ထိုင်းနိုင်ငံ၊ ကန်ချနာဘူရီခရိုင် ၊ ထောင်းဖာဖုမ်မြို့နယ် မှာ အထောက်အထားမရှိတဲ့ မြန်မာလုပ်သားတွေ ကို တင်ဆောင်လာတဲ့ ယာဉ်တစ်စီး ကို ထိုင်းအမြန်လမ်းရဲတပ်ဖွဲ့ မှ စစ်ဆေးရန် ရပ်တန့် ခိုင်းတာကို တိမ်းရှောင် မောင်းနှင်ထွက်ပြေးရာမှ လမ်းဘေးရှိ ဓါတ်တိုက်ကိုဝင်တိုက်မှု ဖြစ်ခဲ့တယ်လို့ ထိုင်းဒေသတွင်း သတင်းတွေ အရ သိရပါတယ်။
အောက်တိုဘာလ ၂၁ ရက် ညနေပိုင်းမှာ ဖြစ်ပွားခဲ့တာ ဖြစ်ပြီး ယာဉ်တိုက်မှုကြောင့် ထိခိုက်ဒဏ်ရာ ပြင်းထန်စွာရရှိသူမရှိပေမယ့် ယာဉ်ပေါ်ပါလာတဲ့ မြန်မာလုပ်သား ၁၅ဦး ကို ဖမ်းဆီးခံရပြီး ယာဉ်မောင်းဖြစ်သူကတော့ ထွက်ပြေးလွတ်မြောက်သွားတယ်လို့ သိရပါတယ်။
ယာဉ် ပေါ် မှာ မြန်မာအမျိုးသား ၇ ဦးနဲ့ အမျိုးသမီး ၈ ဦး၊ အပြင် လာအို အမျိုးသမီးတစ်ဦးလည်း ပါဝင်ကြောင်း ရဲတပ်ဖွဲ့ကပြောပါတယ်။
အဖမ်းခံရ တဲ့ မြန်မာရွှေ့ပြောင်းလုပ်သားတွေဟာ ရန်ကုန်နဲ့မန္တလေး တို့ကနေ လာရောက်တာ ဖြစ်ပြီး ဘုရားသုံးဆူဘက်မှ ထိုင်းနိုင်ငံအတွင်းသို့နယ်စပ်ဖြတ်ကျော်ဝင်ရောက်လာကာ အခုလို လာရောက်ဖို့ အတွက် ထိုင်းပွဲစား ကို လုပ်သားတစ်ဦးလျှင် ဘတ် ၁၅၀၀၀မှ ၂၅၀၀၀ အထိ ပေးချေခဲ့ရတယ်လို့ စကားပြန်ကတစ်ဆင့်မေးမြန်းတဲ့အပေါ် မြန်မာလုပ်သားတွေကဖြေကြားခဲ့ကြောင်းသိရပါတယ်။
ဖမ်းဆီးရမိတဲ့ အလုပ်သမား ၁၅ ဦးကိုကန်ချနဘူရီမြို့နယ်ရဲစခန်းသို့ပို့ဆောင်ခဲ့ပြီး ဥပဒေအရ ဆက်လက်ဆောင်ရွက်မယ် လို့ထိုင်းသတင်းမှာဖော်ပြထားပါတယ်။
အောက်တိုဘာ၂၁ရက် ညနေပိုင်းမှာ လည်း ချွန်ဖွန်-ရနောင်း အမြန်လမ်း မှာ ခရီးသည်တင်ယာဉ်တစ်စီးပေါ် တွင် နိုင်ငံကူးလက်မှတ်အပါအဝင် အထောက်အထားစာရွက်အတု တွေ ကိုင်ဆောင်ထားတဲ့ မြန်မာလုပ်သား ၁၃ ဦး ကို လည်း ထိုင်းရဲတပ်ဖွဲ့က ဖမ်းဆီးခဲ့ကြောင်း သိရပါတယ်။
Ref-โจโฉ
