ထိုင်း-မြန်မာ နယ်စပ် တာခ့် ခရိုင် အတွင်း အထောက်အထားမဲ့ နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသား ၅၀ကျော် ကို ဖမ်းဆီးခဲ့တယ်လို့ တာခ့်ခရိုင် လူဝင်မှုကြီးကြပ်ရေးရုံးရဲ့ သတင်းထုတ်ပြန်ချက်အရ သိရပါတယ်။
ဩဂုတ် လ ၁၉ ရက် ညနေ ၃ နာရီခန့်မှာ တာခ့်ခရိုင် ဖို့ဖရာဒေသ ဝါလေရွာအနီး သောင်ရင်းမြစ်ဘေးက နယ်စပ်ဒေသကို ထိုင်းနယ်ခြားစောင့်တပ်တွေက ကင်းလှည့် စစ်ဆေးနေစဉ် ချုံတောထဲ လူအုပ်စုလိုက် လမ်းလျှောက်နေတာ တွေ့ရှိတဲ့ အတွက် စစ်ဆေးတာမှာ အမျိုးသား ၁၈ ဦး၊ အမျိုးသမီး ၁၉ ဦး စုစုပေါင်း ၃၇ ဦးကိုတွေ့ရှိပြီး တရားဝင် နယ်စပ်ဖြတ်ကျော်ခွင့် စာရွက်စာတမ်းတွေ မတွေ့ရဘူးလို့ ဆိုပါတယ်။
ဒါ့အပြင် ဩဂုတ် ၁၉ရက် ညနေ ၄နာရီခွဲခန့်မှာ တာခ့်ခရိုင် ချင်းတုံမြို့နယ် အမှတ်၆ကျေးရွာ အနီးမှာ ယာဉ်နှစ်စီး ပေါ်တွင် လိုက်ပါလာတဲ့ မြန်မာနိုင်ငံသား ၁၇ဦး ကို စစ်ဆေးတွေ့ရှိခဲ့ ပြီး အထောင်အထားမရှိတဲ့ အတွက် ဖမ်းဆီးခဲ့တယ်လို့ ဆိုပါတယ်။
မြန်မာနိုင်ငံသားတွေဟာ ကရင်ပြည်နယ် နယ်စပ်ကတစ်ဆင့် ထိုင်းနိုင်ငံထဲ တရားမဝင် နယ်စပ်ဖြတ်ကျော် ဝင်လာကြတာဖြစ်တယ်လို့ အာဏာပိုင် တွေက ပြောဆိုထားပါတယ်။
လက်ရှိမှာ မြန်မာနိုင်ငံသား ၃၇ဦး ကို တရားမဝင် နယ်စပ်ဖြတ်ကျော်ဝင်ရောက်မှုဖြင့် အရေးယူထားပြီး ဖို့ဖရာ့ရဲစခန်းသို့ ပို့ဆောင်ထားကာ ၁၇ဦးကိုတော့ ဝမ်ချောင်ရဲစခန်းမှာ ဖမ်းဆီးထားတယ်လို့ သိရပါတယ်။
ယခုရက်ပိုင်း အတွင်း ထိုင်းနိုင်ငံ ထဲကို နယ်စပ်ကနေတစ်ဆင့် တရားမ၀င် နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသားတွေ နေ့စဉ် အမျှ ဖမ်းဆီးခံနေရကြောင်း ထိုင်းသတင်းဌာနတွေရဲ့ဖေါ်ပြချက်အရသိရပါတယ်။
