ထိုင်းနိုင်ငံ၊ အယုဒ္ဓယမြို့ရှိ တရုတ်နိုင်ငံသားပိုင် SPEY အမည်ရှိ ကားအပိုပစ္စည်းထုတ်လုပ်သော စက်ရုံမှ အကြောင်းမဲ့ အလုပ်ထုတ်ခံရသော မြန်မာလုပ်သား ၁၈ ဦးအတွက် နစ်နာကြေးရရှိအောင် ဆောင်ရွက်သွားမယ်လို့ ထိုင်းရောက် မြန်မာလုပ်သားအရေး ကူညီဆောင်ရွက်ပေးနေတဲ့ MHAC မဟာမိတ်အဖွဲ့ထံမှ သိရပါတယ်။

 

အဆိုပါ မြန်မာလုပ်သားများသည် ပြီးခဲ့တဲ့ မေလ ၂၀ ရက်နေ့က အလုပ်မှထုတ်ခံရခြင်းဖြစ်ပြီး မေလ ၂၆ ရက်နေ့မှာ MHAC မဟာမိတ်အဖွဲ့မှ ဦးဆောင်ကာ နယ်မြေခံအလုပ်သမားကာကွယ်စောင့်ရှောက်ရေးရုံးမှာ အမှုဖွင့်တိုင်ကြားခဲ့တာ ဖြစ်ပါတယ်။

 

သို့ရာတွင် အမှုမှာ ၅ လ ကြာသည်အထိ တိကျသော အဖြေမထွက်လာခဲ့ ယသဖြင့် အောက်တိုဘာ လ၂၁ရက်နေ့တွင် နစ်နာသူအလုပ်သမားများနဲ့အတူအမျိုးသားညီညွှတ်ရေးအစိုးရ NUG အလုပ်သမားဝန်ကြီးဌာနမှ တာဝန်ရှိသူတစ်ဦးက အယုဒ္ဓယခရိုင် နယ်မြေခံ အလုပ်သမားကာကွယ်စောင့်ရှောက်ရေးရုံးသို့ သွားရောက်ညှိနှိုင်းခဲ့ရကြောင်း သိရပါတယ်။

ထိုသို့ ညှိနှိုင်းချက်အရ အလုပ်သမားများအတွက် နစ်နာကြေးများကို ယခုအောက်တိုဘာလကုန် နဲ့ နိုဝင်ဘာလဆန်းအတွင်းအပြီးဆောင်ရွက်ပေးသွားမည်ဖြစ်ကြောင်း သဘောတူညီမှုရရှိခဲ့တယ်လို့ သိရပါတယ်။

 

လတ်တလောတွင် နစ်နာကြေးမည်မျှရရှိမည်ကို မသိရသေးသော်လည်း အလုပ်သမားများ၏ လုပ်သက်အလိုက် နစ်နာကြေးရရှိအောင် တောင်းဆိုဆောင်ရွက်သွားမည်ဖြစ်ကြောင်း သိရပါတယ်။

 

ပုံစာ-အယုဒ္ဓယနယ်မြေခံအလုပ်သမားကာကွယ်စောင့်ရှောက်ရေးရုံးတွင် ယနေ့သွားရောက်ညှိနှိုင်းခဲ့ကြစဥ် (ဓာတ်ပုံ-ပေးပို့)