ထိုင်းနိုင်ငံ ဘန်ကောက်မြို့၊ လက်ကရာဘန်ခရိုင်အတွင်းရှိ စကျင်ကျောက်ရောင်းဝယ်ရေးနှင့် ထုတ်လုပ်ရေးဆိုင်တစ်ခုတွင် စကျင်ကျောက်ပြား ပုံ ပြိုကျရာမှ ကျောက်ပြားပိမိပြီး မြန်မာလုပ်သားတစ်ဦး သေဆုံးခဲ့တယ်လို့ ထိုင်းသတင်းတွေရဲ့ဖေါ်ပြချက်အရသိရပါတယ်။
ဇန်နဝါရီ ၁၃ရက် မနက် ၁၁နာရီ ခန့်ကဖြစ်ပွားခဲ့တာ ဖြစ်ပြီး CCTV မှတ်တမ်းများအရ ဖြစ်ရပ်မတိုင်မီက သေဆုံးသူဟာ ကျောက်ပြားပုံများကြားရှိ ကွက်လပ်ထဲသို့ လမ်းလျှောက်ဝင်ရောက်နေစဉ် အခြားအလုပ်သမားနှစ်ဦးက forklift မောင်းနှင် ခြင်းနဲ့ ကျောက်ပြားများ စီ တာတွေ လုပ်ကိုင်နေခဲ့ရာ ကျောက်ပြားပုံမှာ မထင်မှတ်ဘဲ ရုတ်တရက်ပြိုကျခဲ့ပြီးနောက် မြန်မာလုပ်သား အပေါ် ပိမိသွားတယ်လို့ သိရပါတယ်။
သေဆုံးသူ မြန်မာလုပ်သားဟာ အသက်၂၆နှစ်အရွယ် ကိုဝင်းထွန်းနိုင် ဆိုသူဖြစ်ပြီး ကျောက်ပြားပိမိ ချိန်တွင် ဆိုင်ရှိ လုပ်သားတွေနဲ့ ကယ်ဆယ်ရေးအဖွဲ့ တွေက လေးလံတဲ့ ကျောက်ပြားတွေ ကို ခက်ခဲစွာ ဖယ်ရှားပေးခဲ့ပေမယ့် ရရှိထားတဲ့ ဒဏ်ရာ ပြင်းထန်တာကြောင့် အခင်းဖြစ်ရာ မှာ ပင် သေဆုံးခဲ့တယ်လို့ ဆိုပါတယ်။
လက်ရှိမှာတော့ သေဆုံးသူရဲ့ ရုပ်အလောင်းကို ရင်ခွဲစစ်ဆေးရန်အတွက် ပို့ဆောင်ထားပြီးစစ်ဆေးမှု ပြီးစီးပါက မိသားစုထံ ပြန်လည်လွှဲပြောင်းပေးကာ ဘာသာရေးအလိုက် အသုဘအခမ်းအနားပြုလုပ်ခွင့် ပြုသွားမယ်လို့ သတင်းမှာ ဖေါ်ပြထားပါတယ်။
Ref-Matichon online
