အမေရိကန် နိုင်ငံ မှာ တရားမဝင် နေထိုင်နေတဲ့ မြန်မာနိုင်ငံသားတွေ အနေနဲ့ အိမ်ရှင်အစိုးရ ရဲ့ ပြည်နှင်မယ့် အခြေနေ မှ ထွက်ခွာခြင်း ထက် ယခုကတည်းက ကြိုတင်ထွက်ခွာ သင့်တယ်လို့ မြန်မာသံရုံး(ဝါရှင်တန်မြို့)က ဖေဖေါ်ဝါရီ ၅ရက် နေ့မှာ အသိပေးကြေညာ လိုက်ပါတယ်။
အမေရိကန်သမ္မတ ဒေါ်နယ် ထရမ့်က နိုင်ငံအတွင်း တရားမဝင်နေထိုင်ကြတဲ့ နိုင်ငံခြားသား တွေ ကို သက်ဆိုင်ရာနိုင်ငံများ ဆီကို ပြည်နှင်ဒဏ်ပေးကာ ပြန်ပို့လျက်ရှိတဲ့အပေါ် အမေရိကန် နိုင်ငံဆိုင်ရာ မြန်မာသံရုံးက အခုလို အသိပေးကြေညာ လိုက်တာ ဖြစ်ပါတယ်။
သံရုံးရဲ့ ကြေညာချက်မှာတော့ အမေရိကန်နိုင်ငံရောက် မြန်မာနိုင်ငံသားများအနေ နဲ့ အကြောင်းကြောင်းကြောင့် နေထိုင်ခွင့် ဗီဇာ စ တဲ့ တရား ဝင်အထောက်အထားများ သက်တမ်းကုန်ဆုံးခြင်းစသည်တို့ ကြုံတွေ့နေရပါက အထောက်အထားမဲ့ နိုင်ငံ ခြားသား နေရပ်ရွှေ့ပြောင်းသူအဖြစ် သတ်မှတ်ခံရကာ ပြည်နှင်မည့်အနေ အထားများ ဖြစ်ပေါ်လာနိုင် တဲ့ အတွက် ကာယကံရှင် ရဲ့ ပုဂ္ဂလိကအစီအစဉ် နဲ့ နေထိုင်ခွင့်ရရှိ ဖို့ ကြိုတင်ဆောင်ရွက်ထားဖို့ အသိပေးထားပါတယ်။
အကယ်၍ နေထိုင်ခွင့် အထောက်အထားမဲ့ သို့မဟုတ် တရားမဝင် ရောက်ရှိနေသူ ဖြစ်ပါက အိမ်ရှင်အစိုးရရဲ့ တာဝန်ရှိသူတွေက ပြည်နှင်ချိန်မှ ထွက်ခွာခြင်းထက် ကြိုတင်ထွက်ခွာသင့်တယ်လို့ မြန်မာသံရုံး က အသိပေးထားပါတယ်။
မြန်မာနိုင်ငံ ကို ပြန်ဖို့ရာ အတွက် မည်သည့်ခရီးသွားလက်မှတ် အမျိုးအစားမျှ မရှိပါက သို့မဟုတ် နိုင်ငံကူးလက်မှတ် ကာလကြာမြင့်စွာ သက်တမ်း လွန်နေပါက မည်သူမည်ဝါဖြစ်ကြောင်း သက်သေခံလက်မှတ်(CI) ကို မြန်မာသံရုံးမှာ လျှောက်ထားနိုင်တယ်လို့ ဆိုပါတယ်။
လျှောက်ထားရန် ပုံစံ နဲ့ လိုအပ်တဲ့ အချက်အလက် တွေ ကို မြန်မာသံရုံးရဲ့ ဝက်ဆိုက် မှာ ဖြည့်စွက်ပြီး အီးမေး /ဖုန်း တို့ ဖြင့် ဆောလျှင်စွာ ဆက်သွယ်ဆောင်ရွက်နိုင်တယ်လို့ အသိပေးကြေညာထားပါတယ်။
