ထိုင်းနိုင်ငံ အလုပ်သမားဝန်ကြီးဌာနက လုပ်ငန်းခွင်နေထိုင်ခွင့်နဲ့ အလုပ်လုပ်ခွင့် သက်တမ်းကုန်ဆုံးသွားတဲ့ မြန်မာအလုပ်သမားများ ဒီဇင်ဘာ ၃၁ရက် နောက်ဆုံးထားသက်တမ်းတိုးဖို့ အသိပေးချက် ထုတ်ပြန်လိုက်ပါတယ်။
၂၀၂၅ ခုနှစ်၊ သြဂုတ်လ ၁၃ ရက်နေ့မှာအလုပ်လုပ်ခွင့် သက်တမ်း ကုန်ဆုံးခဲ့သူတွေဟာ လာမယ့်ဒီဇင်ဘာ ၃၁ ရက် နောက်ဆုံးထား သက်တမ်းတိုးရမှာ ဖြစ်ပါတယ်။
သက်တမ်းတိုးအတွက် လိုအပ်ချက်တွေကတော့ အလုပ်ရှင် သို့မဟုတ် အလုပ်သမားခေါ်ယူတဲ့ကုမ္ပဏီက နိုင်ငံခြားသားအလုပ်သမားကိုယ်စား အလုပ်လုပ်ခွင့်လျှောက်လွှာ နဲ့ လိုအပ်တဲ့စာရွက်စာတမ်းတွေကို အွန်လိုင်း ကနေတစ်ဆင့် တင်ရမှာဖြစ်ပြီး လျှောက်လွှာတင်ပြီးပါက သတ်မှတ်ထားတဲ့ဆေရုံဆေးခန်းတွေမှာ ဆေးစစ်ရမှာဖြစ်တယ်လို့သိရပါတယ်။
အလုပ်ရှင်မှ အလုပ်လုပ်ခွင့်သက်တမ်း ၂ နှစ်အတွက် အခကြေးငွေ ပေးဆောင်ရမှာဖြစ်ကာ အလုပ်သမားရုံးမှ
လျှောက်လွှာလက်ခံကြောင်းထောက်ခံစာနဲ့ ငွေဖြတ်ပိုင်းရပါက အလုပ်သမားက ယာယီနေထိုင်ခွင့်ဗီဇာ (Non-Immigrant - LA) သက်တမ်းတိုးဖို့အတွက် လူဝင်မှုကြီးကြပ်ရေးရုံး ကို သွားရောက်ဆောင်ရွက်ရမယ်လို့ သိရပါတယ်။
လုပ်ငန်းစဉ်အားလုံးပြီးပါက အလုပ်သမားဟာ ၂၀၂၇ ခုနှစ်၊ ဖေဖော်ဝါရီလ ၁၃ ရက်နေ့ အထိ ၂ နှစ် နေထိုင်ခွင့်ရရှိမှာဖြစ်ပြီး အချိန်မှီ သက်တမ်းမတိုးထားပါက ဥပဒေအရ အရေးယူမယ်လို့ ဆိုပါတယ်။
အလုပ်သမားတွေ အနေနဲ့ သက်တမ်းတိုး လုပ်ဆောင်မှု မှာ တစ်စုံတစ်ရာ အခက်ခဲရှိပါက အလုပ်သမားဝန်ကြီးဌာနထံ ဆက်သွယ် အကူညီတောင်းခံ နိုင်တယ်လို့ ထိုင်းအလုပ်သမားဝန်ကြီးဌာနက ထုတ်ပြန်ထားပါတယ်။
