စစ်ကောင်စီရဲ့ စစ်မှုထမ်းဥပဒေ ကို ရှောင်တိမ်းဖို့ နဲ့ အလုပ်အကိုင်အခွင့်အလမ်းရှာဖွေဖို့ အတွက် အိမ်နီးချင်း နိုင်ငံ တွေကို တရားမဝင်နယ်စပ်ဖြတ်ကျော်ရင်း ဖမ်းဆီးခံရတဲ့ မြန်မာရွှေ့ပြောင်းလုပ်သား ဦးရေဟာ ၆ လ အတွင်း ၆၀၀၀ ကျော် ရှိတယ်လို့ စစ်ကောင်စီရဲ့ စစ်ရာဇဝတ်မှုတွေကို စောင့်ကြည့်မှတ်တမ်းတင်နေတဲ့ Spring Revolution Database (SRD) အဖွဲ့က ထုတ်ပြန်ထားပါတယ်။
၂၀၂၅ ခုနှစ် ဇန်နဝါရီလ မှ ဇွန်လ အထိ အိမ်နီးချင်း နိုင်ငံ တွေကို တရားမဝင်နယ်စပ်ဖြတ်ကျော်လို့ သက်ဆိုင်ရာ နိုင်ငံ အာဏာပိုင်တွေ ရဲ့ အဖမ်းဆီးခံရတဲ့ မြန်မာလုပ်သား ၆၁၇၅ ဦးရှိတယ်လို့ ဆိုပါတယ်။
အဲ့ဒီထဲမှာ ထိုင်းနိုင်ငံကို နယ်စပ်ဖြတ်ကျော် ဝင်ရောက်လို့ အဖမ်းခံရတဲ့ မြန်မာရွှေ့ပြောင်းလုပ်သား၃၁၇၇ဦး၊ မလေးရှားနိုင်ငံကို တရားမဝင် ဝင်ရောက်လို့ အဖမ်းခံရသူ ၂၉၄၄ဦး၊ အိန္ဒိယ နိုင်ငံ ကို ဝင်ရောက်လို့ ၅၃ ဦး တရုတ်နိုင်ငံကို ဝင်ရောက်လို့ တစ်ဦး အဖမ်းခံခဲ့ရတယ်လို့ SRD အဖွဲ့က ထုတ်ပြန်ထားပါတယ်။
တရားမဝင်နယ်စပ်ဖြတ်ကျော်လို့ အဖမ်းခံရမှု တွင် ထိုင်း-မြန်မာ နယ်စပ် ကန်ချနဘူရီခရိုင် မှာ အများဆုံး ဖြစ်ပြီး နယ်စပ်ဖြတ်ကျော်ဝင်ရောက်ဖို့ ပွဲစားဆိုသူကို ဘတ်တစ်သောင်းခွဲကနေ ဘတ် ၅၀၀၀၀ အထိ ပေးရတာတွေရှိတယ်လို့ ထိုင်းသတင်းတွေ ရဲ့ဖေါ်ပြချက်အရသိရပါတယ်။
ထိုင်းနိုင်ငံကနေတစ်ဆင့် မလေးရှားနိုင်ငံကို ဝင်ရောက် တာတွေ လည်းရှိပြီး အဖမ်းခံရတဲ့ ဖြစ်စဉ်များတွင်ဒေသခံ အာဏာပိုင်တွေထံ ကြိုတင်သတင်းပေးတာကြောင့် စောင့်ဆိုင်းဖမ်းစီးတာတွေရှိသလို ပွဲစားတွေ မှ လူမဆန်စွာ တောအုပ်တွေထဲပစ်ထားခဲ့တာတွေကြောင့်လည်း အဖမ်းခံရတာတွေရှိပါတယ်။
အခုလို တရားမဝင်နယ်စပ်ဖြတ်ကျော် အဖမ်းခံရတာတွေ များနေပေမယ့်စစ်ကောင်စီ က လူငယ်တွေကို စစ်မှုထမ်း ဖို့ အတင်းအဓမ္မခေါ်ယူနေသလို ပြည်ပကိုတရားဝင်သွားရောက်ခွင့်ပါ ပိတ်ပင်ကန့်သက်လိုက်တဲ့ အတွက် အိမ်နီးချင်းဒေသတွင်းနိုင်ငံတွေကို တရားမဝင် နယ်စပ်ဖြတ်ကျော်သူတွေ ပိုမိုများလာတယ်လို့ ပြည်ပရောက်မြန်မာလုပ်သားရေးကူညီပေးသူတွေထံမှသိရပါတယ်။
