ထိုင်းနိုင်ငံအတွင်း အထောက်အထားမရှိဘဲ တရားမဝင် အလုပ်လုပ်ကိုင်နေသူတွေကို ထိရောက်စွာနှိမ်နင်း ပြီး နေရပ်ကို ပြန်ပို့မယ်လို့ ထိုင်းအလုပ်သမားဝန်ကြီး Mr. Pongkawin Juangroongruangkit က ပြောကြားလိုက်ပါတယ်။

 

နိုင်ငံခြားသားအလုပ်သမားတွေဟာ ထိုင်းစီးပွားရေးအတွက် အရေးပါပေမယ့် ဥပဒေမဲ့ လုပ်ကိုင်နေတာကို ခွင့်ပြုထားလို့ မရဘူးလို့ဆိုပါတယ်။

 

နိုင်ငံခြားသားအလုပ်သမားများ အား စည်းကမ်းမဲ့ အသုံးပြုမှုကို ဆက်လက် ခွင့်ပြုပါက ပြဿနာအမျိုးမျိုးကို ဖြစ်ပေါ်စေနိုင်တဲ့ အတွက် တရားမဝင်နိုင်ငံခြားသား အလုပ်သမားများ တွေ့ရှိပါက သက်ဆိုင်ရာ အလုပ်သမားဝန်ကြီးဌာနသို့ တိုင်ကြားနိုင်တယ်လို့ အသိပေးထားပါတယ်။

 

ထိုင်း-မြန်မာ နယ်စပ်ရှိ ဒုက္ခသည် စခန်းများ မှမြန်မာ စစ်ရှောင် တွေကို တရားဝင်အလုပ်လုပ်ကိုင်ခွင့်ပေးဖို့ ထိုင်းအစိုးရက ဩဂုတ်၂၆ရက်မှာ ထုတ်ပြန်ခဲ့ ပြီးနောက် အထောက်အထားမရှိတဲ့ နိုင်ငံခြားသား လုပ်သားတွေကို ရှာဖွေရှင်းလင်းပြီး နေရပ်ပြန်ပို့ ဖို့ ထိုင်းအလုပ်သမားဝန်ကြီးဌာနက ထုတ်ပြန်လာတာ ဖြစ်ပါတယ်။

 

နိုင်ငံခြားလုပ်သားတွေ အနေနဲ့ အလုပ်လုပ်ကိုင်ခွင့်အထောက်အထားမရှိဘဲ အလုပ်လုပ်ကိုင်နေတာကို စစ်ဆေးတွေ့ရှိပါက ဘတ် ၅၀၀၀ မှ ၅၀၀၀၀ အထိ ဒဏ်ငွေ ချမှတ်ခံရမှာဖြစ်ကာ မူရင်းနိုင်ငံ ကို ပြန်ပို့မယ်လို့ ဆိုပါတယ်။

 

အထောက်အထားမရှိတဲ့ အလုပ်သမားကို ခိုင်းစေတဲ့ အလုပ်ရှင်ကိုတော့ အလုပ်သမားတစ်ဦး အတွက် ဘတ် ၁၀၀၀၀ ကနေ ၁၀၀၀၀၀ အထိ ဒဏ်ငွေပေးဆောင်ရမယ်လို့ ကြေညာထားပါတယ်။

 

ထပ်မံ အပြစ်ကျုးလွန်ပါက ထောင်ဒဏ် တစ်နှစ် သို့မဟုတ် ဘတ် ၅၀၀၀၀ ကနေ၂၀၀၀၀၀ အထိ ဒဏ်နှစ်မျိုးစလုံး ပေးဆောင်ရမယ့်အပြင် ၃ နှစ်ကြာ နိုင်ငံခြားသား အလုပ်သမား ခန့်ထားခွင့်ပါ ပိတ်ပင်သွားမှာ ဖြစ်တယ်လို့ သိရပါတယ်။

အလုပ်အကိုင်ရှာဖွေရေးဌာနရဲ့ ၂၀၂၅ ခုနှစ်၊ ဇူလိုင်လ အချက်အလက်တွေအရ ထိုင်းနိုင်ငံမှာ လက်ရှိ တရားဝင် အလုပ်လုပ်ကိုင်ခွင့်ရထားတဲ့ နိုင်ငံခြားသား စုစုပေါင်း ၄,၀၇၁,၆၁၇ ဦး ရှိတယ်လို့ သိရပါတယ်။

 

အဲ့ဒီအထဲမှာ အဓိကအားဖြင့် MOU စနစ်နဲ့ ဝင်ရောက်လာသူ ၆၈၇,၄၀၅ ဦးရှိပြီး မြန်မာနိုင်ငံသား ၂၄၈,၃၂၀ ဦး ပါဝင်သလို တရားမဝင်ကနေ တရားဝင်ဖြစ်အောင် ဆောင်ရွက်နေဆဲဖြစ်တဲ့သူ ၁,၈၄၈,၇၁၂ ဦး ရှိပြီး မြန်မာနိုင်ငံသား ၁,၈၂၉,၃၇၉ ဦး ပါဝင်တယ်လို့ ဆိုပါတယ်။

 

ထိုင်းအလုပ်သမားဝန်ကြီးက အလုပ်ရှင်တွေကို တရားမဝင် အလုပ်သမားတွေ မခန့်ထားဖို့ တိုက်တွန်းခဲ့ပြီးအလုပ်သမား ခန့်အပ်လိုရင်လည်း MOU စနစ်အတိုင်း တရားဝင် လုပ်ဆောင်ကြဖို့ ပြောကြားခဲ့ပါတယ်။

Ref-Matichon News