ထိုင်းနိုင်ငံကိုလုပ်သားစေလွှတ်ရာမှာ အမှန်တကယ်အလုပ်ခန့်အပ်နိုင်မှုမရှိဘဲစေလွှတ်တာတွေပိုများလာလို့ အလုပ်သမားတွေနစ်နာနေရတယ် လို့ ရွှေ့ပြောင်းလုပ်သားအရေးကူညီဆောင်ရွက်နေသူတွေကပြောပါတယ်။ 

ဒီအခြေအနေဟာစစ်အာဏာသိမ်းပြီးနောက်မှာပိုမိုများပြားလာတာဖြစ်ပြီးအရေးယူမှုလည်းနည်းပါးနေပါတယ်။ 

"ထိုင်းဘက်ရောက်မှအလုပ်မရတာတွေကတဖြေးဖြေးများလာတယ်။စစ်အာဏာသိမ်းပြီးကတည်းကရွာတွေမီးရှို့၊ အိမ်တွေမီးရှို့လုပ်တယ်။စစ်မှုထမ်းဖို့ခိုင်းတယ်။အဲဒီလိုတွေဖြစ်နေတော့နေမရတော့ဘူး။အဲဒါကိုအခွင့်ကောင်းယူပြီးပွဲစားတွေနဲ့တချို့အေဂျင်စီတွေကအလုပ်ခေါ်စာ(demand)ကတစ်ရာလောက်ရှိရင်သူတို့က(၂၀၀)၊(၃၀၀)လောက်ခေါ်တယ်။လွှတ်တယ်။နောက်ပြီးဝန်ကြီးဌာနကသတ်မှတ်တဲ့နှုန်းထားထက်ပိုပေးရတယ်။ဒါပေမယ့်အလုပ်ကမရှိဘူး။‌ရိုင်းရိုင်းပြောရရင်တရားဝင်လူကုန်ကူးခွင့်ရသလိုဖြစ်နေတယ်"လို့မြန်မာနိုင်ငံလုံးဆိုင်ရာအလုပ်သမားသမဂ္ဂများအဖွဲ့ချုပ်(CTUM)‌ ရွှေ့ပြောင်းအလုပ်သမားဌာန၊လက်ထောက်ဌာနမှူး ဦးဟိန်းလတ်ကပြောပါတယ်။ 

ထိုင်းကိုMOUစနစ်နဲ့သွားရောက်တဲ့အလုပ်သမားတွေအခွင့်အရေးချိုးဖောက်ခံရတာတွေဟာပိုမိုဆိုးရွားလာပေမယ့်အလုပ်သမားဝန်ကြီးဌာနက‌‌တာဝန်ယူဖြေရှင်းပေးမှုအားနည်းနေပါတယ်။ 

"ကျွန်မတို့အုပ်စုထဲမှာလူတစ်ရာပါပါတယ်။(၂၅)ယောက်ပဲအလုပ်ရပါတယ်။ကျန်(၇၅)ယောက်ကအလုပ်မရှိတော့စားဝတ်နေရေးအခက်တွေ့နေရပါတယ်။အေဂျင်စီကတော့အလုပ်မြန်မြန်ရှာပေးမယ်ပြောပေမယ့်အခုထိုင်းမှာအလုပ်မဝင်ရသေးတော့စိတ်ပူတယ်"လို့စိမ့်အာကာအေဂျင်စီနဲ့ထိုင်းနိုင်ငံမှာအလုပ်လုပ်ကိုင်ဖို့စာချုပ်ချုပ်ဆိုထားသူတစ်ဦးကပြောပါတယ်။ 

အလုပ်သမားဝန်ကြီးဌာနဟာပြည်ပရောက်မြန်မာအလုပ်သမား‌တွေဆီကနိုင်ငံခြားငွေရရှိရေးကိုသာအာရုံစိုက်နေပြီးလုပ်ခလစာရဲ့(၂၅)ရာခိုင်နှုန်းကိုတရားဝင်ဘဏ်စနစ်ကတဆင့် ပြည်တွင်းကိုပြန်လည်လွှဲပြောင်းဖို့ကိုသာကြပ်မတ်နေပါတယ်။ 

Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews