အရှေ့အလယ်ပိုင်းနိုင်ငံတွေ မှာ အလုပ်သမားအခွင့်အရေး ချိုးဖောက်ခံရလို့ မြန်မာအလုပ်သမားတွေ က အလုပ်သမားဝန်ကြီးဌာန ကို တိုင်ကြားတာတွေ များနေပေမယ့် ပို့ဆောင်ပေးတဲ့ အေ့ဂျင့်နဲ့ပွဲစား တို့ရဲ့ အချက်အလက် အတိအကျမရှိခြင်းတို့ကြောင့် ကျူးလွန်သူတွေ ကို စစ်ဆေးအရေးယူဖို့ အခက်အခဲရှိတယ်လို့ စစ်ကောင်စီ အလုပ်သမားဝန်ကြီးဌာန က ထုတ်ပြောပါတယ်။
အရှေ့အလယ်ပိုင်းနိုင်ငံတွေဖြစ်တဲ့ ဒူဘိုင်း၊ ဆော်ဒီ၊ အိုမန် စတဲ့ နိုင်ငံတွေကို သွားရောက် အလုပ်လုပ်ကိုင်ကြသူတွေ မှာ အဆင်မပြေမှုများတဲ့ အတွက် နိုင်ငံခြားရေးဝန်ကြီးဌာန၊ ပြည်ထဲဝန်ကြီးဌာနတို့က ပြန်လည်ခေါ်ဆောင်ပေးခဲ့ရတာရှိပြီး အဆိုပါ အခက်အခဲတွေအပေါ် အရေးယူဆောင်ရွက်ချက်များနဲ့ ပတ်သက်ပြီး မီဒီယာများက မေးမြန်းမှုအပေါ် အလုပ်သမားဝန်ကြီးဌာနက ယခုလို ပြန်လည် ဖြေကြားခဲ့တာ ဖြစ်ပါတယ်။
အဆိုပါနိုင်ငံတွေ မှာမြန်မာအလုပ်သမားတွေ အနေနဲ့ အိမ်အကူလုပ်ငန်း၊ အခြား အထွေထွေ လုပ်သား အဖြစ် တရားမဝင် သွားရောက် လုပ်ကိုင်ကြပြီး ဝန်ဆောင်ခ အဆမတန်ပေးရခြင်း၊ လုပ်အားခ ခေါင်းပုံဖြတ်ခံရခြင်း၊ အဓမ္မခိုင်းစေခံရခြင်း၊ လူကုန်ကူးခံရခြင်း၊ လိင်ပိုင်းဆိုင်ရာ အနိုင်အထက်ပြုကျင့်ခံရခြင်း၊ ရိုက်နှက်နှိပ်စက်ခံရခြင်း၊ အစားစာမကျွေးခြင်း စတဲ့ အခက်ခဲများ ဖြစ်ပေါ်နေပြီး အချို့ပွဲစား၊ အေ့ဂျင့် တွေက တနိုင်ငံမှ တနိုင်ငံကို စေလွှတ်ကာ တာဝန်ယူမှု မရှိဘဲ မိခင်နိုင်ငံကို ပြန်လိုပါက လျော်ကြေးအဆမတန်တောင်းခြင်း၊ နိုင်ငံကူးလက်မှတ်နဲ့အခြားအထောက်အထားများသိမ်းထားခြင်း စတဲ့ ပြသာနာတွေ များစွာကြုံတွေနေရတယ်လို့ ဆိုပါတယ်။
အလုပ်သမားအခွင့်ရေးချိုးဖောက်ခံရတဲ့ အတွက် နစ်နာသူ တွေက တိုင်ကြားတဲ့အခါမှာ ဌာနမှ တရားစွဲဆို အရေးယူဆောင်ရွက်နိုင်ရေး စစ်ဆေးဆောင်ရွက်ရာ ၎င်းတို့အား ပို့ဆောင်ခဲ့တဲ့ ပွဲစားများ၊ အေးဂျင့်များမှာ ပြည်ပ အလုပ်အကိုင်အကျိုးဆောင် လိုင်စင်မရရှိသူများ၊ တရားဝင်ကိုယ်စားလှယ်အဖြစ် မှတ်ပုံတင်ထားခြင်း မရှိတာကြောင့် တိုင်ကြားစာပါ လိပ်စာများတွင် နေထိုင်မှုမရှိဘဲ တိမ်းရှောင်နေခြင်း၊ တိုင်ကြားသူများမှလည်း ပွဲစားများ၏ နေရပ်လိပ်စာအမှန်နှင့် မှတ်ပုံတင်၊ အိမ်ထောင်စုစာရင်းကဲ့သို့သော အရေးကြီးစာရွက်စာတမ်းများကို မသိရှိရခြင်း၊ ငွေပေးငွေယူ စာချုပ်စာတမ်းများ ချုပ်ဆိုထားမှု မရှိခြင်းများကြောင့် စစ်ဆေးအရေးယူရန် အခက်အခဲရှိနေတာလို့ အလုပ်သမားဝန်ကြီးဌာနက ပြန်လည်ဖြေကြားထားပါတယ်။
အရှေ့အလယ်ပိုင်းနိုင်ငံတွေမှာ အခက်ခဲဒုက္ခရောက်ရှိနေတဲ့ မြန်မာအလုပ်သမားတွေကို မိခင်နိုင်ငံသို့ ပြန်လာနိုင် ဖို့ အတွက် သက်ဆိုင်ရာဝန်ကြီးဌာန တွေ နဲ့ ပူးပေါင်းချိတ်ဆက် ကူညီဆောင်ရွက်ပေးနေတယ်လို့လဲဆိုပါတယ်။
အလုပ်သမားအခွင့်အရေးများ ဆုံးရှုံးခြင်း၊ ပြဿနာအခက်ခဲများ ကြုံတွေ့နေရခြင်းများမှာ တရားမဝင်သွားရောက် လုပ်ကိုင်ခြင်း ရဲ့ အကျိုးဆက်များ ဖြစ်တဲ့ အတွက် ပြည်ပအလုပ်အကိုင်အကျိုးဆောင်လိုင်စင်ရအေဂျင်စီ တွေမှတစ်ဆင့် ပြည်ပနိုင်ငံများကို တရားဝင် သွားရောက်အလုပ်လုပ်ကိုင်ဖို့ လည်း တိုက်တွန်းထားပါတယ်။
