်သား၈ဦး ပေးသွင်းထားတဲ့ငွေကြေး အပြည့်အ၀ ရရှိတဲ့ အထိ ကူညီပေးသွားမယ်လို့ သိရပါတယ်။
