ထိုင်းနိုင်ငံရှိ မြန်မာအပါအ၀င်နိုင်ငံခြားသားရွှေ့ပြောင်းလုပ်သားတွေ အနေနဲ့ အလုပ်ပြောင်း သူဌေးပြောင်း လိုပါက ယခင်လို အလုပ်ပြောင်းစာ ဘိုင်ကျန့်အော်မလိုတေ့ာဘဲ အလုပ်ရှင်အသစ်ထံ ပြောင်းလဲလုပ်ကိုင် နိုင်ပြီ လို့ ထိုင်းအလုပ်သမားဝန်ကြီးဌာန နိုင်ငံခြားအလုပ်သမားညွှန်ကြားမှုဦးစီးဌာန ရုံးမှ ဩဂုတ်လ ၂၀ရက်မှာ ထုတ်ပြန်လိုက်ပါတယ်။
အလုပ်ခန့်ထားမှုဦးစီးဌာန ထံ အလုပ်ရှင်/စက်မှုလုပ်ငန်းများနှင့် နိုင်ငံခြားသားများထံမှ တိုင်ကြားချက်အရ ခရိုင်အလုပ်အကိုင်ရှာဖွေရေးရုံးတွေနဲ့ ဘန်ကောက် အလုပ်အကိုင်ရှာဖွေရေးရုံးတွေမှာ နိုင်ငံခြားသား အလုပ်သမားများ အလုပ်ရှင်ပြောင်းလဲရာတွင် ယခင်အလုပ်ရှင်ထံမှ ထွက်ခွာကြောင်း စာရွက်စာတမ်းများ တောင်းခံနေသည်ကို တွေ့ရှိရတယ်လို့ ထုတ်ပြန်ချက်မှာဖေါ်ပြထားပါတယ်။
အဆိုပါ ကိစ္စနှင့်ပတ်သက် ပြပြီး နိုင်ငံခြားသား အလုပ်အကိုင် စီမံခန့်ခွဲမှုဆိုင်ရာ တော်ဝင်အမိန့် (B.E. 2560) အရ နိုင်ငံခြားသား အလုပ်သမား တစ်ဦး ရဲ့ အလုပ်ရှင် ပြောင်းလဲမှုအတွက် ယခင်အလုပ်ရှင်ထံမှ ထွက်ခွာကြောင်း စာရွက်စာတမ်း များ တောင်းခံရန် မလိုအပ်ကြောင်း ညွှန်ကြားရေးမှူးချုပ်ရုံးမှ ရှင်းလင်းအသိပေးထားတယ်လို့ဆိုပါတယ်။
"ကျန့်အော်မလိုတော့ဘဲ အလုပ်ပြောင်းလို့ရပြီဆိုတော့ အလုပ်သမားတွေ အတွက်အတော်အဆင်ပြေသွားတာပေါ့ ငွေကုန်ပေါက် လမ်းတစ်ခုလျော့သွားပြီ ကျွန်တော်တုန်းက ဘိုင်ကျန့်အော်ထုတ်တာ ဘတ် ၁၀၀၀ တောင်ပေးခဲ့ရတယ် ""လို့ ထိုင်းရောက် မြန်မာလုပ်သားတစ်ဦးကပြောပါတယ်။
ထိုင်းအလုပ်သမားဝန်ကြီးဌာနရဲ့ ထုတ်ပြန်ချက်အရ ဘိုင်ကျန့်အော်ထုတ်ခြင်း ကို ယခင်အလုပ်ရှင်ဟောင်းက ဆောင်ရွက်ရမှာ ဖြစ်ပြီး ကျန့်ခေါက်ခြင်း ကိုတော့အလုပ်ရှင် အသစ်ထံ အလုပ်စဝင်သည့်နေ့မှ စပြီး ၁၅ရက်အတွင်း ဆောင်ရွက်ပေးရမယ်လို့ ထုတ်ပြန်ထားပါတယ်။
ယခုထုတ်ပြန်ချက်ဟာ သက်တမ်းတိုးထားတဲ့ အမည်စာရင်းစာရွက်ရရှိပြီးသူတွေနဲ့ဘတ်အသစ်ရိုက်ထားသူတွေ သာ အကျုံးဝင်ပြီး MOU ဖြင့်လာရောက်သူတွေ အတွက် အကျုံးမဝင်ကြောင်း သိရပါတယ်။
