တရုတ်နိုင်ငံတောင်ပိုင်း ကမ်းခြေအနီး ဖြစ်ပေါ်နေတဲ့ အားကောင်းသော အပူပိုင်းမုန်တိုင်း “ဝီဖာ” (WIPHA) ရဲ့ အရှိန်ကြောင့် မြန်မာနိုင်ငံ အတွင်း နေရာအနှံအပြားမိုးထစ်ချုန်းရွာပြီး ဒေသအလိုက်မိုးကြီးမယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးထားပါတယ်။
မုန်တိုင်းရဲ့ အရှိန်ကြောင့် မြန်မာနိုင်ငံမှာတော့ ဇူလိုင် ၂၁ ရက်မှ ဩဂုတ်လ ၁၆ ရက်နေ့အထိ တိုင်းနှင့် ပြည်နယ်အားလုံးရဲ့ နေရာစိပ်စိပ်မှ နေရာအနှံ့အပြား မိုးထစ်ချုန်းရွာသွန်းနိုင်ပြီး၊ ဒေသအလိုက် မိုးကြီးနိုင်သလို မြန်မာ့ကမ်းရိုးတန်းနဲ့ ကမ်းလွန်ပင်လယ်ပြင်မှာလည်း တစ်ခါတစ်ရံ မိုးသက်လေပြင်းတိုက်ခတ်မှုကြောင့် လှိုင်းကြီးရာမှ လှိုင်းအလွန်ကြီးနိုင်တယ်လို့ သိရပါတယ်။
မုန်တိုင်းကြောင့် လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြီးပစ်ချခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်း တို့ ဖြစ်ပွားနိုင်တာကြောင့် မြစ်ချောင်းအနီး၊ ကုန်းမြင့်ဒေသများမှာ နေထိုင်သူများအနေဖြင့် ကြိုတင်သိရှိကာ ရှောင်ရှားရန်၊ ရေကြောင်း၊ လေကြောင်း ခရီးသွားလာမှုများမှာ သတိထားရန်၊ ဆည်မြောင်းနှင့် တာတမံများတွင် လိုအပ်တဲ့ ပြင်ဆင်မှုများ ပြုလုပ်ရန်လည်း မိုးဇလမှ ဆက်လက် သတိပေးထားပါတယ်။
အပူပိုင်းမုန်တိုင်းဝီဖာရဲ့ အရှိန်ကြောင့် ထိုင်းနိုင်ငံမှာလည်း မိုးသည်ထန်စွာရွာသွန်းနိုင်တဲ့ အတွက် တောင်ခြေဒေသတွေ ရေလမ်းနဲ့မြေနိမ့်ဒေသတွေမှာ ရေကြီး ရေလျံတာတွေ ဖြစ်နိုင်တဲ့ အတွက် သတိပြုနေထိုင်ကျဖို့ ထိုင်းမိုးလေဝသဌာနကလည်းသတိပေး ထုတ်ပြန်ထားပါတယ်။
